2

Jesus nia moris

¹ Iha loron hirak neba Cesar Augusto fo sai ukunfuan ida, hodi haruka ema iha mundu tomak atu ba tau naran. ² Ukunfuan ne’e mak sira hala’o ba dala uluk wainhira Quirino mak emboot iha rai Siria. ³ Ema ida-ida ba tau naran iha nia sidade rasik. ⁴ Tan Jose mai housi David nia uma-kain, nia mos husik sidade Nazare iha Galileia, hodi sa’e ba Judeia, ba David nia sidade naran Belem, ⁵ atu tau naran ho nia kaben Maria, nebe besik atu tur ahi. ⁶ Wainhira sira sei iha neba, Maria nia loron atu tur ahi to’o dau-daun. ⁷ Nia tur ahi nia oan mane boot, hodi haneras no hatoba nia iha balada han fatin, basa la iha fatin oan ida ba sira iha uma laran.

⁸ Iha fatin neba iha bibi atan balun, nebe kalan kalan hein sira nia bibi iha rai luan. ⁹ Na’i nia anju mosu ba sira. Maromak nia gloria nabilan iha sira leet. Sira hakfodak teb-tebes. ¹⁰ Tuir mai anju dehan ba sira: “Imi keta tauk, basa ha’u lori liafoun diak ida ba imi, nebe sei haksolok mos povu tomak: ¹¹ ohin iha David nia sidade foin moris ba imi Maksoin ida, katak Kristu Na’i. ¹² Sinal atu imi hetan Nia mak ne’e: imi sei hetan kosok oan ida haneras no toba iha balada han fatin.” ¹³ Teki-teki halibur hamutuk ho anju ne’e anju lubun boot ida nebe hahi Maromak, dehan: ¹⁴ “Gloria ba Maromak iha leten aas, dame iha raiklaran ba ema sira nebe Nia hadomi!” ¹⁵ Wainhira anju sira fila ba lalehan, bibi atan sira hateten ba malu: “Ita la’o to’ok ba Belem, hodi hare buat nebe mosu, nebe Na’i fo sai mai ita.” ¹⁶ Sira ba halai, hodi hetan duni Maria, Jose no Kosok Oan hatoba hela iha balada han fatin. ¹⁷ Hare tiha Nia, sira haktuir buat nebe anju sira hateten kona ba kiik oan ne’e. ¹⁸ Ema hotu nebe rona bibi atan sira hakfodak ho sira nia liafuan. ¹⁹ Maria fali rai hela liafuan hirak ne’e hotu, hodi hanoin di-diak iha nia laran. ²⁰ Bibi atan sira fila ba uma hodi hahi hawelok Maromak tan buat hotu nebe sira hare no rona, nudar anju sira fo hatene nanis.

²¹ Liu loron ualu, wainhira labarik atu simu sirkunsisaun, sira hanaran Nia Jesus, nudar anju fo hatene molok nia inan ko’us.

Jesus nia aman sira lori Nia ba templu

                ²² Liu tiha tempu hamos an nian, tuir Moises nia ukunfuan, sira lori labarik ba Jerusalem atu saran Nia ba Na’i, ²³ nudar hakerek iha Na’i nia ukunfuan, katak “Oan mane boot hotu sei saran ba Na’i.” ²⁴ no mos atu hasa’e, nudar karan, manu falur rua eh manu pombu oan rua, nudar Na’i nia ukunfuan haruka. ²⁵ Iha Jerusalem moris ema ida naran Simeao. Nia ema los nebe hamtauk Maromak; nia hein Israel nia ksolok, no Espiritu Santu horik ho nia. ²⁶ Nia simu lia housi Espiritu Santu katak nia sei la mate molok nia hare Na’i nia Kristu. ²⁷ Tuir Espiritu nia kbiit nia mai iha templu. Wainhira nia aman sira lori Jesus atu halo tuir ukunfuan, ²⁸ nia simu Kosok Oan iha nia liman, hodi hahi Maromak, dehan:

Simeao nia knananuk

²⁹  “Na’i, oras ne’e Ita Boot bele husik ona

    Ita atan ba ho dame, tuir Ita nia liafuan;

³⁰ basa ha’u nia matan hare ona Maksoin

    nebe Ita Boot hadia ba povu hot-hotu:

³² naroman atu leno gentiu sira

    no povu Israel nia gloria.”

                ³³ Labarik nia aman inan sira hakfodak ho buat nebe nia dehan kona ba Nia. ³⁴ Simeão fo bensa ba sira, hodi dehan ba nia inan Maria: “Hare ba, labarik ne’e mosu mai atu hatun no foti ema barak iha Israel, no mos atu sai sinal ida nebe halo ema nia lia la tuir malu; ³⁵ no surik ida sei sona borus ita nia fuan, atu fo sai buat nebe ema barak hanoin iha sira nia laran.”

                ³⁶ Iha mos feto duina ida, naran Ana, Fanuel housi suku Aser nia oan. Nia otas boot ona. Liu tiha nia tempu fetoran nian, nia kaben tinan hitu; ³⁷ hafoin nia moris nudar feto faluk to’o nia tinan ualu nulu resin haat. Nia la husik templu, maibe serbi Maromak kalan loron, hodi halo jejum no hamulak. ³⁸ Iha oras neba nia mai hodi hahi Na’i no koalia kona ba Labarik ne’e ba sira hotu nebe hein Israel nia maksoin.

³⁹ Halo tuir tiha buat hotu nebe Na’i nia ukunfuan haruka, sira fila fali ba Galileia, ba sira nia sidade iha Nazare. ⁴⁰ Labarik oan mos sai boot ba dau-daun no maka’as liu tan, hakonu ho matenek, no Maromak nia grasa hela hamutuk ho Nia.

Jesus iha templu

                ⁴¹ Tinan tinan Jesus nia inan aman sira ba Jerusalem iha festa Paskua. ⁴² Wainhira Nia halo tinan sanulu resin rua, sira sa’e ba Jerusalem, tuir lisan festa nian. ⁴³ Festa hotu tiha, sira fila hikas ba uma, maibe Jesus hela iha Jerusalem; nia aman sira la hatene. ⁴⁴ Sira hanoin katak Nia la’o ho maluk sira. La’o tiha loron ida, mak sira buka Nia iha parenti no maluk sira leet. ⁴⁵ Tan la hetan Nia, sira fila fali ba Jerusalem hodi buka Nia. ⁴⁶ Liu tiha loron tolu, sira hetan fali Nia iha templu, tur hela iha ema matenek sira leet, hodi rona no husu sira. ⁴⁷ Ema hotu nebe rona Nia hakfodak ho nia matenek no nia liafuan. ⁴⁸ Hare tiha Nia, nia aman sira hakfodak teb-tebes. Nia inan hateten ba Nia: “Ha’u oan, tansa O halo nune’e mai ami? O nia aman ho ha’u neon susar teb-tebes hodi buka O.” ⁴⁹ Nia dehan ba sira: “Tansa imi buka Ha’u? Imi la hatene katak Ha’u sei hela iha Ha’u Aman nia uma?” ⁵⁰ Maibe sira la komprende lia hirak ne’e katak sa. ⁵¹ Jesus tun fali hamutuk ho sira ba Nazare, hodi halo tuir sira nia hakarak. ⁵² Nia inan rai lia hirak ne’e hotu iha nia laran. No Jesus sai boot ba dau-daun iha otas, matenek no kmanek, iha Maromak no ema sira oin.