12

Aiknanoik kona ba to'os uvas nia na'in

                ¹ Nia koalia ba sira ho aiknanoik sira. “Ema ida halo to'os uvas nian, hale’u nia ho lutu, ke’e kuak no harii torre ida. Tuir mai, nia saran to'os ne'e ba ema kontratu na'in. Nia la'o ba rai seluk. ² Wainhira tempu los to'o ona, nia haruka nia emar ida atu husu buat nebe monu ba nia. ³ Maibe sira kaer emar ne'e, baku nia no haruka nia fila ho liman mamuk. ⁴ Dala ida tan, nia haruka ema seluk ba sira. Nia mos sira baku no trata aat. ⁵ Nia haruka tan ema seluk, maibe sira oho nia. Nune'e mos ema barak seluk; balun sira baku, balun sira oho. ⁶ Ikus mai, nia iha ema ida deit atu haruka: nia oan mane mesak nebe nia hadomi. Nia haruka ba sira hodi hanoin, ‘Sira sei hamtauk Ha’u nia oan.’ ⁷ Maibe ema kontratu na'in sira dehan ba malu, ‘Ida ne'e mak nia liman rohan na'in! Mai, ita oho nia, nune'e nia liman rohan sei monu mai ita.’  ⁸ Sira kaer no oho nia, hafoin soe nia ba liur. ⁹ To’os na'in ne'e sei halo sa los? Nia sei mai no halo lakon ema kontratu na'in sira ne'e hodi saran to'os uvas nian ba ema seluk. ¹⁰ Imi seidauk lee lia hakerek ne'e: ‘Fatuk nebe badaen sira hewai nakfila ba fatuk inan; ¹¹ buat ida ne'e Na’i mak halo. Nia sai buat kmanek liu iha ita nia oin?” ¹² Sira buka atu kaer Nia, basa sira hatene katak Nia koalia kona ba sira ho aiknanoik ida ne’e, maibe sira tauk povu. Sira ba hodi husik Nia.

Kona ba impostu

                ¹³ Tuir mai, sira haruka fariseu balun no Herodes nia emar sira atu halo Nia ibun sala. ¹⁴ Sira ne'e mosu mai hodi dehan ba Nia, “Mestre, ami hatene katak Ita la tauk ema ida, basa Ita la fihir ema nia oin, maibe hanorin deit dalan Na’i ninian ho lia los. Bele selu impostu ba Cesar ka lae? Ami sei selu ka lae?” ¹⁵ Nia hare sira nia laran makerek. Nia hatan ba sira dehan, “Tan sa imi koko Ha’u? Lori osan mai Ha’u atu Ha’u bele hare!” ¹⁶ Sira fo osan ba Nia. Nia husu ba sira, “Ida ne'e nia ilas no hakerek, se nian?” “Cesar nian,” sira hatan. ¹⁷ Jesus dehan fali, “Fo fali ba Cesar buat nebe Cesar nian; no ba Maromak buat nebe Maromak nian!” Sira hakfodak ho hatan ida ne'e.

Moris hi’as housi mate

                ¹⁸ Tuir mai, Saduseu balun nebe fiar katak la iha moris hi’as hakbesik Jesus hodi husu Nia, ^{19 “}Mestre, Moises hakerek katak wainhira mane ida nia maun mate hodi husik nia kaben no sira na'in rua oan la iha, mane ne’e sei hola feto faluk ne'e atu fo oan ba nia maun. ²⁰ Iha maun alin na'in hitu. Ida boot liu hola feto, hafoin nia mate, la hetan oan ida. ²¹ Ida nebe tuir nia hola feto faluk ne’e, maibe nia mos mate, la hetan oan . Nune'e mos ho ida nebe tuir nia. ²² Sira na'in hitu hola feto ne'e, no la hetan oan ida. Ikus mai feto ne'e mate. ²³ Iha moris hi’as, wainhira sira hotu sei moris fali, feto ne'e se los nia kaben, basa sira hotu hola nia?” ²⁴ Jesus hatan ba sira, “Imi hanoin sala teb-tebes! Imi la komprende Eskritura sira no Maromak nia kbiit. ²⁵ Basa wainhira sira sei moris hi’as housi mate, mane ho feto la hola malu tan. Sira sei sai hanesan anju sira iha lalehan. ²⁶ Kona ba mate sira sei moris hi’as fali, imi la lee Moises nia livru, iha fatin nebe koalia kona ba ai-hun nebe lakan, katak Maromak koalia ba nia dehan, ‘Ha’u Abraao nia Maromak, Isaac nia Maromak, no Jacob nia Maromak.’ ²⁷ Nia la'os ema mate nia Maromak maibe ema moris nian. Imi hanoin sala teb-tebes!”

