13

Jesus koalia kona ba Jerusalem

                ¹ Wainhira sira husik dau-daun Templu, eskolante ida dehan ba Nia, “Mestre, hare ba fatuk bo-boot sira ne'e! Hare ba andar aas sira ne'e!” ² Jesus hatan, “Imi hare andar bo-boot sira ne'e? Fatuk ida mos sei la hela iha fatuk seluk nia leten. Buat hotu ne'e sei sobu tiha.”

Susar boot atu mai

                ³ Jesus tur iha foho oliveira nian hodi fila oin ba Templu. Pedro, Tiago no Joao husu Nia, ^{4 “}Dehan took mai ami wainhira buat hotu ne'e sei mosu no mos sinal sira nebe sei hatudu katak buat hotu ne'e sei halo tuir duni.” ⁵ Nune’e Jesus hahu hateten ba sira, “Matan moris ba atu ema la bele lohi imi! ⁶ Ema barak sei mai hodi usa Ha’u nia naran, dehan, ‘Ha’u mak Nia,’ no sira sei lohi duni ema barak. ⁷ Wainhira imi rona kona ba funu no lia bosok kona ba funu, imi keta tauk. Buat hirak ne'e sei mosu duni, maibe rohan seidauk to'o mai. ⁸ Nasaun sei ba hasouru nasaun seluk, no reinu hasouru reinu seluk. Iha fatin balun, rai sei nakdoko; iha fatin seluk tan sei hamlaha boot, maibe terus oi-oin sei hahu deit ho ida ne'e.”

                ^{9 “}Matan moris ba! Ema sira sei saran imi ba tribunal, sira sei baku imi iha sinagoga; imi sei hamriik iha na’i ulun no liurai sira nia oin tan Ha’u nia naran atu fo sasin ba sira kona ba Ha’u, ¹⁰ basa, uluk knanain, liafuan foun diak sei haklaken ba nasaun hotu. ¹¹ Wainhira sira lori imi atu sasin ba ema, imi keta hanoin resin atu dehan sa los. Koalia deit buat nebe sei fo sai ba imi iha tempu neba, basa la'os imi mak sei koalia, maibe Espiritu Santu. ¹² Maun sei saran nia alin; aman sei saran nia oan; oan sira sei ba hasouru sira nia aman inan hodi oho sira. ¹³ Ema hotu sei hirus imi tan Ha’u nia naran; maibe ema nebe sei tahan to'o rohan sei hetan Maksoin.”

Ida nebe ema hakribi

                ¹⁴ Wainhira imi hare katak ida nebe ema hakribi hamriik iha fatin nebe la'os ninian, (ema nebe lee, buka komprende ba), sira nebe iha Judeia halai ba foho ba; ¹⁵ ema ruma karik iha uma leten, nia keta tun ba uma laran atu hasai buat ruma iha neba; ¹⁶ ema ruma iha to'os karik, nia keta fila fali atu hola nia unuk. ¹⁷ Susar boot ba sira nebe isin rua eh ho oan nurak, wainhira loron sira ne'e sei mai. ¹⁸ Resa ba, atu buat sira ne'e la mai iha tempu rai malirin nian, ¹⁹ basa iha loron sira ne'e susar boot sei mosu; seidauk hetan susar ida hanesan nia houri tempu nebe Maromak hakiak mundu ne'e to'o ohin. ²⁰ Na’i la habadak karik loron sira ne'e, ema ida la bele tahan. Maibe Na’i sei habadak nia duni tamba sira nebe Nia fihir ona. ²¹ Ema ruma dehan karik ba imi, ‘Hare ba, Kristu mak ne'e ona’ eh ‘Hare ba, Nia iha neba,’ imi keta fiar, ²² basa messias bosok sira sei mosu mai hodi lori sinal no buat oi-oin atu, bele karik, lohi mos sira nebe Maromak fihir ona. ²³ Ne’e duni, matan moris ba! Buat hotu ne'e Ha’u fo hatene nanis ona.”

Oan Mane hiit An mai

                ²⁴ Maibe iha loron sira ne'e, susar boot sira ne'e hotu tiha, loron sei sai nakukun, fulan sei lakon nia naroman, ²⁵ fitun sira sei monu housi lalehan, no kbiit lalehan nian sei nakdoko hela. ²⁶ Tuir mai, sira sei hare housi kalohan sira Oan Mane hiit An mai ho kbiit no kmanek wa’in. ²⁷ Nia sei haruka anju sira atu halibur hamutuk sira nebe Nia fihir ona, housi lorosa’e no loromonu, tasi feto no tasi mane, housi rai ikun no rai ulun, to'o lalehan nia rohan."

Hanorin ida housi ai figueira

                ²⁸ hare ba ai figueira hanesan ilas ida. Wainhira nia sanak sai maran no dikin sira mosu, imi hatene katak bainloron to'o ona^{. 29} Nune’e mos, wainhira imi hare buat hirak ne'e mosu, hatene ba katak tempu to'o ona, besik ona iha odamatan. ³⁰ Tebes, Ha’u dehan ba imi, molok otas ne'e liu tiha, buat hotu ne'e mosu tiha ona. ³¹ Lalehan ho rai sei liu tiha, maibe Ha’u nia liafuan sei la lakon."

Ema ida la hatene loron eh oras

                ³² Kona ba loron eh oras, ema ida la hatene; anju sira mos iha lalehan no Oan Mane rasik la hatene. Aman deit mak hatene. ³³ Loke matan ba! Matan moris ba, hodi resa, basa imi la hatene wainhira tempu ne'e sei to'o mai. ³⁴ Buat ne'e, nudar ema la'o rai nebe husik nia uma hodi haraik kbiit ba atan sira, fahe knaar ba sira ida-ida no haruka ida nebe hein odamatan atu sai matan moris neon na'in. ³⁵ Ne’e duni, matan moris neon na’in ba, basa imi la hatene wainhira uma na'in sei mai: iha loraik, iha kalan fahe rua, iha rai hun mutin ka iha dader; ³⁶ atu wainhira nia teki-teki mai, nia la hetan imi dukur hela. ³⁷ Buat nebe Ha’u dehan ba imi, Ha’u dehan ba ema hotu: matan moris ba!"