11

Jesus hanorin atu hamulak

¹ Loron ida, Nia harohan iha fatin ida. Hotu tiha, nia eskolante ida hateten ba Nia: “Na’i, hanorin ami harohan hanesan Joao Baptista hanorin nia eskolante sira.” ² Nia dehan ba sira: “Wainhira imi harohan, hateten nune’e: ‘Aman, tulun ema atu hahi Ita naran. Halo Ita nia reinu to’o mai ami. ³ Haraik aihan loron-loron nian mai ami. ⁴ Haraik perdua mai ami sala, nudar ami perdua ema nebe halo aat ami. Label husik ami monu ba babeur.’” ⁵ Nia dehan tan ba sira: “Imi ida iha karik belun ida nebe iha kalan boot ba hateten ba nia: ⁶  ‘Belun, fo netik paun fuan tolu  mai, basa ha’u nia belun foin to’o mai housi dook no ha’u la iha buat ida atu fo ba nia.’ ⁷ Belun ne’e bele hatan housi uma laran: ‘Keta hasusar ha’u! Odamatan taka metin ona. Ha’u ho ha’u nia oan sira toba tiha ona. Ha’u la bele hader atu fo buat ruma ba o.’ ⁸ Ha’u dehan ba imi katak, maski nia sei la hader hodi fo tamba sira belun malu, nia sei fo duni buat hotu nebe nia belun kuran tamba nia husu fila fila. ⁹ Ne’e duni, Ha’u dehan ba imi: husu ba, imi sei simu; buka ba, imi sei hetan; tuku odamatan ba, odamatan sei nakloke ba imi. ¹⁰ Basa ema hotu nebe husu, sei simu; ema nebe buka sei hetan; no odamatan sei nakloke ba ema nebe tuku. ¹¹ Iha imi leet, aman ida nebe sei fo fatuk ida wainhira nia oan husu paun? Eh sei fo samea ida wainhira nia husu ikan? ¹² Eh sei fo sakunar ida wainhira nia husu mantolu? ¹³ Ne’e duni, imi hatene fo buat diak ba imi nia oan sira, maski imi ema aat, imi nia Aman iha lalehan sei haraik liu tan Espiritu  Santu ba sira nebe husu ba Nia.”

Fariseu sira duu matak Jesus

                ¹⁴ Jesus duni sai dau-daun diabu ida nebe monok. Wainhira diabu sai tiha, ema monok koalia hodi halo povu tomak hakfodak. ¹⁵ Maibe balun dehan: “Nia duni sai diabu hodi Beelzebu, diabu sira nia ulun nia naran.” ¹⁶ Balun fali husu ba Nia sinal ida housi lalehan, atu koko Nia. ¹⁷ Maibe, hatene tiha sira nia hanoin, Nia dehan ba sira: “Reinu hotu nebe haketak malu sei sobu rahun, uma ida sei monu iha uma seluk nia leten. ¹⁸ Nune’e mos, Satanas fahe karik nia an ba rua, oin sa nia bele tahan? Basa imi dehan katak hodi Beelzebu mak Ha’u duni sai diabu sira. ¹⁹ Ha’u duni sai diabu sira hodi Beelzebu nia naran karik, hodi se nia naran mak imi nia oan sira duni sai sira? Tan ne’e mak sira sei tesi lia ba imi. ²⁰ Maibe Ha’u duni sai diabu sira hodi Maromak nia liafuan karik, ne’e dehan katak Maromak nia reinu to’o ona ba imi. ²¹ Wainhira ema maka’as ida ho kroat hein nia uma boot, nia rikusoi hela metin; ²² maibe wainhira ema ida maka’as liu nia mosu karik hodi manan nia, ema ne’e hadau nia kroat nebe fo laran metin ba nia, hodi fahe nia sasan tomak. ²³ Ida nebe la hamutuk ho Ha’u, nia hasouru Ha’u; no ida nebe la halibur ho Ha’u, nia sei namkari. ²⁴ Wainhira espiritu foer ida sai housi ema ida, nia la’o lemo rai fuik maran hodi buka hakmatek. La hetan tiha, nia dehan: ‘Ha’u sei fila fali ba uma nebe ha’u hela uluk.’ ²⁵ To’o tiha neba, nia hetan fatin ne’e saar mos tiha no furak. ²⁶ Hafoin nia ba lori tan espiritu na’in hitu nebe aat liu fali nia; sira ne’e tama, hodi horik iha neba. Ikus mai ema ne’e sai aat liu fali uluk nian.”

Rahun diak lo-los

                ²⁷ Nia sei koalia hela, feto ida housi ema lubun sira leet foti lia, dehan: “Rahun diak ba knotak nebe ko’us Ita, no hirus matan nebe  fo susuben ba Ita!” ²⁸ Maibe Nia hatan: “Rahun diak liu fali ba sira nebe rona Maromak futar lia hodi halo tuir nia!”

