14
Milagre ida tan iha loron Sabadu
1
Iha loron Sabadu ida, Jesus tama iha fariseu boot ida nia uma atu han.
Sira hotu hateke ba Nia. 2 Ema moras ida mai
hamriik iha nia oin. 3 Jesus hateten ba ukun na’in
no fariseu sira: “Iha loron Sabadu bele fo isin diak ba ema moras, ka lae?” 4
Sira nonok deit. Tuir mai, kaer tiha ema moras nia liman, Jesus fo isin
diak ba nia hodi haruka nia ba. 5 Hafoin nia dehan
ba sira: “Iha imi nia leet, se mak la dada sai nia kuda burro ka nia karau nebe
monu iha be matan, maski iha loron Sabadu?” 6 Sira
la bele hatan buat ida kona ba ne’e.
7
Hare tiha oin sa bainaka balun fihir tur fatin diak, Jesus haktuir ba
sira aiknanoik ida ne’e: 8 “Ema ruma konvida karik
o ba festa kaben ida, keta tur iha meja ulun; keta uma na’in konvida ema boot
liu o karik; 9 hafoin, ema nebe konvida imi na’in
rua sei dehan ba o: ‘Fo lai fatin ba ema ne’e.’ Nune’e o sei moe boot, hodi ba
tur iha fatin ikus liu. 10 Maibe wainhira ema
konvida o, ba tur iha fatin ikus liu; nune’e, wainhira ema nebe konvida o to’o
mai, nia sei dehan ba o: ‘Belun, mai tur liu leten.’ Nune’e ema hotu nebe tur
hamutuk iha meja sei hahi o. 11 Basa ema nebe foti
an, Na’i sei hatun nia; no ema nebe haraik an, Na’i sei foti nia.”
12
Tuir mai Jesus dehan ba ema nebe konvida Nia: “Wainhira o halo festa,
keta konvida o nia belun sira, o nia maun alin sira, o nia parenti sira ka o
nia maluk riku sira; keta sira ne’e konvida fali o, nune’e sira selu fali o. 13
Maibe, wainhira o halo festa, konvida ema kiak sira, ema kbiit laek sira,
ema ain aat sira no ema matan delek sira. 14 O sei
hetan ksolok, basa sira ne’e la iha buat ida atu selu fali o; o sei simu o nia
kolen wainhira ema diak sira sei moris hi’as.”
15
Rona tiha buat ne’e, bainaka ida dehan ba Nia: “Rahun diak ba ema nebe
sei han ho Maromak iha nia reinu!” 16 Jesus hatan
ba nia: “Ema ida halo festa boot hodi konvida ema barak. 17
Iha oras atu han nia haruka nia atan atu hateten ba sira: ‘Mai ona, buat
hotu hadia tiha ona.’ 18 Maibe sira hotu hahu dehan
buat oi-oin. Ida uluk dehan ba nia: ‘Ha’u foin sosa rai no ha’u sei ba hare
nia; ha’u husu diskulpa.’ 19 Ida seluk dehan: ‘Ha’u
foin sosa karau par lima no ha’u sei koko sira; ha’u husu diskulpa.’ 20
Ida seluk tan dehan: ‘Ha’u foin kaben, tan ne’e ha’u la bele ba.’ 21
Atan ne’e fila fali hodi haktuir buat hirak ne’e ba nia na’in. Tuir mai,
uma na’in hirus, hodi dehan ba nia atan: ‘Sai lalais ba dalan no luron sira
sidade nian, hodi lori mai iha ne’e ema kiak sira, ema kbiit laek, ema matan
delek no ema ain aat sira.’ 22 La kleur atan ne’e
fila fali, hodi dehan ba nia: ‘Na’i, buat nebe Ita haruka, halo tiha ona, maibe
fatin sei iha.’ 23 Uma na’in dehan fali ba nia
atan: ‘Ba liu housi dalan no to’os sira hodi obriga ema atu tama, atu ha’u nia
uma sai nakonu. 24 Basa ha’u dehan ba imi katak,
housi sira nebe ha’u konvida uluk, ida mos sei la koko ha’u nia festa.’”
25
Ema lubun boot la’o hamutuk ho Jesus. Nia fila oin hodi dehan ba sira: 26
“Ema ruma mai tuir Ha’u karik,
maibe la hewai nia aman, inan, feen, oan sira, to’o nia moris rasik, ema ne’e
la bele sai ha’u nia eskolante. 27 Ema nebe la lori
nia krus hodi tuir Ha’u, nia la bele sai ha’u nia eskolante. 28
Imi ida nebe mak, atu halo uma aas ida, la tur uluk lai atu sura buat
nebe kuran, hodi hare nia iha osan ka lae atu halo to’o hotu? 29
Keta halo be, foin hahu harii, nia la iha kbiit atu halo to’o rohan.
Hafoin sira nebe hare, hahu hamoe nia, dehan: 30 ‘Ema ne’e hahu harii, maibe la bele halo to’o
rohan!’”
31 “ Eh liurai ida nebe mak ba funu hasouru
liurai seluk, la tur uluk lai hodi hanoin di-diak nia bele ka lae ho deit
soldadu rihun sanulu ba hasouru ida nebe mai hasouru nia ho soldadu rihun rua
nulu? 32 La bele karik, wainhira ida seluk sei dook
hela, nia haruka kedas manu-ain atu ba husu dame. 33 Nune’e
mos imi hotu nebe la husik imi nia rikusoi tomak, la bele sai ha’u nia
eskolante.”
34 “Masin diak
duni; maibe masin ne’e lakon nia mer karik, oin sa bele halo nia mer fali? 35
Ba rai no ba foer fatin mos la diak ona, maibe ema soe deit ba liur. Ema
nebe tilun iha atu rona, rona ba!”
|