14

Am’lulik boot buka atu oho Jesus

                ¹ Sei hela loron rua tan molok festa Paskua no Paun Azimo nian. Am’lulik boot sira no eskriba sira buka namanas atu lohi hodi kaer Jesus atu oho Nia. ² Sira dehan, "Iha festa laran la bele, keta povu halo funu hasouru ita."

Jesus iha Betania

                ³ Jesus hela iha Betania, iha Simao nebe moras lepra nia uma. Nia tur hela iha meja, feto ida lori mai botil alabastru ida nakonu ho mina morin nardu nian, nebe folin boot tebes. Nia fera botil ne'e hodi fui mina morin ba Jesus nia ulun. ⁴ Ema balun hirus hodi dehan  ba malu, "Tan sa halo aat leet mina morin ne'e? ⁵ Ita bele fa'an nia ba folin denariu atus tolu resin hodi fo ba ema kiak." Sira hateten aat feto ne'e. ⁶ Maibe Jesus dehan, "Husik nia ba! Tan sa imi halo terus nia? Nia halo buat diak ida mai Ha’u. ⁷ Kiak sira imi sei hetan nafatin; wainhira imi hakarak, imi bele halo diak ba sira. Maibe Ha’u, imi sei hetan bei-beik. ⁸ Nia halo buat nebe nia bele. Nia tau nanis mina morin ba Ha’u isin atu hadia nia ba rate. ⁹ Ha’u dehan los ba imi: iha mundu tomak, iha fatin naran deit nebe ema sei haklaken liafoun diak, sira sei haktuir buat nebe nia halo ne'e atu hanoin nia."

Judas hakotu lia atu saran Jesus

                ¹⁰ Sira sanulu resin rua ne'e ida, naran Judas  Iscariotes, ba koalia ho am’lulik boot sira atu saran Jesus ba sira. ¹¹ Rona tiha nia, sira haksolok hodi hakotu lia atu fo osan ba nia. Nia buka namanas tempu diak ida atu saran Nia.

Jesus halo han hemu Paskua nian ho Nia eskolante sira

                ¹² Iha loron uluk Paun fermentu laek nian, wainhira sira hasa'e buat karan Paskua nian, eskolante sira husu ba Jesus, “Ita hakarak katak ami hadia han hemu Paskua nian iha nebe los?” ¹³ Jesus haruka eskolante Na’i rua hodi dehan ba sira, “Imi ba sidade laran. Mane ida nebe lori be iha buli ida sei la'o hasouru imi. Imi tuir nia, no iha fatin nebe nia tama, imi husu ba uma na'in: ^{14 ’}Mestre husu: fatin nebe Ha’u atu halo han hemu Paskua nian hamutuk ho Ha’u nia eskolante sira iha los nebe?’ ¹⁵ Nia sei hatudu fatin luan ida iha andar leten nebe nahe no halo furak ona. Imi hadia sasan sira iha neba.” ¹⁶ Eskolante sira ba sidade.  Sira hetan buat hotu nudar Nia dehan ba sira. Sira hadia sasan hotu ba han hemu Paskua nian. ¹⁷ Wainhira kalan ona, Nia mai ho sira sanulu resin rua. ¹⁸ Wainhira sira tur iha meja no han dau-daun, Jesus dehan, “Ha’u fo hatene sai ba imi: imi sira ne'e ida sei saran Ha’u; ida nebe han hamutuk ho Ha’u.” ¹⁹ Sira hahu neon kraik. Ida-ida husu ba Nia, “Ha’u karik?” ²⁰ Jesus hatan ba sira, “Imi na'in sanulu resin rua ne'e, nia mak ida nebe tau liman hamutuk ho Ha’u iha bikan. ²¹ Oan Mane sei mate duni, nudar hakerek ona kona ba Nia, maibe susar ba ema nebe saran Oan Mane ne'e. Ema ne'e lalika moris karik diak liu.”

