16

Jesus moris hi’as

                ¹ Loron Sabadu liu tiha, Maria Madalena, Maria Tiago nian, no Salome sosa mina morin atu tau ba Jesus. ² Iha loron uluk semana nian, foin dadersan hela, loron foin sa'e, sira la'o ba rate. ³ Sira dehan ba malu, “Se mak sei duir fatuk housi rate nia odamatan?” ⁴ Maibe wainhira sira ba hare, sira hetan katak fatuk ne'e duir tiha ona. Fatuk ne'e boot tebes. ⁵ Sira tama iha rate laran no hare mane foinsa’e ida ho hatais mutin, tur iha sorin kuana. Sira hakfodak. ⁶ Nia dehan ba sira, “Imi keta tauk. Imi buka Jesus Nazare nebe mate iha krus? Nia moris hi’as ona; Nia la iha ne'e. Fatin nebe sira tau Nia iha neba. ⁷ Maibe imi la'o ba, fo hatene ba Nia eskolante sira no ba Pedro katak Nia sei ba uluk liu imi iha Galileia. Iha neba imi sei hare Nia nudar Nia dehan nanis ba imi.” ⁸ Sira halai housi rate, nakdedar no tauk teb-tebes. Sira la dehan ba ema ida tamba sira tauk.

Jesus mosu ba Maria Madalena

                ⁹ Moris hi’as tiha ona iha dader loron uluk semana nian, Jesus mosu uluk knanain ba Maria Madalena, ida housi nebe Nia duni sai diabu na'in hitu. ¹⁰ Tuir mai, feto ne'e ba sira nebe la'o hamutuk ho Nia. Sira ne'e laran nakraik hodi tanis. Nia fo hatene ba sira. ¹¹ Sira la fiar wainhira nia dehan katak Jesus moris ona no nia hare Nia.

Jesus mosu ba Nia eskolante sira

                ¹² Ne’e hotu tiha, Jesus mosu mos ho oin seluk ba ema na'in rua nebe la'o dau-daun ba knua ida. ¹³ Sira ne'e fo hatene ba sira seluk, maibe sira la fiar sira ne'e. 

Jesus mosu ba eskolante sanulu resin ida

                ¹⁴ Ikus mai, sira sanulu resin ida tur dau-daun iha meja. Nia mosu ba sira hodi si’ak tamba sira fiar laek no ulun fatuk tos, basa sira la fiar sira nebe hare Nia moris hi’as ona. ¹⁵ Nia dehan ba sira, “Imi ba mundu tomak, haklaken liafuan diak ba ema hot-hotu. ¹⁶ Ema nebe fiar no simu baptismu sei hetan maksoin; maibe ema nebe la fiar sei hetan kastigu. ¹⁷ Sinal sira nebe sei hela ho sira nebe fiar mak ne'e: hodi Ha’u nia naran, sira sei duni sai diabu sira; sira sei koalia lia mesak foun; ¹⁸ sira sei kaer samea sira; sira hemu karik buat moruk no lanuk ruma, sira sei la hetan susar ida. Sira sei tau liman ba ema moras, no sira ne'e sei hetan isin diak fali.

Jesus sa'e ba lalehan

                ¹⁹ Ne’e hotu tiha, Na’i Jesus sa'e ba lalehan hodi hatodan An iha Aman Maromak nia kuana. ²⁰ Hafoin sira sai hodi haklaken liafuan diak iha fatin hot-hotu. Na’i fo tulun ba sira no hametin sira nia liafuan ho milagre oi-oin.