1 Nakonu ho Espiritu Santu, Jesus husik
Jordao. Espiritu lori Nia ba rai fuik maran. 2 Iha
neba Nia horik iha loron haat nulu laran. Diabu babeur Nia. Iha loron hirak
neba Nia la han buat ida. 3 Diabu dehan ba Nia: “O
Maromak nia Oan duni karik, dehan to’ok ba fatuk sira ne’e atu nakfila ba
paun.” 4 Maibe Jesus hatan: “Eskritura dehan: ‘Ema
la moris ho ai-han deit.’” 5 Liu tiha ne’e, diabu
lori Nia ba foho aas ida, hodi hatudu ba Nia iha tempu ida deit reinu hot-hotu
raiklaran nian, 6 hodi dehan ba Nia: “Ha’u sei fo
ba O kbiit no gloria tomak ne’e, basa buat ne’e hotu saran tiha ona mai ha’u
atu fo ba ida nebe ha’u hakarak. 7 Ne’e duni, O
adora ha’u karik, buat sira ne’e hotu O nian.” 8 Maibe
Jesus hatan ba nia: “Eskritura dehan: ‘O sei adora Na’i, o nia Maromak; Nia
mesak deit mak o sei serbi!’” 9 Tuir mai, lori tiha
Jesus ba Jerusalem hodi halo Nia hamriik iha templu nia tutun, diabu hateten ba
Nia: “O Maromak nia Oan karik, soe O An housi ne’e ba kraik, 10
basa hakerek nanis ona: ‘Nia sei haruka nia anju sira atu tau matan ba
O’; no mos: 11 ‘Sira sei lori O iha sira nia liman
atu O nia ain la bele sidi iha fatuk ida.’” 12 Maibe
Jesus hatan ba nia: “Hakerek tiha ona mos katak: ‘O sei la babeur Na’i, o nia
Maromak!’” 13 Koko tiha dalan oi-oin atu babeur
Jesus, diabu husik Nia to’o loron seluk.
14
Nakonu ho Espiritu Santu nia kbiit, Jesus fila fali ba Galileia; nia
naran sai boot iha rai tomak. 15 Nia hanorin iha
sinagoga hotu; ema hot-hotu hahi Nia.
16
Nia mai iha Nazare, iha nebe Nia sai boot. Hanesan Nia halo fila fila,
Nia tama iha sinagoga iha loron Sabadu. Nia hamriik atu lee. 17
Sira fo ba Nia livru profeta Isaias nian. Loke tiha, Nia hetan fatin ida
nebe hakerek nune’e:
18 “Na’i nia
Espiritu iha Ha’u basa Nia kose tiha Ha’u ho mina
atu
haklaken Liafoun Diak ba kiak sira;
19 Nia haruka Ha’u atu haklaken maksoin ba dadur sira
no halo
matan delek sira hare; atu soi sira nebe ema hanehan,
hodi
haklaken Na’i nia tinan rahun kmanek nian.”
20 Hafoin, taka tiha livru, Jesus fo ba ema
nebe hala’o knaar. Nia tur tiha. Ema hot-hotu iha sinagoga hateke ba Nia. 21
Tuir mai, Nia hahu koalia ba sira, dehan: “Ohin halo tuir los duni
liafuan Eskritura nian nebe imi foin rona.” 22 Sira
hotu hahi Nia; hodi hakfodak tan liafuan kmook nebe sai housi nia ibun. 23
Sira dehan: “Ida ne’e la’os Jose nia oan?” Nia hatan ba sira: “Imi kala
sei hateten mai Ha’u: ‘Doutor, bali o nia isin rasik. Buat hotu nebe ami rona
katak o halo iha Kafarnaum, halo mos iha ne’e, iha o nia rai.’” 24
Nia dehan teni ba sira: “Tebes, Ha’u dehan ba imi katak ema la simu
profeta ida iha nia rai rasik. 25 Ha’u dehan lo-los
ba imi: iha Elias nia loron, iha feto faluk barak iha Israel, wainhira lalehan
taka metin ba tinan tolu no fulan neen nia laran; rai tomak hamlaha boot; 26
maibe Maromak la haruka Elias ba feto faluk sira ne’e ida, Nia haruka
deit ba feto faluk iha Sarepta, iha rai Sidon. 27 Iha
Eliseu nia loron mos iha ema moras lepra barak iha Israel, maibe sira ida deit
mak hetan isin diak, katak Naaman housi rai Siria.” 28 Rona
tiha liafuan hirak ne’e, ema hotu iha sinagoga laran nakali teb-tebes. 29
Sira hamriik hodi duni sai Nia housi sidade; hafoin sira lori Nia to’o
rai tatinis iha foho leten, iha nebe sira nia sidade harii hela, atu soe tun
Nia housi neba. 30 Maibe Jesus liu housi sira leet,
la’o tuir nia dalan.
31
Nia tun ba Kafarnaum, sidade Galileia nian; iha neba Nia hanorin sira iha
loron Sabadu. 32 Ema hakfodak ho nia doutrina, basa
Nia koalia ho kbiit wa’in.
33 Iha sinagoga, ema ida ho espiritu foer
hakilar ho lia maka’as, dehan: 34 “Jesus Nazare, O hakarak halo sa ida mai ami?
O mai atu halo aat ami? Ha’u hatene O se los: Maromak nia santu!” 35
Jesus si’ak nia, dehan: “Nonok! Sai tiha housi nia!” Soe tiha ema ne’e ba
rai iha sira hotu nia oin, diabu sai housi nia, la halo aat ida ba nia. 36
Sira hotu hakfodak no tauk, hodi hateten ba malu: “Liafuan ne’e sa los? Nia
haruka ho kbiit wa’in espiritu foer sira no sira sai duni!” 37
Jesus Nia naran boot habelar iha fatin hot-hotu iha rai neba.
38 Husik tiha sinagoga, Jesus ba Simao nia uma.
Simao nia banin feto moras boot isin manas. Sira husu Jesus atu tulun nia. 39
Hakru’uk tiha ba nia, Jesus haruka isin manas, nebe sai kedas housi nia.
Hafoin nia hamriik hodi serbi sira.
40 Wainhira loron atu monu ona, sira hotu nebe
iha parenti sira ho moras oi-oin lori sira ba Jesus. Nia tau nia liman ba sira
ida-ida, hodi fo isin diak ba sira. 41 Diabu sira
sai housi ema barak, hodi hakilar: “O Maromak nia Oan Mane!” Maibe Nia si’ak
sira atu la bele koalia, basa sira hatene katak Nia mak Messias. 42
Iha dadersan, Nia sai hodi ba fatin fuik ida. Ema lubun boot buka Nia.
Hetan tiha Nia, sira hakarak katak Nia la bele husik sira. 43
Maibe nia dehan ba sira: “Ha’u sei haklaken mos liafoun diak Maromak nia
reinu nian ba rai selu-seluk; tan ne’e mak Ha’u mai.” 44 Ne’e
duni, Nia la’o ba oin hodi hanorin iha sinagoga sira rai Judeia nian.
|