1 Hanorin tiha povu sira, Nia tama iha
Kafarnaum. 2 Senturiaun ida nia atan moras todan,
besik atu mate. Senturiaun ne’e hadomi teb-tebes nia atan ne’e. 3
Rona tiha kona ba Jesus, nia haruka katuas Judeu sira nian atu husu Nia
mai fo isin diak ba nia atan ne’e. 4 To’o tiha ba
Jesus, sira husu namanas ba Nia, dehan: “Nia soi atu Ita haraik buat ne’e ba
nia, 5 basa nia hadomi ita nia povu; nia rasik
harii ita nia sinagoga.” 6 Jesus ba hamutuk ho
sira. Wainhira sira besik ona uma, senturiaun haruka nia belun sira atu hateten
ba Nia: “Na’i, keta hakole an, 7 basa ha’u la soi
atu Ita tama iha ha’u nia uma. Tan ne’e mak ha’u la berani atu mai hasouru Ita.
Dehan to’ok liafuan ida, no ha’u atan sei hetan isin diak. 8
Basa ha’u, nebe halo tuir ema boot liu ha’u, iha mos soldadu sira nebe
halo tuir ha’u. Ha’u dehan ba ida ‘Ba,’ nia ba; ba ida seluk, ‘Mai,’ nia mai;
ba ha’u nia atan ‘Halo ne’e’, nia halo.” 9 Rona
tiha liafuan hirak ne’e, Jesus hakfodak, hodi fila oin ba ema lubun boot nebe
tuir Nia, dehan: “Tebes, Ha’u dehan ba imi katak iha Israel mos ha’u la hetan
fiar hanesan ne’e.” 10 Wainhira manu-ain sira to’o
uma, sira hetan atan diak fali ona.
11
Tuir mai Nia ba sidade ida naran Naim. Nia eskolante sira no ema lubun
boot tuir Nia. 12 Wainhira Nia besik ona sidade nia
odamatan, ema lori atu hakoi foinsa’e ida, nebe feto faluk ida nia oan mane
mesak. Ema barak housi sidade ba hamutuk ho feto ne’e. 13
Hare tiha nia, Na’i hanoin nia ho laran, dehan: “Keta tanis!” 14
Nia hakbesik, hodi kona kaisaun. Sira nebe lori nia para tiha. Hafoin nia
dehan: “Klosan, Ha’u dehan ba o, hamriik ba!” 15 Ema
mate ne’e hader tiha, hodi tur no hahu koalia. Jesus saran nia ba nia inan. 16
Ema hotu hakfodak hodi hahi Na’i Maromak, dehan: “Profeta ida mosu tiha
iha ita nia leet; Maromak mai hare tiha nia povu!” 17 Lia
kona ba Nia naklekar ba Judeia tomak no ba rai hot-hotu besik neba.
18
Joao nia eskolante sira fo hatene ba nia buat hirak ne’e. Bolu tiha nia
eskolante rua,19 Joao haruka sira ba Na’i atu husu:
“Ita mak ida nebe atu mai, ka ami sei hein ema seluk?” 20
To’o tiha ba Nia, sira ne’e dehan: “Joao Baptista haruka ami ba Ita atu
husu: ‘Ita mak ida nebe atu mai, ka ami sei hein ema seluk?’” 21
Iha oras neba Jesus fo dau-daun isin diak ba ema barak nia moras no
terus, hodi duni sai espiritu aat sira no halo matan delek barak hare. 22
Nia hatan ba sira: “Imi ba fali hodi hateten ba Joao buat nebe imi hare
no rona: ema matan delek sira hare, ema ain aat sira la’o, ema moras lepra sira
hetan isin mos, ema tilun diuk sira rona, ema mate sira moris hi’as fali, no
liafoun diak haklaken tiha ba kiak sira. 23 Rahun
diak ba sira nebe la lakon fiar iha Ha’u.”
