3

Joao Baptista nudar manu-ain

¹ Iha tinan sanulu resin lima liurai boot Tiberio nia ukun nian, wainhira Poncio Pilatos mak emboot iha rai Judeia, Herodes liurai iha rai Galileia; Filipe, Herodes nia alin, liurai iha Itureia no Trakonitide, no Lisanias liurai iha rai Abilene; ² wainhira Anas ho Caifas mak hala’o knaar am’lulik boot nian, Na’i Maromak nia lia tun ba Joao, Zacarias nia oan, iha rai fuik maran. ³ Joao la’o lemo rai besik mota Jordao nian, hodi haklaken ba ema hotu baptismu atu hakribi sala hodi hetan perdua, ⁴ nudar hakerek ona iha livru profeta Isaias nian, dehan:

“Lia ida hakilar iha rai fuik maran:

‘Hadia Na’i nia dalan!

Halos Na’i nia dalan inuk!

⁵ Taka tiha rai klean hotu!

Hatun foho tomak, aas no badak!

Halos dalan kleuk!

Halo kaber dalan aat hotu!

⁶ No ema tomak sei hare Maromak nia maksoin!’”

⁷ Ne’e duni, nia dehan ba ema lubun boot nebe mai atu simu baptismu housi nia: “Imi ema aat sira! Se mak hanorin imi atu halai housi hirus boot nebe atu mai dau-daun? ⁸ Imi buka hatudu ho hahalok katak imi hakribi duni imi nia sala. Keta hahu hateten ba imi an rasik: “Abraao mak ami nia aman”; basa ha’u dehan ba imi katak housi fatuk sira ne’e Maromak bele fo oan sira ba Abraao. ⁹ Ohin kedas baliun iha ona ai-abut sira. Tan ne’e, ai-hun nebe la fo fuan sei tesi tiha hodi soe ba ahi.”

¹⁰ Ema lubun boot husu ba nia: “Ami sei halo sa los?” Nia hatan: ¹¹  “Ema nebe iha hatais tahan rua, fahe ho maluk nebe la iha; no ema nebe iha ai-han, halo mos nune’e.” ¹² Publikanu sira mos mai atu simu baptismu. Sira husu ba Nia: “Mestre, ami sei halo sa los?” ¹³ Nia hatan ba sira: “Imi keta husu impostu liu ida nebe estadu haruka.” ¹⁴ Soldadu sira mos husu ba nia: “Be, ami sei halo sa los?” Nia hatan: “Keta hanehan ema, keta duu matak ema, simu deit ho laran imi nia kolen.” ¹⁵ Tan povu hein namanas, sira hanoin iha sira nia laran katak Joao mak Messias. ¹⁶ Joao hatan ba sira dehan: “Ha’u sarani imi ho be, maibe Ida nebe maka’as liu ha’u atu to’o mai ona. Ha’u la soi atu kore nia sapatu tali. Nia sei sarani imi ho Espiritu Santu no ahi. ¹⁷ Nia kaer ona lafatik atu saar halo mos nia klobur, hodi halot nia hare iha hoka: maibe hare kain nia sei sunu tiha iha ahi nebe la mate mohu!”

¹⁸ Ho lia hirak ne’e no lia seluk tan, Joao haklaken liafoun diak ba povu. ¹⁹ Maibe liurai Herodes nebe Joao haksi’ak tamba hola Herodiade, nia alin nia kaben, no mos tamba buat aat seluk nebe nia halo, ²⁰ hawain liu tan nia hahalok aat sira hodi hatama Joao iha dadur laran.

Jesus simu baptismu

                ²¹ Loron ida, wainhira ema hotu simu ona baptismu no Jesus rasik simu tiha baptismu  no sei harohan dau-daun, lalehan nakloke. ²² Espiritu Santu tun ba Nia iha manu falur nia ilas. Lia ida tun housi lalehan, dehan: “O mak Ha’u nia Oan doben nebe Ha’u hadomi teb-tebes.”

Jesus nia bei-ala sira

                ²³ Wainhira Jesus hahu hanorin, Nia besik tinan tolu nulu. (Ema hotu hanoin katak) Nia mak Jose nia oan; Heli nia oan; ²⁴ Matat nia oan; Levi nia oan, Melqui nia oan, Janel nia oan, Jose nia oan, ²⁵ Matatias nia oan, Amos nia oan, Naum nia oan, Esli nia oan, Nagai nia oan, ²⁶ Maat nia oan, Matatias nia oan, Semeim nia oan, Josech nia oan, Juda nia oan, ²⁷ Joana nia oan, Resa nia oan, Zorobabel nia oan, Salatiel nia oan, Neri nia oan, ²⁸ Melqui nia oan, Adi nia oan, Cosao nia oan, Elmadao nia oan, Er nia oan, ²⁹ Jesus nia oan, Eliezer nia oan, Jorim nia oan, Mata nia oan, Levi nia oan, ³⁰ Simeao nia oan, Juda nia oan, Jose nia oan, Jonao nia oan, Eliacim nia oan, ³¹ Melea nia oan, Mena nia oan, Matata nia oan, Natao nia oan, David nia oan, ³² Jesse nia oan, Jobed nia oan, Booz nia oan, Sala nia oan, Naassao nia oan, ³³ Aminadab nia oan, Admin nia oan, Arni nia oan, Esrao nia oan, Fares nia oan, Juda nia oan, ³⁴ Jacob nia oan, Isaac nia oan, Abraao nia oan, Tara nia oan, Nacor nia oan, ³⁵ Seruch nia oan, Ragau nia oan, Falec nia oan, Eber nia oan, Sala nia oan, ³⁶ Cainao nia oan, Arfaxad nia oan, Sem nia oan, Noe nia oan, Lamech nia oan, ³⁷ Matusalem nia oan, Enoch nia oan, Jaret nia oan, Maleleel nia oan, Cainao nia oan, ³⁸ Enos nia oan, Set nia oan, Adao nia oan, Maromak nia oan.