12

Jesus hanorin aten berani

¹ Tuir mai, wainhira ema lubun boot teb-tebes halibur an hamutuk to’o sira hanehan malu, Jesus hahu koalia ba nia eskolante sira, dehan: “Imi matan moris ba kona ba fariseu nia fermentu, katak sira nia laran makerek. ² Buat hotu nebe taka hela, sei nakloke; no buat hotu nebe subar hela, sei fo hatene. ³ Tan ne’e, buat nebe imi dehan iha nakukun laran, ema sei rona iha loron nabilan; no buat hotu nebe imi hateten nei-neik iha subar fatin, ema sei fo sai maka’as iha uma nia kakuluk. ⁴ Ha’u nia belun sira, Ha’u dehan ba imi: keta tauk sira nebe oho isin, hafoin la bele halo buat ida tan. ⁵ Ha’u sei dehan ba imi se los mak imi ten ke tauk: imi sei tauk ida nebe, oho tiha isin, iha mos kbiit atu soe ema ba infernu. Ha’u dehan ba imi, ema ne’e mak imi ten ke tauk. ⁶ Ema la faan manulin lima ho osan rua? Maibe Maromak la haluha sira ne’e ida mos. ⁷ Fuuk lahan housi imi nia ulun sura tiha hotu; ne’e duni, imi keta tauk, basa imi folin liu manulin barak. ⁸ Ha’u dehan los ba imi katak ema nebe hatene Ha’u iha ema nia oin, Oan Mane mos sei hatene nia iha Maromak nia anju sira nia oin. ⁹ Maibe ema nebe heli lia kona ba Ha’u iha ema nia oin, Maromak nia anju sira mos sei heli lia kona ba nia. ¹⁰ Ema nebe koalia aat hasouru Oan Mane, sei hetan perdua; maibe ema nebe hateten aat Espiritu Santu sei la hetan perdua. ¹¹ Wainhira sira lori imi ba sinagoga sira, ba tesi lia na’in no ba na’i ulun sira, keta hanoin resin kona ba oin sa imi sei hatan eh koalia, ¹² basa iha oras neba Espiritu Santu sei hanorin imi buat nebe imi sei dehan.”

Keta hanoin resin rikusoi

                ¹³ Housi ema lubun boot, ema ida dehan ba Nia: “Mestre, hateten ba ha’u nia maun atu fahe ami nia liman rohan.” ¹⁴ Nia hatan: “Belun, se mak foti Ha’u atu tesi lia kona ba imi?” ¹⁵ Hafoin Nia dehan ba sira: “Imi hare ba, keta kaan rikusoi, basa, la’os ema nia rikusoi mak halo ema moris liu.” ¹⁶ Tuir mai, Nia haktuir ba sira aiknanoik ida ne’e: “Ema riku ida hetan aihan barak housi nia to’os. ¹⁷ Nia hanoin hodi dehan ba nia an: ‘Ha’u sei halo sa los? Basa ha’u fatin la iha atu rai ha’u nia aihan sira.’ ¹⁸ Hafoin nia dehan: ‘Ha’u sei halo nune’e: ha’u sei sobu ha’u nia aihan fatin hodi harii ida seluk boot liu fali ida ne’e; iha neba ha’u sei rai ai-fuan hotu to’os nian ho ha’u nia rikusoi tomak. ¹⁹ No ha’u sei dehan ba ha’u nia klamar: ‘Ha’u klamar, o iha sasan barak nebe rai hela ba tinan wa’in; hakmatek ba, han hemu hodi haksolok ba.’ ²⁰ Maibe Maromak dehan ba nia: ‘Beikten! Iha kalan ne’e  kedas Ha’u sei bolu o nia klamar; sasan sira nebe o rai hela sei sai se nian?’ ²¹ Nune’e mos sei mosu ba ema nebe rai hela rikusoi ba nia an, maibe la sai riku iha Maromak nia oin.”

Laran metin ba Maromak

                ²² Tuir mai Nia dehan ba nia eskolante sira: “Tan ne’e mak Ha’u dehan ba imi: keta hanoin resin kona ba imi nia moris, no buat nebe imi sei han, eh kona ba imi nia isin no oin sa imi sei hatais. ²³ Basa moris folin liu fali aihan, no isin folin liu fali hatais. ²⁴ Hare ba manu lakateu sira: sira la kuda eh sohi, sira uma la iha atu rai aihan, no Maromak fo han sira. Maibe imi folin boot liu fali manu sira! ²⁵ Imi ida nebe, hodi hanoin resin, bele halo nia moris naruk liu? ²⁶ Ne’e duni, imi la bele halo buat nebe kiik liu karik, tan sa imi hanoin resin kona ba buat seluk? ²⁷ Hanoin ba, oin sa ai-funan sira sai boot: sira la serbisu, sira mos la soru; maibe ha’u dehan ba imi katak Salomao mos, ho nia gloria tomak, la hatais hanesan sira ne’e ida. ²⁸ Ne’e duni, Maromak nebe fo hatais ba du’ut nebe ohin buras iha to’os laran no aban ema soe ba ahi, Nia sei hanoin liu tan imi, ema fiar kiik! ²⁹ Imi keta hanoin resin kona ba buat nebe imi sei han ka hemu, keta laran susar; ³⁰ basa gentiu sira mak buka buat hirak ne’e hotu. Maibe imi nia Aman hatene katak imi kuran sasan hirak ne’e. ³¹ Imi buka uluk knanain Maromak nia reinu, no buat seluk sei haraik mos ba imi.”

