8

¹ Liu tiha ne’e, Nia la’o ba sidade no knua sira, hodi hanorin no haklaken liafoun diak kona ba Maromak nia reinu. Sira sanulu resin rua la’o hamutuk ho Nia, ² no mos feto balun nebe hetan diak housi moras oi-oin no housi espiritu aat sira: Maria nebe ema hanaran Madalena, no housi nia diabu hitu sai tiha ona; ³ Joana, Herodes nia atan Cusa nia feen, Susana no feto seluk tan, nebe tulun sira ho sira nia rikusoi.

Aiknanoik fini nian

⁴ Wainhira ema lubun boot halibur hamutuk, hodi hakbesik ba Nia housi sidade tomak, Jesus haktuir aiknanoik ida ne’e: ⁵  “Ema ida ba kari fini. Nia sei kari hela, fini balun monu iha dalan ninin, hafoin ema sama no manu sira housi lalehan mai han sira. ⁶ Fini balun monu iha fatuk leten; moris tiha, sira namlaek, basa be la iha. ⁷ Fini balun fali monu iha ai-tarak laran. Ai-tarak sira moris hamutuk ho sira, hodi hanehan sira. ⁸ Ikus mai, fini balun monu iha rai diak, hodi moris no fo fuan dala atus ida.” Hateten tiha ne’e, Nia dehan ho lia maka’as: “Sira nebe iha tilun, rona ba!” ⁹ Eskolante sira husu ba Nia aiknanoik ida ne’e katak sa. ¹⁰ Nia hatan: “Lialos kona ba Maromak nia reinu fo hatene tiha ona ba imi; maibe ba ema seluk hato’o deit ho aiknanoik sira, atu ‘hodi hare sira la hare los, no hodi rona sira la rona los.’ ¹¹ Ne’e duni aiknanoik ida ne’e katak: fini mak Maromak nia liafuan. ¹² Fini nebe monu iha dalan ninin mak ema sira nebe, rona tiha nia, diabu mai hodi hasai liafuan housi sira nia laran atu sira la bele hetan maksoin hodi fiar. ¹³ Fini nebe monu iha fatuk leten mak ema sira nebe rona liafuan, hodi simu nia ho ksolok; maibe, tan abut la iha, sira fiar ba tempu uitoan deit, hafoin husik ona iha oras susar nian. ¹⁴ Fini nebe monu iha ai-tarak laran, ne’e mak sira nebe rona, maibe hanoin oi-oin, rikusoi no ksolok mundu ne’e nian hanehan sira, la biban atu sai boot. ¹⁵ No fini nebe monu iha rai diak, ne’e mak sira nebe rona liafuan ho neon ho laran, rai di-diak nia hodi fo fuan, tan sira laran metin.”

Aiknanoik ahi-oan nian

                ¹⁶ “Ema ida la sunu ahi-oan hodi taka nia ho luhu ida, la tau nia iha tobafatin okos; maibe tau nia iha ahi-oan fatin, atu sira nebe tama mai bele hare nia naroman. ¹⁷ Basa la iha buat ida nebe subar hela, nebe ema sei la hare hetan; la iha buat ida nebe ema la hatene, nebe ema seluk sei la fo sai. ¹⁸ Ne’e duni, hare di-diak oin sa imi rona; basa ema nebe iha sei simu tan, no housi ema nebe la iha sei hasai tan buat nebe nia hanoin nia iha.”

Jesus nia parenti lo-los

                ¹⁹ Nia inan no maun alin sira mai buka Nia, maibe sira la bele hakbesik ba Nia tamba ema lubun boot. ²⁰ Sira fo hatene ba Nia: “Ita nia inan no maun alin sira hamriik iha liur hodi hakarak hare Ita.” ²¹ Nia hatan ba sira: “Ha’u nia inan no maun alin mak sira nebe rona hodi halo tuir Maromak nia liafuan.”

Jesus halo tasi hakmatek

                ²² Loron ida Nia sa’e ro ho nia eskolante sira. Nia dehan ba sira: “Ita hakur ba tasi sorin ba.” Sira ba. ²³ Eskolante sira hean dau-daun, Nia toba dukur. Anin boot hahu hu’u iha tasi, halo be tama iha ro. Sira tauk la diak. ²⁴ Sira fanu Nia dehan: “Mestre, Ita atu mout!” Nia hader, hodi si’ak anin no tasi; sira ne’e tun, no buat hotu hakmatek. ²⁵ Nia dehan ba sira: “Imi nia fiar iha nebe?” Sira tauk no hakfodak, hodi dehan ba malu: “Ema ne’e se los, atu haruka anin ho be, no sira tuir Nia?”

