15
Bibi nebe lakon
1
Publikano no maksalak sira hakbesik Jesus atu rona Nia. 2
Fariseu no eskriba sira hamuu, dehan: “Ema ne’e simu maksalak sira hodi
han hamutuk ho sira.” 3 Tan ne’e, Nia haktuir ba
sira aiknanoik ida ne’e: 4 “Imi ida nebe mak, iha
karik bibi atus ida no lakon tiha ida, la husik sia nulu resin sia seluk iha
rai fuik maran, hodi ba buka to’o hetan ida nebe lakon? 5
Hetan tiha, nia tau bibi ne’e ho ksolok iha nia kbaas. 6
To’o tiha uma, nia bolu belun no maluk sira, hodi dehan ba sira:
‘Haksolok ho ha’u ba, basa ha’u hetan fali ona ha’u nia bibi nebe lakon.’ 7
Ha’u dehan ba imi katak iha lalehan mos sei iha ksolok tamba ema maksalak
ida nebe hakribi nia sala, liu fali tamba ema diak sia nulu resin sia nebe la
kuran atu hakribi sala.”
8
“Eh feto ida nebe mak, iha karik osan mean sanulu, lakon tiha ida, nia la
sunu ahi-oan, dasa uma laran hodi buka di-diak to’o hetan osan nebe lakon? 9
Hetan tiha, nia bolu nia belun no maluk sira, dehan: ‘Haksolok ho ha’u
ba, basa ha’u hetan ona osan mean nebe lakon. 10 Ha’u
dehan ba imi katak Maromak nia anju sira mos sei haksolok tamba ema maksalak
ida nebe hakribi sala.”
11
Nia dehan tan: “Ema ida iha oan mane na’in rua. 12 Ida
kiik dehan ba nia aman: ‘Aman, fo mai ha’u buat ne’e ha’u nian.’ Aman ne’e fahe
tiha nia rikusoi ba sira. 13 Liu tiha loron ruma,
oan kiik ne’e halibur nia rikusoi tomak, hodi ba rai dook ida; iha neba nia
halo naben nia rikusoi tomak, hodi moris aat liu. 14 Nahas
tiha nia sasan tomak, rai neba hamlaha boot. Nia mos hahu hetan susar. 15
Tan ne’e nia ba serbisu ba ema rai na’in ida, nebe haruka nia ba hein
fahi iha nia to’os. 16 Nia kaan atu han ai-fuan
nebe fahi sira han, maibe ema ida la husik. 17 Nia
hanoin, hodi dehan ba nia an: ‘Ha’u nia aman iha atan barak nebe aihan la
kuran; ha’u fali iha ne’e mate hamlaha. 18 Ha’u sei
hamriik hodi ba koalia ho ha’u nia aman, dehan: ‘Aman, ha’u sala hasouru
lalehan no mos hasouru ita. 19 Ha’u la soi ona atu
ita bolu ha’u ita oan. Hare deit ha’u nudar ita nia atan ida.’
19
Nune’e, hamriik tiha, nia ba hasouru nia aman. 20 Nia
sei dook hela, nia aman hare ona nia, hanoin teb-tebes nia, hodi halai ba
hasouru nia, hakoak no rei nia. 21 Nia dehan: ‘Aman,
ha’u sala duni hasouru lalehan no mos hasouru ita; ha’u la soi ona atu ita hare
ha’u nudar oan.’ 22 Maibe aman ne’e dehan ba nia
atan sira: ‘Lori mai lalais unuk furak liu, hodi fo hatais nia; tau kadeli ba
nia liman, sapatu ba nia ain. 23 Lori mai karau oan
bokur ida atu oho. Ita sei han hemu hodi halo festa. 24 Basa
ha’u nia oan ida ne’e mate tiha, maibe moris fali; nia lakon tiha, maibe hetan
fali.’ No sira hahu halo festa.”
25
“Maibe oan boot sei hela iha to’os. Wainhira nia fila fali, hakbesik
dau-daun uma, nia rona ema hananu no bidu. 26 Nia
bolu atan ida, hodi husu buat ne’e sa ida los. 27 Atan
ne’e hatan: ‘O nia alin to’o ona mai no o nia aman oho karau oan bokur, basa
nia to’o ho isin diak.’ 28 Maun boot, laran nakali
teb-tebes, lakohi tama. Tan ne’e, nia aman sai hodi hahu hamaus nia. 29
Maibe nia hatan, hodi dehan ba nia aman: ‘Tinan hira ona mak ha’u serbi
ita, hodi halo tuir nafatin ita nia hakarak, maibe ita la dauk fo bibi oan ida
mai ha’u atu halo festa ho ha’u nia belun sira. 30 Maibe,
wainhira ita nia oan ne’e to’o mai, nebe halakon tiha nia rikusoi tomak ho feto
aat sira, ita oho karau oan bokur ida ba nia.’ 31 Nia
aman hatan ba nia: ‘Ha’u oan, o horik nafatin ho ha’u, no buat hotu nebe ha’u
nian, o nian mos. 32 Maibe ita sei halo festa duni
hodi haksolok, basa o nia alin ne’e mate tiha, maibe moris fali; nia lakon
tiha, maibe hetan fali.’”
|