15

Jesus iha Pilatos nia oin

                ¹ Sei dadersan hela, am’lulik boot sira halibur katuas sira, eskriba sira no Sinedriu tomak. Sira futu Jesus, lori no saran Nia ba Pilatos. ² Pilatos husu ba Nia, “O ema Judeu sira nia liurai?” Nia hatan, “Hanesan o dehan.” ³ Am’lulik boot sira kesar buat oi-oin kona ba Nia. ⁴ Pilatos husu fali, “O la hatan buat ida? O hare took ba, sira kesar buat oi-oin kona ba O.” ⁵ Maibe Jesus la hatan buat ida. Ida ne'e halo Pilatos hakfodak. ⁶ Tuir lisan festa Paskua nian. Pilatos husik ema dadur ida nebe Judeu sira husu. ⁷ Iha ida naran Barrabas, nebe hela iha dadur laran hamutuk no ema sira seluk nebe halo revolusaun. Nia oho ema iha tempu neba. ⁸ Ema lubun ne'e husu Pilatos atu fo ba sira ema nebe sira husu tuir lisan. ⁹ Nia husu sira, “Imi hakarak katak Ha’u husik Judeu sira nia Liurai?” ¹⁰ Nia hatene katak am’lulik boot sira saran Nia tamba sira laran moras. ¹¹ Maibe am’lulik boot sira haka’as an atu halo ema lubun boot ne'e husu Pilatos atu husik Barrabas. ¹² Pilatos hahu koalia fali hodi husu sira, “Ne'e duni, Ha’u sei halo sa los ba ida nebe imi hanaran Judeu sira nia Liurai?” ¹³ Sira hakilar fali, “Hedi Nia ba krus!” ¹⁴ Pilatos husu ba sira, “Maibe Nia halo aat sa ida?” Sira hakilar liu tan, “Hedi Nia ba krus!” ¹⁵ Tan ne'e, Pilatos husik Barrabas atu fo ksolok ba sira. Nia haruka baku no hedi Jesus iha krus.

Soldadu sira hasara Jesus

                ¹⁶ Soldadu sira lori Nia ba pretoriu laran, hafoin, halibur tiha sira maluk hotu, ¹⁷ sira tau ba Nia hena mean ida. Sira leu ai-tarak, tau ba Nia ulun. ¹⁸ Tuir mai, sira kumprimenta Nia dehan, “Viva, liurai Judeu sira nian!” ¹⁹ Sira baku Nia ulun ho fafulu ida, tafui ba Nia, no hakneak iha Nia oin hodi hanai Nia. ²⁰ Hasara tiha Nia, sira hasai hena mean, tau fali Nia hatais. Sira lori Nia housi neba atu iha krus.

Sira hedi Jesus iha krus

                ²¹ Sira kaer ema ida naran Simao housi Sirene, Alexandre no Rufo nia aman, nebe fila dau-daun housi to'os, atu lori krus. ²² Sira lori Nia ba fatin ida naran Golgotha, katak, fatin ulun ruin nian. ²³ Sira hakarak fo tua kahur ho naan horun ba Nia, maibe Nia la hemu. ²⁴ Tuir mai, sira hedi Nia iha krus. Sira fahe Nia hatais ba malu hodi koko sorte atu hare ida-ida lori ida nebe. ²⁵ Sira hedi Nia ba krus iha tuku sia dader. ²⁶ Buat nebe sira hakerek atu hatudu  tansa Nia hetan kastigu mak: “Liurai Judeu sira nian.” ²⁷ Hamutuk no Nia, sira hedi mos ba krus na’okten na'in rua, ida iha sorin kuana, ida seluk iha Nia sorin karuk. ²⁸ Nune’e mak halo tuir Eskritura nebe dehan, “Ema sura Nia hamutuk ho ema aat sira.” ²⁹ Ema sira nebe liu housi neba  doko sira nia ulun hodi hateten aat Nia: “O sei sobu Maromak nia Templu, no harii fali nia iha loron tolu nia laran; ³⁰ soi  O nia An ba, hodi tun housi krus!” ³¹ Am’lulik boot sira no eskriba sira mos hasara Nia dehan, “Nia soi ema seluk: Nia rasik la bele soi an! ³² Messias, liurai Israel nian tun housi krus ba atu ami bele hare hodi fiar!” Sira na'in rua mos nebe hedi iha krus hamutuk ho Nia hasara Nia.

                ³³ Iha loron fahe rua, rai tomak sai nakukun, to'o tuku tolu loraik. ³⁴ Iha tuku tolu loraik, Jesus hakilar ho lia maka'as, “Eloi, Eloi. lama sabachtani?” katak, “Ha’u nia Maromak, Ha’u Nia Maromak, tansa Ita husik Ha’u?” ³⁵ Rona tiha ne'e, sira balun dehan, “Hare ba, Nia bolu Elias!” ³⁶ Sira ida halai hodi habokon hena iha tua sin, hafoin tau ba fafulu ida nia rohan, lolo ba Nia atu hemu hodi dehan, “Hein lai, ita hare Elias sei mai atu hatun Nia ka lae!” ³⁷ Jesus, hodi hakilar maka'as, iis kotu. ³⁸ Hena templu nian nakles housi leten to'o kraik, fahe rua. ³⁹ Senturiaun nebe iha krus nia oin, hare Nia iis kotu nune'e dehan, “Tebes, ema ne'e Maromak nia Oan duni!” ⁴⁰ Iha mos feto balun nebe tuir housi dook. Sira ne'e mak Maria Madalena, Maria, Tiago kiik no Jose nia inan, no Salome. ⁴¹ Sira la'o tuir Jesus hodi serbi Nia wainhira Nia hela iha Galileia. Iha mos seluk tan nebe sa'e hamutuk ho Nia ba Jerusalem.

Ema hakoi Jesus

⁴² Iha loraik, tamba loron ne'e loron atu hadia sasan nian, katak loron molok Sabadu, ⁴³ Jose Arimateia, membru Sinedriu ida ho naran boot, koalia ho Pilatos hodi husu Jesus nia isin mate. Jose ne’e mos hein Maromak nia reinu. ⁴⁴ Pilatos hakfodak katak Jesus mate ona. Nia bolu senturiaun ida hodi husu Jesus mate ona duni ka lae. ⁴⁵ Wainhira senturiaun fo hatene lo-los. Pilatos fo Jesus nia isin mate ba Jose. ⁴⁶ Jose sosa lensol ida. Nia hatun hodi falun Nia ho lensol ne’e, no hakoi Nia iha rate ida nebe ke’e tiha iha fatuk. Nia duir fatuk ida ba rate  nia odamatan. ⁴⁷ Maria Madalena, no Maria, Jose nia inan, hare katak sira hakoi duni Jesus iha neba.