Ukunfuan boot liu hotu

                ²⁸ Eskriba ida, nebe rona Nia koalia no hare oin sa Jesus hatan diak los ba sira, mai hasouru Nia hodi husu, “Ukunfuan uluk liu hotu ida nebe los?” ²⁹ Jesus hatan, “Ida nebe uluk liu mak: ‘Rona ba, Israel. Na’i, ita nia Maromak, mak Na’i ida mesak. ³⁰ O sei hadomi Na’i o nia Maromak ho o nia fuan tomak, ho o nia neon tomak no ho nia kbiit tomak.’ ³¹ Ida nebe tuir nia mak ne'e: ‘O sei hadomi o nia maluk sira nudar o nia an rasik.’ La iha tan ukunfuan nebe boot liu sira ne'e.” ³² Eskriba ne'e dehan ba Nia, “Ita koalia lo-los, Mestre.  Buat nebe ita hateten fo-foun ne'e los duni, katak Maromak ida mesak; la iha tan ida seluk. ³³ Hadomi Nia ho o nia fuan tomak, ho o hanoin no kbiit tomak, no hadomi o nia maluk hanesan o nia an rasik; ida ne'e mak boot liu buat karan eh sakrifisiu hotu.” ³⁴ Jesus hare katak nia koalia ho matenek. Nia dehan ba eskriba ne'e, “O la dook housi Maromak nia reinu!” La iha tan ema nebe berani atu husu lia ba Nia.

Lia kona ba Messias

                ³⁵ Tuir mai, wainhira nia hanorin iha templu, Jesus dehan, “Oin sa eskriba sira balun dehan katak Messias ne'e David nia Oan? ³⁶ Basa David rasik, ho Espiritu Santu nia naroman dehan, ‘Na’i hateten ba Ha’u nia Na’i: Tur iha Ha’u nia sorin kuana to'o tempu nebe Ha’u tau O nia funubalun sira iha o nia ain nia okos.’ ³⁷ David rasik bolu Nia Na’i; ne'e duni, oin sa mak Nia nia oan fali?” Ema barak rona Nia ho ksolok.

Jesus halo sira matan moris kona ba eskriba sira

                ³⁸ Nia dehan hodi hanorin, “Matan moris ba kona ba eskriba sira, nebe hakarak la'o ho unuk nar-naruk atu ema kumprimenta sira iha merkadu, ³⁹ atu tur iha sinagoga sira nia oin eh iha ema boot sira nia fatin iha festa. ⁴⁰ Sira ne'e mak ema nebe tolan feto faluk sira nia rikusoi, maski sira halo ema hare ho laran makerek katak sira resa  barak. Sira ne'e sei hetan susar boot liu.”

Feto faluk nia osan

                ⁴¹ Nia tur iha osan fatin nia oin, hodi hare ema sira nebe tau osan iha neba. Ema riku sira tau osan barak. ⁴² Feto faluk kiak ida mos mosu hodi tau osan fuan kiik rua. Osan ne'e nia folin kiik tebes. ⁴³ Jesus bolu nia eskolante sira hodi dehan ba sira, “Tebes Ha’u dehan ba imi; feto faluk ne'e tau barak liu fali sira seluk nebe tau osan iha osan fatin, ⁴⁴ basa sira tau osan nebe  resin ba sira, maibe housi uitoan nebe nia iha, nia tau hotu, buat nebe nia kuran atu moris.”