Jonas nia sinal

                ²⁹ Wainhira ema sira sai wa’in liu tan, Nia dehan: “Ema sira otas ne’e nian aat duni; sira husu sinal ida, maibe sinal mesak nebe sei fo ba sira mak sinal Jonas nian. ³⁰ Basa, hanesan Jonas sai sinal ida ba ema rai Ninive, nune’e mos Oan Mane sei sai sinal ida ba ema sira housi otas ne’e. ³¹ Iha loron tesi lia nian liurai feto tasimane nian sei hamriik hasouru ema sira ne’e hodi tesi lia todan ba sira; basa nia mai housi mundu nia rohan atu rona Salomao nia matenek, no iha ne’e iha Ida nebe boot liu fali Salomao. ³² Iha loron tesi lia nian Ninive nia oan sira sei hamriik hasouru ema sira ne’e, hodi tesi lia todan ba sira; basa wainhira Jonas haklaken Maromak nia liafuan, sira hakribi sira nia sala, maibe iha ne’e iha Ida nebe boot liu fali Jonas.”

Aiknanoik kona ba ahi-oan

³³ “Ema ida la sunu lakan ahi-oan atu tau nia iha uma okos, eh iha balde nia okos, maibe atu tau iha nia fatin, atu sira nebe tama bele hare nia naroman. ³⁴ O nia isin nia ahi-oan mak o nia matan. O nia matan mos karik, o nia isin tomak iha naroman; maibe o nia matan moras karik, o nia isin tomak iha nakukun laran. ³⁵ Ne’e duni, hare ba atu o nia naroman la sai nakukun. ³⁶ O nia isin tomak hetan karik naroman no la iha nakukun iha nia, isin tomak ne’e sei nabilan, hanesan ahi-oan nebe leno o ho nia naroman.”

Hasouru fariseu sira

³⁷ Jesus sei koalia hela, fariseu ida konvida Nia atu han iha nia uma. Nia tama hodi tur iha meja. ³⁸ Fariseu hakfodak, basa Nia la fase an molok atu han. ³⁹ Na’i dehan ba nia: “Imi fariseu sira hamos kopu no bikan nia liur, maibe imi nia laran mesa karakten no aat. ⁴⁰ Beikten sira! Ida nebe halo buat nebe iha liur, la halo mos buat nebe iha laran? ⁴¹ Imi fo esmola housi imi nia rikusoi, no buat hotu sei sai mos ba imi. ⁴² Maibe rahun aat ba imi, fariseu sira, nebe selu impostu ruku nian, salsa no modo tomak nian, maibe haluha justisa no domin ba Maromak! Imi sei halo duni buat ne’e, maibe keta haluha buat seluk. ⁴³ Rahun aat ba imi, fariseu sira, nebe gosta tur iha fatin uluk iha sinagoga no haksolok wainhira ema kumprimenta imi iha basar. ⁴⁴ Rahun aat ba imi, basa imi hanesan rate sira nebe ema la hare no ema sama tamba sira la hatene!”

⁴⁵ Doutor ukunfuan nian ida simu hodi dehan: “Mestre, wainhira Ita koalia hanesan ne’e, Ita hateten aat mos ami.” ⁴⁶ Nia hatan: “Rahun aat mos ba imi, doutor ukunfuan sira nian, basa imi tau naha todan liu ba ema, maibe imi rasik la book liman fuan ida atu foti nia. ⁴⁷ Rahun aat ba imi nebe hada rate profeta sira nian: imi nia bei-ala sira mak oho sira! ⁴⁸ Nune’e imi fo sasin, hodi hakarak mos imi nia bei-ala sira nia hahalok sira; basa sira mak oho, imi mak hada rate. ⁴⁹ Tan ne’e Maromak nia matenek dehan: ‘Ha’u sei haruka profeta no apostolu sira; balun sira sei duni sai no oho,’ ⁵⁰ atu ema otas ne’e nian sei hatan kona ba profeta sira hotu nia ran, nebe nakfakar houri mundu hahu, ⁵¹ housi Abel nia ran to’o Zacarias nian, nebe ema oho iha altar no santuariu nia klaran. Tebes, Ha’u dehan ba imi, ema sira ne’e sei hatan kona ba buat hirak ne’e hotu. ⁵² Rahun aat ba imi, doutor ukunfuan sira nian, nebe hadau tiha  siabe  matenek nian! Imi rasik la tama, no imi taka netik dalan ba sira nebe hakarak tama.”

⁵³ Wainhira Nia sai housi neba, eskriba no fariseu sira hahu haksesuk maka’as ho Nia, hodi  koko halo Nia koalia kona ba buat barak. ⁵⁴ Sira buka atu halo Nia sidi ho nia liafuan atu nune’e bele duu Nia.