Diabu sai housi ema ida iha rai Gerasa

²⁶ Sira to’o tasi ibun iha rai Gerasa, besik Galileia. ²⁷ Tun tiha ba rai, mane ida, nebe iha diabu iha laran, mai hasouru Nia. Kleur ona nia la hatais, la horik iha uma, maibe hela iha rate laran. ²⁸ Hare tiha Jesus, nia monu ba rai iha nia oin, hodi hakilar, dehan: “Ita hakarak sa ida ho ha’u, Jesus, Maromak leten aas nia Oan? Ha’u husu ba Ita, keta fo terus mai ha’u!” ²⁹ Los duni, Jesus haruka espiritu foer ne’e sai housi ema ne’e, tamba dala barak ona mak nia book ema ne’e. Ema sira kesi nia ho korente no kadeiadu atu tahan nia, maibe nia halo kotu korente no halo aat kadeiadu; no diabu lori nia ba rai fuik maran. ³⁰ Jesus husu ba nia: “O naran sa?” Nia hatan: “Lubun boot;” basa diabu barak tama iha nia. ³¹ Sira ne’e husu Jesus keta haruka sira atu monu ba infernu. ³² Iha neba, iha fahi lubun ida nebe han dau-daun iha foho ninin. Diabu sira husu Nia atu husik sira tama ba fahi hirak ne’e. Jesus husik sira. ³³ Diabu sira sai housi ema, hodi tama duni iha fahi sira. Fahi sira halai tun ba tasi laran hodi mout hotu. ³⁴ Hare tiha buat ne’e, sira nebe hein fahi halai, lori lia ba sidade no knua sira. ³⁵ Ema sira sai ba hare buat nebe mosu. Sira ba hasouru  Jesus, hodi hetan ema nebe diabu sira sai tiha tur besik Jesus, iha ona hatais no ho oin mos ona. Sira hotu tauk. ³⁶ Sira nebe hare buat ne’e, haktuir ba ema seluk oin sa ema ne’e ho diabu barak iha nia laran hetan diak. ³⁷ Hafoin ema hotu iha rai Gerasa tauk teb-tebes, hodi husu Jesus atu husik sira, basa sira tauk liu. Tan ne’e, Nia sa’e ba ro atu fila fali. ³⁸ Ema housi nebe diabu sira sai husu Jesus atu husik nia la’o hamutuk ho Nia. ³⁹ Maibe Jesus haruka nia, dehan: “Fila ba uma, hodi haktuir buat hotu nebe Maromak halo tiha ba o.” Ema ne’e ba duni, hodi fo sai iha sidade tomak buat hotu nebe Jesus halo ba nia.

Feto moras fakar ran no Jairo nia oan feto

⁴⁰ Wainhira Jesus fila mai, ema lubun boot simu Nia; basa sira hotu hein Nia. ⁴¹ Ema ida naran Jairo, sinagoga nia ulun ida, mai hasouru Nia. Monu tiha ba Jesus nia ain, ema ne’e husu Nia atu ba nia uma, ⁴² basa nia iha oan feto mesak nebe besik tinan sanulu resin rua, moras besik atu mate. Tuir dalan, ema barak hale’u hodi hanehan Nia. ⁴³ Iha feto ida nebe moras fakar ran tinan sanulu resin rua ona. Nia gasta nia osan tomak ba doutor sira, maibe ema ida la bele fo isin diak ba nia. ⁴⁴ Nia mai housi kotuk, hodi kona Jesus nia unuk nia ninin. Iha oras ne’e kedas nia hetan isin diak. ⁴⁵ Jesus dehan: “Se mak kona Ha’u?” Tan sira hotu heli lia, Pedro ho nia maluk sira dehan: “Ema lubun boot hale’u hodi dudu Ita!” ⁴⁶ Jesus dehan teni: “Ema ida kona Ha’u. Ha’u hatene, basa kbiit sai housi Ha’u.” ⁴⁷ Hare katak nia la bele subar, feto ne’e hakbesik Jesus, nakdedar ho tauk; hafoin, monu tiha ba Nia ain, feto ne’e haktuir iha povu tomak nia oin tansa nia kona Jesus no oin sa nia hetan isin diak iha oras ne’e kedas. ⁴⁸ Jesus dehan: “Ha’u nia oan feto, o nia fiar mak soi o. Ba ho dame!”

⁴⁹ Nia sei koalia hela, ema ida to’o mai housi na’i ulun sinagoga nian nia uma, dehan: “Ita nia oan feto mate ona. Lalika hakole tan Mestre.” ⁵⁰ Maibe, rona tiha lia ne’e, Jesus dehan ba nia: “Keta tauk, fiar deit no nia sei sai diak fali.”  ⁵¹ To’o tiha uma, Jesus la husik ema ida tama hamutuk ho Nia, maibe Pedro, Joao no Tiago deit, hamutuk ho labarik nia aman no inan. ⁵² Sira hotu tanis hodi hakilar, maibe Jesus dehan: “Keta tanis, nia la mate, nia toba deit.” ⁵³ Sira hamnasa Nia, basa sira hatene katak labarik mate ona. ⁵⁴ Maibe Jesus kaer nia liman hodi dehan: “Labarik, hamriik ba!” ⁵⁵ Nia klamar fila fali, nia hamriik kedas. Jesus haruka sira fo han ba nia. ⁵⁶ Nia aman inan sira hakfodak, maibe Jesus bandu sira atu la bele fo sai ba ema ida buat nebe mosu.