16
Administrador aat
1
Nia dehan tan ba nia eskolante sira: “Ema riku ida iha emar ida atu hare
nia sasan. Loron ida nia rona katak ema ne’e halo lakon nia rikusoi. 2
Tan ne’e nia bolu emar ne’e, hodi husu ba nia: ‘Sa ida mak ha’u rona kona
ba o? Hatan lai kona ba o nia serbisu, basa houri ohin ba oin o la bele kaer
tan serbisu ne’e.’ 3 Ema ne’e hanoin iha nia laran:
‘Ha’u sei halo sa los, wainhira ha’u nia na’i hasai ha’u housi serbisu? Fila
rai, ha’u la bele; husu esmola, ha’u moe. 4 Ha’u
hatene ona ha’u sei halo sa atu, husik tiha serbisu ne’e, ema seluk simu netik
ha’u.’ 5 Tuir mai nia bolu sira ida-ida nebe debe
nia na’i, hodi dehan ba ida uluk liu: ‘O debe hira ba ha’u nia na’i?’ 6
Nia hatan: ‘Mina botil atus ida.’ Ema ne’e dehan fali: ‘Tur lalais, kaer
o nia nota, hakerek lima nulu.’ 7 Ba ida seluk nia
husu: ‘O debe hira?’ Ida ne’e hatan: ‘Trigu karon atus ida.’ Nia dehan: ‘Kaer o
nia nota, hakerek ualu nulu.’ 8 Na’i hahi ema aat
ne’e tan nia hatene moris. Basa mundu ne’e nia oan sira hatene moris ho nia
maluk sira diak liu fali naroman nia oan sira. 9 Ha’u
dehan ba imi: halo belun sira ho osan aat atu, wainhira osan ne’e nahas tiha
ona, sira sei simu imi iha reinu rohan laek. 10 Ema
nebe halo di-diak knaar kiik, nia halo mos di-diak knaar boot. 11
Ne’e duni, imi la hatene karik kaer osan aat ne’e, se mak sei fo ba imi
rikusoi los? 12 Imi la hare di-diak karik ema seluk
nia sasan, se mak sei saran ba imi imi rasik nia sasan? 13
Atan ida la bele serbi na’i na’in rua: nia sei hakribi ida hodi hadomi
ida seluk, ka nia sei tuir ida hodi hewai ida seluk. Imi la bele serbi Maromak
no osan dala ida.”
14
Fariseu sira, nebe hadomi osan, rona buat hirak ne’e hotu hodi hamnasa
Nia. 15 Jesus dehan ba sira: “Imi mosu nudar ema
diak iha ema sira nia oin, maibe Maromak hatene imi nia fuan. Basa buat nebe
iha folin boot ba ema sira, buat ne’e la folin buat ida ba Maromak. 16
Ukunfuan no profeta sira hela deit to’o Joao; houri tempu neba ema
haklaken tiha ona Maromak nia reinu no ema hotu haka’as an hodi kbiit atu tama
iha nia. 17 Lalehan no rai sei mohu lalais liu fali
ukunfuan baluk ida. 18 Ema nebe husik nia feen hodi
hola fali ema seluk, nia sala adulteriu nian; no ema nebe hola feto nebe nia
laen husik tiha, nia mos halo sala adulteriu nian.”
19
“Ema riku ida hatais mesak mean furak ho kabas lahan lotuk. Loron loron
nia halo festa boot. 20 Ema kiak ida naran Lazaro
tur hela iha nia odamatan. 21 Kiak ne’e hakarak
hili etu mumun housi riku nia meja okos; asu sira belo nia kanek sira. 22
Loron ida ema kiak ne’e mate, Maromak nia anju sira lori nia ba hamutuk
ho Abraao. Ema riku ne’e mos mate, ema hakoi nia. 23 Terus
barak iha infernu, ema riku foti matan hodi hare housi dook Abraao hamutuk ho
Lazaro. 24 Iha oras ne’e nia hasa’e lia, dehan:
‘Ha’u aman Abraao, sadia atan ha’u! Haruka netik Lazaro atu habokon nia liman
fuan iha be, hodi mai halo malirin ha’u nia nanal, basa ha’u terus la diak iha
ahi ne’e!’ 25 Abraao hatan: ‘Oan, hanoin ba, o simu
ona o nia diak iha o nia moris tomak; Lazaro fali simu mak susar deit. Oras
ne’e Lazaro hetan ksolok, o fali hetan terus boot. 26 Hafoin,
housi ami ba imi mos rai kuak boot
haketak ita: ami ida hakarak karik liu ba imi la bele, imi ida hakarak karik
hakat mai ami mos la bele.’ 27 Ema riku ne’e hatan
fali: ‘Ne’e sa, ha’u aman, ha’u husu barak ba ita atu haruka Lazaro ba ha’u nia
uma, basa ha’u iha alin na’in lima; 28 atu fo
hatene ba sira, atu sira keta mai tan fatin terus ne’e!’ 29
Abraao dehan ba nia: ‘Sira iha ona Moises no profeta sira: rona sira ba!’
30 Maibe nia simu fali: ‘Lae, aman Abraao! Matebian
ruma ba karik koalia ho sira, sira sei hakribi sira nia sala.’ 31
Maibe, Abraao dehan: ‘Sira la se tilun karik ba Moises no profeta sira,
maski matebian ida moris hi’as fali, sira mos sei la fiar.’”
|