Han hemu Paskua nian

                ²² Sira han dau-daun, Jesus kaer paun, fo bensa hodi silu no fo ba Nia eskolante sira dehan, “Imi simu ba. Ne'e Ha’u nia isin.” ²³ Tuir mai, Nia foti kalis, fo agradese no fo ba sira. Sira hotu hemu. ²⁴ Jesus dehan ba sira, “Ne'e Ha’u nia ran, ran aliansa nian, nebe sei nakfakar tamba ema lubun boot. ²⁵ Ha’u dehan los ba imi: Ha’u sei la hemu tan housi uvas fuan to'o loron nebe Ha’u sei hemu tua foun iha Maromak nia reinu.”

Jesus fo hatene nanis katak Pedro sei heli lia

                ²⁶ Hananu tiha knananuk hahi nian ida, sira sa'e ba foho Oliveira nian. ²⁷ Jesus lia tun ba sira, “Imi hotu sei monu, basa hakerek nanis, ‘Ha’u sei hakanek bibi atan; bibi sira sei namkari.’ ²⁸ Maibe, moris hi’as tiha housi mate, Ha’u sei ba uluk imi iha Galileia.” ²⁹ Pedro hatan ba Nia, “Maski hot-hotu sei monu, Ha’u lae!” ³⁰ Jesus lia tun ba nia, “Ha’u dehan los ba o: iha kalan ne'e rasik, molok manu kokorek dala rua, o sei heli lia kona ba Ha’u dala tolu.” ³¹ Maibe Pedro dehan teni maka'as liu tan, “Maski Ha’u mate ho Ita, Ha’u sei la heli lia!” Eskolante sira seluk mos hateten hanesan ne'e.

Jesus resa iha Getsemane

                ³² Sira to'o tiha to'os ida naran Getsemane, Jesus lia tun ba eskolante sira, “Imi hela iha ne'e. Ha’u sei ba atu harohan.” ³³ Nia lori Pedro, Tiago no Joao hamutuk ho Nia. Nia hahu laran taridu, laran tauk. ³⁴ Nia dehan ba sira, “Ha’u laran susar to'o mate. Imi hela iha ne'e hodi matan moris neon na'in ba.” ³⁵ Hakat uitoan ba oin, Nia monu ba rai hodi harohan atu, bele karik, hadook tiha oras ne'e housi Nia. Nia dehan, ^{36 “}Abba, Aman, buat hotu bele deit ba Ita. Hadook tiha housi Ha’u kalis ida ne'e; maibe keta halo tuir buat nebe Ha’u hakarak, maibe buat nebe Ita hakarak.” ³⁷ Tuir mai, Nia fila hodi hetan sira toba hela. Nia lia tun ba Pedro, “O toba, Simao? O la bele hein oras ida deit?” ³⁸ Nia dehan ba sira, “Imi matan moris neon na'in ba hodi harohan atu imi la bele monu ba tentasaun. Espiritu hakarak tebes, maibe isin kbiit laek.” ³⁹ Nia hadook an fali atu harohan hodi dehan nafatin liafuan sira uluk nian. ⁴⁰ Nia fila fali hodi hetan sira toba hela, basa sira matan dukur tebes. Sira la hatene hatan buat ida ba Nia. ⁴¹ Wainhira Nia fila  ba dala tolu, Jesus dehan ba sira, “Ohin ne'e imi toba ona hodi hakmatek. Tempu to'o ona. Hare ba, Oan Mane ne'e ema atu saran ona ba ema maksalak sira nia liman. ⁴² Hamriik ba, ita la'o ona. Ema nebe sei saran Ha’u mai besik ona.”