24
Wainhira Joao nia eskolante sira ba tiha, Jesus hahu koalia ba povu kona
ba Joao: 25 “Imi ba hare sa ida iha rai fuik maran? Fafulu ida nebe leok iha
anin? Imi ba hare sa ida? Ema ida nebe hatais mesa furak? Hare ba, sira nebe
hatais furak no moris diak deit hela iha ema boot sira nia uma. 26
Ne’e duni, imi ba hare sa ida? Profeta ida? Ne’e los; maibe Ha’u dehan ba
imi katak nia boot liu fali profeta ida. 27 Kona ba
ema ne’e hakerek tiha ona: ‘Hare ba, Ha’u haruka ha’u nia manu-ain atu la’o
uluk O, atu hadia dalan ba O.’ 28 Tebes Ha’u dehan
ba imi, iha feto nia oan sira leet la iha ida nebe boot liu fali Joao; maibe
ida nebe kiik liu iha Maromak nia Reinu, ema ne’e boot liu fali nia.” 29
Ema hotu nebe rona Joao, no mos publikanu sira, hahi Maromak hodi simu
nia baptismu; 30 maibe fariseu sira no doutor
ukunfuan sira nian hewai Maromak nia
hakarak hodi la simu baptismu housi nia.
31
Na’i dehan tan: “Ha’u sei tanesan ema sira otas ne’e nian ho se los? Sira
hanesan se los? 32 Sira hanesan labarik sira nebe
tur hakilar ba malu iha basar, dehan: ‘Ami hananu knananuk ksolok nian, maibe
imi la dansa; ami hananu knananuk tanis nian, maibe imi la tanis.’ 33
Basa Joao mai, la han paun, la hemu tua, no imi dehan: ‘Nia iha diabu iha
nia laran.’ 34 Oan Mane mai, han hemu, no imi
dehan: ‘Ne’e ema kaanten no lanuten, publikanu no maksalak sira nia belun.’ 35
Maibe matenek los hatudu an iha nia eskolante sira.”
36
Fariseu ida konvida Jesus atu han hamutuk ho nia. Tama tiha iha nia uma,
Nia tur iha meja. 37 Tuir mai, feto moris aat ida
housi sidade, rona tiha katak Jesus mai han iha fariseu nia uma, mai lori botil
ida ho mina morin, 38
ba Jesus nia kotuk no hahu fase Nia ain ho nia mataben, hodi hamaran ho
nia fuuk, rei no kose ho mina morin. 39
Hare tiha buat ne’e, fariseu nebe
konvida nia hateten ba nia an: “Ema ne’e profeta ida karik, nia sei hatene feto
ne’e nebe kona Nia se los, katak feto aat ida.” 40 Jesus
hatan, hodi dehan ba nia: “Simao, Ha’u hakarak hato’o buat ruma ba ita.” Nia
dehan: “Koalia ba, Mestre.” 41 “ Loron ida ema ida impresta
osan ba ema na’in rua: ida halo tusan osan mean atus lima, ida seluk lima nulu.
42 Tamba sira na’in rua la bele selu fali, nia kasu
tiha sira nia tusan. Ida nebe mak sei hadomi nia liu tan?” 43
Simao hatan: “Ha’u hanoin katak ida nebe nia tusan boot liu.” No Jesus
dehan: “Ita hanoin los!” 44 Hafoin Nia fila oin ba
feto, hodi dehan ba Simao: “Ita hare feto ne’e? Ha’u tama iha ita nia uma, ita
la fase Ha’u nia ain; maibe nia fakar nia mataben ba Ha’u nia ain hodi hamaran
ho nia fuuk. 45 Ita la rei Ha’u , maibe nia la para
rei Ha’u nia ain houri oras nebe Ha’u tama mai. 46 Ita
la kose mina ba Ha’u nia ulun, maibe nia kose Ha’u nia ain ho mina morin. 47
Tan ne’e, Ha’u dehan ba ita katak nia hetan perdua ona housi nia sala
barak, basa nia hatudu domin boot. Ema nebe hetan perdua ba sala uitoan deit,
nia mos hadomi uitoan deit.” 48 Tuir mai, Nia dehan
ba feto: “O nia sala sira hetan ona perdua.” 49 Sira
nebe tur hamutuk ho Nia iha meja hahu hanoin: “Ema ne’e se los atu bele kasu
ema nia sala?” 50 Maibe Nia dehan ba feto: “O nia
fiar mak soi tiha o; la’o ba iha dame laran.”
|