13

Hanorin kona ba hakribi sala

                ¹ Iha loron neba ema mai fo hatene ba Nia kona ba ema Galileia sira nebe Pilatos haruka kahur sira ran ho balada sira nia ran, nebe sira hasa’e ba lulik. ² Jesus hatan ba sira: “Imi hanoin katak ema Galileia sira ne’e aat liu fali ema Galileia sira seluk tamba sira terus nune’e? ³ Lae, Ha’u dehan ba imi; maibe imi la hakribi karik imi nia sala, imi mos sei mate hanesan sira. ⁴ Hanesan mos sira sanulu resin ualu nebe tore Siloe hanehan mate wainhira tore ne’e monu: imi hanoin katak sira aat liu fali sira seluk iha Jerusalem? ⁵ Lae, Ha’u dehan ba imi; maibe imi la hakribi karik imi nia sala, imi hotu sei mate hanesan sira.”

Aiknanoik ai figueira nian

                ⁶ Nia dehan tan aiknanoik ida ne’e: “Ema ida kuda tiha ai figueira ida iha nia to’os. Loron ida nia ba buka nia ai-fuan, maibe la hetan. ⁷ Tan ne’e, nia hateten ba to’os atan: ‘Tinan tolu ona ha’u mai buka ai-fuan iha ai-hun ne’e, maibe la hetan ida. Tesi tiha nia! Tansa nia susu leet rai bokur?’ ⁸ Maibe to’os atan hatan: ‘Na’i, husik nia tinan ida ne’e tan, atu ha’u bele ke’e rai hadulas nia hun hodi tau mos rai metan. ⁹ Tinan mai nia sei fo fuan karik, diak; lae karik, mak sei tesi tiha nia.’”

Jesus fo isin diak iha loron Sabadu

                ¹⁰ Iha loron Sabadu ida Jesus hanorin iha sinagoga. ¹¹ Iha neba iha feto nebe espiritu aat ida halo moras tinan sanulu resin ualu ona: nia la’o hakru’uk deit, la bele hamriik los. ¹² Hare tiha nia, Jesus bolu nia hodi dehan ba nia: “Feto, o nia moras la iha ona.” ¹³ Hafoin Nia tau liman ba nia. Iha oras ne’e kedas, feto hamriik los hodi hahi Maromak. ¹⁴ Maibe, na’i ulun sinagoga nian, hirus tamba Jesus fo isin diak iha loron Sabadu, dehan ba ema sira: “Iha loron neen atu serbisu; ne’e duni, imi mai iha loron hirak ne’e; keta mai iha loron Sabadu.” ¹⁵ Maibe Jesus hatan ba nia, dehan: “Laran makerek sira, imi la kore imi nia karau eh kuda housi nia luhan iha loron Sabadu, hodi lori nia ba hemu? ¹⁶ Ne’e duni, feto ne’e, Abraao nia oan, nebe diabu kesi tinan sanulu resin ualu ona, la soi atu kore tiha mos iha loron Sabadu?” ¹⁷ Dehan tiha nune’e, nia funubalun sira moe hotu, no povu tomak haksolok tamba hahalok kmanek sira nebe Nia halo.

Aiknanoik mustarda musan no fermentu nian

                ¹⁸ Hafoin Nia dehan: “Maromak nia reinu hanesan sa ida los, eh Ha’u sei tanesan nia ho sa ida los? ¹⁹ Nia hanesan mustarda musan nebe ema ida hola hodi kuda iha nia to’os. Musan ne’e moris hodi sai ai-hun boot ida, manu sira housi lalehan mai tur iha nia sanak sira.” ²⁰ Nia dehan tan: “Ha’u sei tanesan Maromak nia reinu ho sa ida los? ²¹ Nia hanesan fermentu nebe feto ida tau iha farina sasukat tolu, to’o masa tomak sa’e.”

Odamatan kloot

                ²² Jesus liu housi sidade no knua sira atu ba Jerusalem hodi hanorin. ²³ Ema balun husu ba Nia: “Na’i, ema uitoan deit mak sei hetan maksoin?” Nia hatan ba sira: ²⁴ “Haka’as an atu tama liu housi odamatan kloot, basa Ha’u dehan ba imi katak ema barak sei koko atu tama, maibe sei la biban. ²⁵ Wainhira uma na’in hader hodi taka tiha ona odamatan, imi sei hamriik iha liur hodi tuku odamatan, dehan: ‘Na’i, loke mai ami!’ Nia sei hatan: ‘Ha’u la hatene imi mai housi nebe.’ ²⁶ Imi sei hahu dehan: ‘Ami uluk han hemu hamutuk ho Ita boot, no Ita boot hanorin iha ami nia luron sira.’ ²⁷ Maibe Nia sei dehan ba imi: ‘Ha’u la hatene imi mai housi nebe. Sai tiha housi ha’u nia oin, imi hotu nebe halo aat!’ ²⁸ Iha neba ema sei ruun nehan hodi tanis, wainhira imi sei hare Abraao, Isaac, Jacob no profeta sira hotu iha Maromak nia reinu, maibe ema sei duni sai imi ba liur. ²⁹ Ema sei mai housi loromonu no lorosa’e, housi tasimane no tasifeto, no sira sei tur han iha Maromak nia reinu. ³⁰ Sira nebe ohin ikus sei sai uluk; no sira nebe ohin uluk sei sai ikus fali.”

Jesus sei mate iha Jerusalem

                ³¹ Iha loron neba, fariseu balun mai hodi dehan ba Nia: “Sai tiha housi ne’e, basa Herodes hakarak oho Ita.” ³² Nia hatan ba sira: “Imi la’o ba, hodi dehan ba asu fuik ne’e: ‘Ha’u duni sai diabu sira, hodi fo isin diak ba ema ohin no aban; no bainrua ha’u nia knaar hotu ona. ³³ Maibe ohin, aban no bainrua Ha’u sei tuir Ha’u nia dalan: basa profeta ida la bele mate iha Jerusalem liur. ³⁴ Jerusalem, Jerusalem, nebe oho profeta sira no tuda sira nebe Na’i haruka ba o! Dala barak ona Ha’u buka atu halibur o nia oan sira, hanesan manu inan tau nia oan sira iha nia liras okos, maibe o lakohi! ³⁵ Tebes, ema sei husik o nia uma ne’e mamuk. Maibe Ha’u dehan ba o katak o sei la hare tan Ha’u to’o loron nebe o sei dehan: ‘Rahun diak ba Ida nebe mai hodi Na’i nia naran!’”