11

Jesus tama iha Jerusalem

                ¹ La’o besik  dau-daun ba Jerusalem no Betania, iha foho Oliveira nian, Jesus haruka Nia eskolante na'in rua atu ba uluk  ² hodi dehan ba sira, “Imi la’o ba knua nebe hela iha imi nia oin. Imi tama ba, imi sei hare kedas kuda burru oan ida kesi hela, ema seidauk sa'e. Imi kore tiha nia, lori mai. ³ Ema dehan karik ba imi, ‘Tan sa imi halo nune'e?’ imi sei hatan, ‘Na’i hakarak nia, maibe la kleur, Nia sei haruka lori fali mai iha ne'e.’”

                        Sira ba. Sira hetan kuda oan ida kesi hela iha odamatan iha liur besik luron. Sira kore tiha nia. ⁵ Ema balun nebe hela iha neba husu ba sira, “Tan sai imi kore kuda burru oan ne'e?” ⁶ Sira hatan tuir Jesus hanorin. Ema husik sira la'o ba. ⁷ Sira lori kuda burru oan ba Jesus, tau sira nia hena iha leten. Jesus sa'e ba nia. ⁸ Ema barak nahe sira nia hena iha dalan; sira seluk nahe ai-sanak matak nebe sira tesi iha to'os. ⁹ Sira nebe la'o iha oin no sira nebe la'o iha kotuk haklalak dehan, “Osana! Diak tebes ida nebe mai hodi Na’i nia naran! ¹⁰ Diak tebes aman David nia reinu nebe to'o mai dau-daun. Osana leten aas ba!”

                ¹¹ To'o tiha Jerusalem, Nia tama iha templu. Nia hare buat hot-hotu iha neba, maibe tamba kalan besik ona, Nia ba Betania ho nia eskolante sanulu resin rua.

Jesus hateten aat ai figueira ida

                ¹² Loron nebe tuir mai, wainhira sira husik Betania, Nia hamlaha, ¹³ Sira hare housi dook ai figueira ida ho tahan barak. Nia hakbesik atu hare Nia bele hetan fuan ruma ka lae. To'o tiha neba, Nia hetan tahan deit, basa tempu atu ai figueira fo fuan seidauk to'o duni. ¹⁴ Nia dehan, “Ema sei la han tan o nia fuan tinan ba tinan.” Nia eskolante sira rona buat sira ne'e hotu.

Jesus tama iha templu

                ¹⁵ To’o tiha Jerusalem, Nia tama iha Templu no hahu duni sai sira hotu nebe sosa no fa'an iha templu. Nia hatun meja sira ema nebe troka osan no fa'an manu falur nian. ¹⁶ Nia la husik ema lori sasan sira liu housi Templu laran. ¹⁷ Tuir mai, Nia hahu hanorin hodi dehan ba sira, “La hakerek ona, ‘Ema sei bolu Ha’u nia uma orasaun povu hot-hotu nian?’ Imi fali halo nia nakfila ba na’okten sira nia luhan!” ¹⁸ Am’lulik boot no eskriba sira rona kona ba buat ne'e no sira buka oin sa sira bele oho Nia, basa  sira tauk Nia tamba povu tomak hakfodak kona ba Nia hanorin.

                ¹⁹ Kalan tiha ona wainhira Jesus husik sidade.

Ai figueira namlaek

                ²⁰ Iha dader, wainhira sira liu housi neba, sira hare ai figueira namlaek ona to'o abut. ²¹ Pedro hanoin hetan hodi dehan ba Nia, “Mestre, hare ba; ai figueira nebe Ita fo malisan namlaek ona.” ²² Jesus hatan ba nia dehan, “Fiar Maromak ba! ²³ Tebes Ha’u dehan ba imi: lo-los, ema nebe hateten ba foho ne'e, ‘Fokit o nia an housi ne'e no soe o nia an ba tasi laran,’  hodi la namlele iha nia fuan maibe fiar katak buat nebe nia dehan sei mosu, sei mosu duni ba nia. ²⁴ Ne’e duni, Ha’u dehan ba imi katak buat nebe imi husu hodi resa, fiar ba katak imi sei simu; nia sei mosu duni ba imi. ²⁵ Wainhira imi hamriik atu resa, fo perdua ba sira nebe imi hirus atu imi nia Aman iha lalehan sei fo perdua ba imi. ²⁶ Imi la fo perdua karik, imi nia Aman nebe iha lalehan mos sei la fo perdua ba imi.”

Ema husu kona ba Nia kbiit

                ²⁷ Sira fila fali ba Jerusalem. Wainhira Jesus la'o dau-daun iha templu, am’lulik boot sira no eskriba no katuas sira ba hasouru Nia. ²⁸ Sira dehan ba Nia, “Ho kbiit ida nebe mak o halo  buat ne'e? Eh, ema se mak fo kbiit ba O atu halo buat hirak ne'e hotu?” ²⁹ Jesus hatan, “Ha’u husu buat ida deit ba imi. Imi bele hatan mai Ha’u karik, Ha’u mos sei hateten ba imi kona ba Ha’u nia kbiit atu halo buat ne'e hotu. ³⁰ Joao nia baptismu mai housi lalehan ka housi ema? Hatan mai Ha’u ba!” ³¹ Sira haksesuk malu hodi dehan, “Ita dehan housi lalehan; Nia sei hateten ‘Tan sa imi lakohi fiar nia?’ ³² Maibe ita hateten karik, ‘Housi ema,’ – sira tauk povu basa ema hotu fiar katak Joao ne'e profeta lo-los. ³³ Ne’e duni sira hatan ba Jesus, “Ami la hatene.” Jesus dehan ba sira, “Ha’u mos sei la hateten ba imi kona ba Ha’u nia kbiit atu halo buat hirak ne'e hotu.”