Ema kaer Jesus

                ⁴³ Iha oras ne'e duni. Jesus sei koalia hela, Judas, sira na'in sanulu resin rua ne'e ida, mosu ho ema lubun boot nebe lori surik no ai-dona. Am’lulik boot sira, eskriba sira no katuas sira mak haruka sira mai. ⁴⁴ Ida nebe atu saran Nia fo sinal ida ba sira dehan, “Ida nebe Ha’u rei, Nia mak ne'e. Imi kaer Nia, lori Nia met-metin!” ⁴⁵ Nia to'o neba, nia hakbesik kedas Jesus hodi dehan ba Nia, “Mestre!” Nia rei Jesus. ⁴⁶ Sira tau liman ba Nia hodi kaer Nia. ⁴⁷ Sira nebe iha neba ida losu nia surik, hakanek am’lulik boot nia atan hodi tesi nia tilun. ⁴⁸ Jesus dehan ba sira, “Imi mai ho surik no ai-dona atu kaer Ha’u, hanesan fali hasouru na’okten ida? ⁴⁹ Loron loron Ha’u hela ho imi iha templu hodi hanorin, imi la kaer Ha’u, maibe ne'e atu halo tuir Eskritura.” ⁵⁰ Ne’e hotu tiha eskolante sira halai hotu no husik Nia mesak. ⁵¹ Mane klosan ida tuir Nia, taka deit ho lipa ida. Sira atu kaer nia. ⁵² Nia husik tiha lipa no halai isin tanan.

Jesus iha Sinedriu

⁵³ Sira lori Jesus ba am’lulik boot, no am'lulik boot sira hotu, katuas no eskriba sira halibur an hamutuk. ⁵⁴ Pedro tuir Nia housi dook to'o am’lulik boot nia uma. Nia tur hamutuk ho guarda sira hodi haneruk ahi. ⁵⁵ Am’lulik boot sira no Sinedriu tomak buka namanas sasin ida hasouru Jesus atu sira bele saran Nia ba mate, maibe, sira la hetan. ⁵⁶ Ema barak foti lia bosok hasouru Nia maibe sira nia lia sasin la tuir malu. ⁵⁷ Balun kesar Nia ho sasin bosok ida ne'e; ^{58 “}Ami rona Nia dehan 'Ha’u sei sobu Templu ne'e nebe ema mak halo, hafoin iha loron tolu nia laran, Ha’u sei harii fali ida seluk nebe la'os ema mak halo.” ⁵⁹ Maibe maski nune'e, sira nia lia sasin la tuir malu. ⁶⁰ Ne’e duni, am’lulik boot hamriik iha sira nia leet hodi husu Jesus, “O la hatan buat ida ba buat hotu nebe sira foti hasouru o?” ⁶¹ Maibe Nia nonok deit, la hatan buat ida. Am’lulik boot husu fali Nia dehan, “O Messias, Maromak diak nia Oan?” ⁶² Jesus hatan ba nia, “Ha’u duni. Imi sei hare Oan Mane tur iha Maromak kbiit na'in nia kuana, hodi mai ho kalohan lalehan nian.” ⁶³ Am’lulik boot hales nia unuk hodi dehan, “Tan sa ita sei presisa ema atu sasin hasouru Nia. ⁶⁴ Imi rona Nia hateten aat Maromak. Imi hanoin sa?” Sira hotu tesi lia katak Nia soi mate. ⁶⁵ Hafoin sira balun hahu tafui ba Nia, taka Nia oin ho hena dehan, "Si’ik took!" Guarda baku Nia.

Pedro heli lia kona ba Jesus

                ⁶⁶ Pedro hela iha liur iha uma oin. Am’lulik boot nia atan feto ida besik nia. ⁶⁷ Hare nia haneruk ahi, nia hateke ba nia hodi dehan, “O mos hamutuk ho Jesus Nazare!” ⁶⁸ Maibe nia heli lia dehan, “Ha’u la hatene buat nebe o hateten.” Nia sai ba liur no manu ida kokorek. ⁶⁹ Tuir mai nia hakat ba odamatan. Atan feto hare fali nia hodi hateten ba sira nebe iha neba, “Ida ne'e sira ida!” ⁷⁰ Maibe nia heli lia fali. La kleur ema sira nebe iha neba dehan ba Pedro, “Los duni, o sira nian ida, basa o ema Galileia.” ⁷¹ Maibe nia hahu hotar hodi jura, “Ha’u la hatene ema nebe imi dehan dau-daun ne'e!” ⁷² Dala ida tan manu kokorek. Pedro hanoin hetan liafuan nebe Jesus dehan nanis ba nia, “Molok manu kokorek dala rua, o sei heli lia kona ba Ha’u dala tolu.” Nia hahu tanis.