³² “Bibi oan sira, keta tauk, basa imi nia Aman hakarak haraik reinu ba imi. ³³ Faan imi nia rikusoi hodi fahe nudar esmola. Imi halo kohe sira nebe la lakon, rikusoi nebe la mohu iha lalehan, iha nebe na’okten la bele hakbesik no ular la bele han. ³⁴ Basa iha fatin nebe imi haloot imi nia rikusoi, iha neba mos imi nia fuan sei hela ba.”

Neon moris hodi hein Na’i

                ³⁵ “Kesi metin imi nia futukabun. Halo imi nia ahi-oan lakan nafatin. ³⁶ Halo an hanesan ema sira nebe hein sira nia na’in wainhira nia mai housi festa kaben nian, atu loke kedas odamatan iha oras nebe nia to’o mai hodi tuku odamatan. ³⁷ Rahun diak ba atan sira nebe Na’i hetan hader hela wainhira nia to’o. Tebes, Ha’u dehan ba imi katak, nia sei kesi hena ba nia knotak, sei halo sira tur iha meja, hafoin Nia sei liu housi sira leet hodi serbi sira. ³⁸ Nia to’o mai karik iha ronda rua ka tolu, hodi hetan sira nune’e, rahun diak ba sira. ³⁹ Imi rona di-diak ba: uma na’in hatene karik tuku hira mak  na’okten atu mai, nia sei la husik nia tama iha nia uma. ⁴⁰ Imi hein hela ba, basa iha oras nebe imi la hanoin kona, Oan Mane sei hiit an mai.”

                ⁴¹ Pedro dehan  ba Nia: “Na’i, Ita haktuir aiknanoik ida ne’e ba ami deit, ka ba ema hot-hotu?” ⁴² Jesus simu: “Se mak atan diak no matenek nebe uma na’in haruka atu hare nia familia hodi fahe aihan ba sira tuir oras lo-los? ⁴³ Rahun diak ba atan nebe nia na’in hetan halo nune’e wainhira nia to’o mai. ⁴⁴ Tebes, ha’u dehan ba imi katak nia sei fo knaar ba atan ne’e atu hare nia rikusoi tomak. ⁴⁵ Maibe atan ne’e dehan karik ba nia an: ‘Ha’u nia na’i kleur atu to’o mai,’ hafoin hahu baku atan mane no feto sira, hodi han no hemu to’o lanu, ⁴⁶ nia na’i sei to’o mai iha oras nebe nia la hanoin, na’i sei haketak nia, hodi tau nia hamutuk ho ema aat sira. ⁴⁷ Atan nebe hatene nia na’i nia hakarak, maibe la hadia an hodi halo tuir buat nebe nia husu, sei hetan kastigu boot. ⁴⁸ Maibe atan nebe la hatene, no halo buat nebe soi kastigu, sei hetan kastigu kiik deit. Ba ema nebe simu barak, sei husu mos barak; no ema nebe simu knaar boot, sei hatan mos kona ba buat boot.”

Tan Jesus, ema sei haketak malu

                ⁴⁹ “Ha’u mai atu lori ahi ba raiklaran, no Ha’u hakarak teb-tebes ahi ne’e lakan duni. ⁵⁰ Ha’u sei simu baptismu ida, no Ha’u sei la hakmatek to’o buat ne’e mosu. ⁵¹ Imi hanoin katak Ha’u mai atu lori dame ba raiklaran? Ha’u dehan ba imi katak lae; maibe atu halo ema haketak malu. ⁵² Basa, houri ohin ba oin, ema na’in lima iha uma laran, sira lia sei la tuir malu: na’in tolu hasouru na’in rua, na’in rua hasouru na’in tolu; ⁵³ aman hasouru oan mane, oan mane hasouru aman; inan hasouru oan feto, oan feto hasouru inan; banin feto hasouru feto foun, feto foun hasouru banin feto.”

Sinal sira otas nian

                ⁵⁴ Nia dehan tan ba ema lubun boot: “Wainhira imi hare kalohan ida iha loromonu, imi dehan katak udan sei tau, no mosu duni nune’e. ⁵⁵ Wainhira anin hu’u housi tasimane, imi dehan katak loron sei manas, no mosu duni nune’e. ⁵⁶ Imi ema laran makerek sira! Imi hatene si’ik buat nebe mosu iha lalehan no iha rai, nusa mak imi la hatene si’ik otas ne’e? ⁵⁷ Tan sa imi la hare ho imi nia matan rasik buat nebe los? ⁵⁸ Ne’e duni, wainhira o ba tribunal hamutuk ho o nia funubalun, buka hadame malu ho nia iha dalan; keta halo nia lori o ba tesi lia na’in, hafoin tesi-lia na’in saran o ba guarda, no guarda hatama o iha dadur laran. ⁵⁹ Ha’u dehan ba o katak o sei la sai housi neba to’o o selu hotu.”