10

Jesus haruka eskolante na’in hitu nulu resin rua

¹ Tuir mai, Nia fihir eskolante hitu nulu resin rua, hodi haruka sira rua rua atu ba uluk iha sidade no fatin sira nebe Nia atu ba. ² Nia dehan ba sira: “To’os boot duni, maibe serbisu na’in sira uitoan deit. Tan ne’e, imi husu ba to’os na’in atu haruka serbisu na’in sira ba nia to’os. ³ Imi la’o ba. Ha’u haruka imi ba nudar bibi oan sira iha asu fuik sira leet. ⁴ Keta lori bukae, kohe eh sandalias. Keta kumprimenta ema ida iha dalan. ⁵ Imi tama karik iha uma ida, uluk knanain imi dehan: ‘Dame ba uma ne’e!’ ⁶ Iha karik ema dame na’in ida iha neba, imi nia dame sei horik ho nia; lae karik, sei fila fali ba imi. ⁷ Imi hela iha uma neba, han hemu buat nebe sira iha; basa serbisu na’in soi atu simu nia kolen. Keta tama uma sai uma sira. ⁸ Imi tama iha sidade ida no sira simu imi karik, imi han buat nebe sira fo ba imi. ⁹ Fo isin diak ba ema moras sira iha neba, hodi hateten ba sira: ‘Maromak nia reinu besik ona imi’ ¹⁰ Maibe imi tama iha sidade ida no sira la simu imi karik, imi sai ba luron sira hodi dehan: ¹¹ ‘Rai rahun mos housi imi nia sidade, nebe belit ba ami nia ain, ami liki tiha ba imi! Maibe imi hanoin hela ba katak Maromak nia reinu besik liu ona.’ ¹² Ha’u dehan tebes ba imi katak aban bainrua Sodoma sei la hetan susar hanesan sidade ne’e.”

¹³ “Rahun aat ba o, Korosain! Rahun aat ba o, Betsaida! Basa, milagre sira nebe halo tiha iha o halo karik iha Tiro no Sidon, kleur ona mak sira hakribi sira nia sala hodi hatais karon no tur iha ahi kdesan leten. ¹⁴ Maibe iha loron tesi lia nian, Tiro no Sidon sei la hetan susar hanesan imi. ¹⁵ O mos, Kafarnaum, hakarak foti an to’o lalehan? Ema sei hamonu o to’o inferno!”

¹⁶ “Ema nebe rona imi rona Ha’u, no ema nebe hakribi imi hakribi Ha’u; maibe ema nebe hakribi Ha’u, hakribi Ida nebe haruka Ha’u mai.”

¹⁷ Sira hitu nulu resin rua ne’e fila fali hodi haksolok, dehan: “Na’i, diabu sira mos tuir ami hodi Ita nia naran.” ¹⁸ Nia hatan ba sira: “Ha’u foin hare Satanas monu housi lalehan hanesan rai lakan. ¹⁹ Los duni, Ha’u haraik tiha kbiit ba imi atu sama samea no sakunar sira, hodi manan hasouru funubalun nia kbiit tomak; la iha buat ida nebe bele halo aat imi. ²⁰ Maski nune’e, keta haksolok tamba espiritu sira tuir imi; haksolok deit tamba imi nia naran hakerek tiha ona iha lalehan.”

Jesus nia ksolok

²¹ Iha oras neba Nia haksolok teb-tebes ho Espiritu  Santu, dehan: “Ha’u hanai Ita, Aman, basa Ita subar tiha buat sira ne’e housi ema matenek sira hodi fo hatene fali ba sira nebe kiik. Los duni, Aman, Ita hakarak nune’e. ²² Ha’u nia Aman saran tiha buat hotu mai Ha’u. Ema ida la hatene se mak Oan, Aman deit mak hatene; no ema ida la hatene se mak Aman, Oan deit mak hatene, no ida nebe Oan hakarak fo hatene ba nia.” ²³ Hafoin, fila oin ba nia eskolante sira, Nia dehan: “Rahun diak ba sira nebe hare buat nebe imi hare. ²⁴ Basa Ha’u dehan ba imi katak profeta no liurai sira uluk nian hakarak hare buat nebe imi hare, maibe sira la hare; no rona buat nebe imi rona, maibe sira la rona.”

Aiknanoik kona ba Samaritanu diak

                ²⁵ Tuir mai, doutor ukunfuan nian ida hamriik hodi dehan atu koko Nia: “Mestre, ha’u sei halo sa ida atu hetan moris rohan laek?” ²⁶ Jesus dehan ba nia: “Iha ukunfuan hakerek sa ida? Ita lee oin sa?” ²⁷ Nia hatan: “O sei hadomi Na’i, o nia Maromak, ho neon ho laran tomak, ho o nia kbiit tomak, ho o nia hanoin tomak; no mos o nia maluk nudar o nia an rasik.” ²⁸ No Jesus dehan ba nia: “Ita hatan los; halo nune’e, ita sei hetan moris.” ²⁹ Maibe, tan nia hakarak souri an, nia dehan ba Jesus: “Maibe, se mak ha’u nia maluk?” ³⁰ Jesus hatan hodi dehan: “Ema ida tun housi Jerusalem ba Jeriko. Nia monu iha na’okten sira nia liman. Sira hadau nia sasan sira hodi baku tasak nia; hafoin sira halai, hodi husik hela nia besik atu mate. ³¹ Am’lulik ida liu housi neba; hare tiha ema ne’e, nia liu ba oin deit. ³² Nune’e mos levita ida nebe liu housi neba: hare tiha ema ne’e, nia liu ba oin. ³³ Maibe, wainhira Samaritanu ida liu housi neba, hare tiha ema ne’e, nia hanoin nia teb-tebes. ³⁴ Nia hakbesik, tau mina ho tua ba nia kanek sira hodi falun sira, hafoin foti ema ne’e ba nia kuda rasik no lori nia ba uma ida hodi bali nia. ³⁵ Liu tiha loron ida nia hasai osan rua, hodi fo ba uma na’in, dehan: ‘Hare nia di-diak, no buat nebe ita gasta ha’u sei selu wainhira ha’u sei fila mai.’ ³⁶ Tuir ita nia hanoin, sira na’in tolu ne’e, ida nebe mak maluk ba ema nebe monu iha na’okten sira nia liman?” ³⁷ Nia hatan: “Ida nebe hatudu laran luak ba nia.” No Jesus hateten ba nia: “Ba, hodi halo mos nune’e.”

Marta no Maria

³⁸ Tuir dalan, Jesus to’o knua ida. Feto ida naran Marta simu Nia iha nia uma. ³⁹ Marta iha feton ida naran Maria, nebe tur deit iha Jesus nia ain hodi rona Nia koalia. ⁴⁰ Marta fali, nebe la’o ba la’o mai atu serbi sira, hakbesik hodi dehan: “Na’i, Ita la hare katak ha’u nia alin husik ha’u serbisu mesa-mesak? Dehan to’ok ba nia atu tulun ha’u.” ⁴¹ Na’i hatan ba nia: “Marta, Marta, o la’o kole hodi hanoin resin kona ba buat barak; maibe buat ida deit mak folin los. ⁴² Maria hili buat nebe diak liu hotu, nebe ema ida sei la hadau housi nia.”