6

Silu batar iha loron Sabadu

¹ Iha loron Sabadu ida, wainhira Jesus la’o housi to’os batar nian, nia eskolante sira silu no behu batar iha sira nia liman atu han. ² Fariseu sira dehan: “Tansa imi halo buat nebe bandu iha loron Sabadu?” ³ Jesus hatan ba sira: “Imi la lee buat nebe David halo wainhira nia ho nia maluk sira hamlaha, ⁴ katak nia tama iha Maromak nia Uma, hola paun sakrifisiu nian hodi han no fahe ba sira, paun nebe am’lulik sira deit mak bele han?” ⁵ Nia dehan tan ba sira: “Oan Mane mak Sabadu nia Na’i.”

Jesus fo isin diak ba ema moras ida iha loron Sabadu

                ⁶ Iha loron Sabadu seluk Nia tama iha sinagoga hodi hahu hanorin. Iha neba iha ema ida ho liman los mate. ⁷ Eskriba no fariseu sira hateke hela ba Nia atu hare Nia sei fo isin diak iha loron Sabadu ka lae, atu nune’e sira bele hetan lia ruma hasouru Nia. ⁸ Maibe, tan hatene sira nia hanoin, Nia dehan ba ema liman mate ne’e: “Hamriik ba, mai iha klaran!” Nia mai hamriik duni. ⁹ Tuir mai Jesus dehan ba sira: “Ha’u husu imi: buat sa mak ema bele halo iha loron Sabadu, halo diak eh halo aat, soi ema nia moris ka halo aat nia?” ¹⁰ Hafoin, hateke hale’u ba sira hotu, Nia dehan ba ema ne’e: “Lolo o nia liman ba!” Nia lolo duni, nia liman sai diak fali. ¹¹ Sira laran nakali, hodi koalia ba malu atu halo oin sa los ho Jesus.

Jesus fihir eskolante na’in sanulu resin rua

                ¹² Iha loron hirak neba Nia sa’e ba foho atu harohan; kalan tomak Nia harohan ba Maromak. ¹³ Iha dader, Nia bolu nia eskolante sira, hodi fihir housi sira leet na’in sanulu resin rua nebe Nia hanaran ‘apostolu’ ¹⁴ Simao, nebe Nia hanaran Pedro, ho nia alin Andre; Tiago, Joao, Filipe ho Bartolomeu; ¹⁵ Mateus, Tome; Tiago, Alfeu nia oan; Simao nebe hanaran Zeloso; ¹⁶ Judas, Tiago nia oan, no Judas Iscariotes nebe sei saran Nia ba mate.

Ema lubun boot tuir Jesus

                ¹⁷ Tun tiha hamutuk ho sira, Jesus para iha rai tetuk ida. Iha neba eskolante barak ho tan ema lubun boot housi rai Judeia tomak, housi Jerusalem no housi tasi ibun Tiro no Sidon nian, ¹⁸ sira mai atu rona Nia no mos atu hetan isin diak housi sira nia moras. ¹⁹ Sira hotu buka atu kona nia, basa kbiit sai housi Nia hodi fo isin diak ba sira hotu.

Lia rahun diak nian

²⁰ Foti tiha matan ba nia eskolante sira, nia dehan: “Rahun diak ba imi sira nebe kiak, basa Maromak nia reinu imi nian. ²¹ Rahun ba imi sira nebe oras ne’e hamlaha, basa imi sei han to’o bosu.     Rahun diak ba imi nebe ohin loron tanis, basa imi sei hamnasa. ²² Rahun diak ba imi, wainhira ema rai hirus hasouru imi, wainhira ema duni sai imi, tolok imi, hewai imi nia naran hanesan buat aat, tan deit Oan Mane. ²³ Iha loron neba imi haksolok ba, basa imi nia kolen wa’in tebes iha lalehan. Nune’e mak sira nia aman sira halo ba profeta sira. ²⁴ Maibe susar ba imi nebe riku, basa imi hetan ona imi nia ksolok. ²⁵ Susar ba imi nebe han to’o bosu, basa imi sei hamlaha. ²⁶ Susar ba imi, wainhira ema hotu hahi imi, basa imi nia bei-ala sira halo mos nune’e ba profeta falsu sira.”

Hadomi funubalun sira

                ²⁷ “Ha’u dehan ba imi sira nebe rona dau-daun: hadomi imi nia funubalun sira, halo diak ba sira nebe hirus imi;  ²⁸ fo bensa ba sira nebe fo malisan ba imi, harohan ba sira nebe hasara imi;  ²⁹ ba ida nebe basa o nia hasan ida, fo tan o nia hasan seluk; ba ida nebe hadau o nia unuk, fo tan o nia hatais; ³⁰ ba ida nebe husu buat ruma, fo ba; ba ida nebe hola o nia sasan sira, keta husu fali. ³¹ Buat nebe imi hakarak ema halo ba imi, halo mos nune’e ba sira. ³² Imi hadomi karik sira nebe hadomi imi, imi halo diak ida nebe? Ema maksalak sira mos hadomi sira nebe hadomi sira. ³³ Imi halo deit diak karik ba sira nebe halo diak ba imi, imi nia diak ida nebe? Ema maksalak sira mos halo nune’e. ³⁴ Imi impresta deit karik ba ema nebe bele fo fali, imi halo diak ida nebe? Ema maksalak sira mos impresta sira nia rikusoi, hodi hein atu simu fali nia folin. ³⁵ Maibe imi hadomi imi nia funubalun sira; halo diak no impresta hodi la hein atu simu buat ida. Nune’e imi nia kolen sei sai boot teb-tebes: imi sei sai Na’i aas liu hotu nia oan, basa Nia laran diak ba ema aat no ema laran makerek sira.

Laran luak

³⁶ Imi buka sai ema laran luak hanesan imi nia Aman laran luak.  ³⁷ Imi keta hanoin aat ema, no ema sei la hanoin aat imi; imi keta duu matak ema, no ema sei la duu matak imi. Imi fo perdua, no imi sei hetan perdua. ³⁸ Imi fo, no imi sei simu; ema sei tau ba imi nia liman buat diak barak to’o naresin. Basa imi halo oin sa ba ema, nune’e mos ema sei halo ba imi.”

Hare uluk o nia an

³⁹ Nia dehan tan ba sira aiknanoik ida ne’e: “Ema matan delek ida bele hatudu dalan ba ema matan delek seluk? Sira na’in rua la monu hotu iha kuak laran? ⁴⁰ Eskolante ida la bele sai boot liu fali nia mestre, basa eskolante diak sei halo hanesan nia mestre. ⁴¹ Tansa o hare ai-rahun ida iha o nia maluk nia matan, maibe la hare ai-kabelak iha o nia matan rasik? ⁴² Oin sa o bele dehan ba o nia alin: ‘Alin, husik ha’u hasai ai-rahun housi o nia matan, wainhira o la bele hare ai-kabelak iha o nia matan rasik? Laran makerek! Hasai uluk lai ai-kabelak housi o nia matan, hafoin o sei bele hare mo-mos atu hasai ai-rahun housi o nia alin nia matan.”

                ⁴³ “La iha ai-hun diak nebe fo fali fuan aat, eh ai-hun aat nebe fo fuan diak. ⁴⁴ Ema bele hatene ai-hun ida-ida housi nia fuan: ema la ku’u ai figueira nia fuan housi ai-tarak sira, eh uvas fuan housi ai-fuik. ⁴⁵ Ema diak hasai buat diak housi nia laran diak, ema aat hasai buat aat housi nia laran aat. Ema nia ibun koalia housi buat nebe hakonu nia fuan.”

Eskolante los

                ⁴⁶ “Tansa imi bolu ha’u ‘Na’i, Na’i’, maibe la halo tuir buat nebe Ha’u hateten? ⁴⁷ Ema nebe mai besik Ha’u no rona hodi halo tuir ha’u nia liafuan, Ha’u sei hatudu ba imi ema ne’e hanesan sa los? ⁴⁸ Nia hanesan ema nebe harii uma ida: nia ke’e klean, hodi tau nia hun iha fatuk leten; wainhira mota sai boot, be baku hasouru uma ne’e, maibe la bele sobu, basa harii tiha iha fatuk leten. ⁴⁹ Maibe ida ne’e rona hodi la halo tuir, nia hanesan ema nebe harii tiha uma ida iha rai henek leten, hun metin la iha. Wainhira mota sai boot no be baku hasouru nia, uma ne’e monu kedas, sobu rahun aat liu.”