18

Juis aat

                ¹ Tuir mai, Nia haktuir ba sira aiknanoik ida, hodi hanorin katak ita sei harohan nafatin hodi la bele kole. ² “Iha sidade ida iha tesi lia na’in ida nebe la tauk Maromak, la respeita ema. ³ Iha sidade ne’e mos iha feto faluk ida nebe ba hasouru nia, dehan: ‘Halo lai justisa hasouru ha’u nia maluk.’ ⁴ Dala barak ona mak nia lakohi rona. Maibe loron ida nia dehan ba nia an: ‘Maski ha’u la tauk Maromak, no mos la respeita ema, ⁵ tamba feto faluk ne’e fo bei-beik ulun moras mai ha’u, ha’u sei halo duni justisa atu nia la bele mai halo kole tan ha’u.’ ⁶ Imi rona di-diak buat nebe tesi lia na’in aat ne’e dehan. ⁷ Ne’e duni, Maromak sei la halo justisa ba sira nebe Nia fihir, nebe kalan loron hasa’e lia ba Nia, hodi halo sira hein kleur tan? ⁸ Tebes, Ha’u dehan ba imi, Nia sei halo kedas justisa ba sira. Maibe wainhira Oan Mane sei fila hikas mai, Nia sei hetan fiar iha raiklaran ka lae?”

Fariseu no Publikanu

                ⁹ Hafoin Nia haktuir tan aiknanoik ida ne’e ba ema balun nebe foti an hodi hanoin katak sira ema santu, maibe hakribi ema seluk: ¹⁰ “Ema na’in rua sa’e ba templu atu harohan: ida ema fariseu, ida seluk ema publikanu. ¹¹ Fariseu ne’e hamriik tiha, hodi harohan nune’e: ‘Na’i Maromak, ha’u agradese Ita Boot, basa ha’u la’os hanesan ema seluk: sira mesak ema na’okten, kaanten, laran foer; ha’u la hanesan mos ema publikanu ne’e. ¹² Ha’u hadera an semana ida dala rua. Ha’u selu impostu housi ha’u nia rikusoi tomak.’ ¹³ Publikano fali hamriik dook, la berani atu foti matan, maibe baku deit nia hirus matan, dehan: ‘Na’i Maromak, sadia atan ha’u, ema maksalak!’ ¹⁴ Tebes, Ha’u dehan ba imi katak ema ne’e fila ba uma los ona, ida seluk lae. Basa ema nebe foti an, Na’i sei hatun nia; no ema nebe haraik an, Na’i sei foti nia.”

Jesus ho labarik sira

                ¹⁵ Tuir mai, ema lori ba Nia kiik oan sira atu Nia tau liman ba sira. Hare tiha ne’e, eskolante sira haksi’ak ema sira ne’e. ¹⁶ Maibe Jesus bolu sira, dehan: “Husik labarik sira hakbesik Ha’u; keta duni sira, basa Maromak nia reinu sira nian. ¹⁷ Tebes duni, Ha’u dehan ba imi katak ema nebe la simu Maromak nia reinu hanesan labarik ida, nia sei la tama iha neba.”

Ema riku nebe hakarak tuir Jesus

                ¹⁸ Na’i ulun ida husu ba Nia: “Mestre diak, ha’u sei halo sa ida atu hetan moris rohan laek?” ¹⁹ Jesus hatan ba nia: “Tansa o bolu Ha’u diak? Maromak mesak mak diak. ²⁰ O hatene ukunfuan sira: keta oho ema, keta halo sala foer, keta na’ok, keta duu matak ema, respeitu o nia inan aman.” ²¹ Nia dehan: “Buat ne’e hotu ha’u halo tiha ona houri ha’u sei labarik.” ²² Rona tiha ne’e, Jesus dehan ba nia: “Sei iha tan buat ida ba o: faan tiha o nia rikusoi tomak, hodi fahe osan ba kiak sira; o sei hetan rikusoi barak iha lalehan; hafoin o mai tuir Ha’u.” ²³ Rona tiha buat ne’e, nia neon kraik teb-tebes, basa nia iha rikusoi barak. ²⁴ Hare tiha nia neon kraik, Jesus dehan: “Susar tebes ba ema riku sira atu tama iha Maromak nia reinu! ²⁵ Basa kuda kamelu ida liu housi daum nia kuak lalais liu fali ema riku ida tama iha Maromak nia reinu.” ²⁶ Sira nebe rona, dehan: “Nune’e karik, se los mak bele hetan maksoin?” ²⁷ Jesus hatan: “Buat nebe la bele ba ema, ba Maromak bele deit.” ²⁸ Pedro dehan ba Nia: “Ami husik tiha buat hotu hodi tuir Ita.” ²⁹ Nia hatan ba sira: “Tebes, Ha’u dehan ba imi katak ema nebe husik uma, kaben, inan, aman, maun, alin eh oan sira tamba Maromak nia reinu, ³⁰ nia sei simu barak liu fali iha moris ne’e; no aban bainrua, moris rohan laek.”

Jesus fo hatene kona ba nia mate    

³¹ Tuir mai, Jesus halibur sira na’in sanulu resin rua hodi dehan ba sira: “Rona di-diak; ita sa’e ba Jerusalem. Buat hotu nebe profeta sira hakerek kona ba Oan Mane, sei halo tuir duni. ³² Ema sei saran Nia ba gentiu sira nebe sei hamnasa Nia, koalia aat ba Nia, tafui ba Nia; ³³ baku tiha Nia, sira sei oho Nia; maibe, liu tiha loron tolu, Nia sei moris hi’as.” ³⁴ Maibe sira la komprende liafuan ne’e. Liafuan hirak ne’e haksumik hela ba sira. Sira la komprende buat nebe Nia dehan ba sira.

Ema matan delek housi Jeriko

                ³⁵ Wainhira sira hakbesik Jeriko, ema matan delek ida tur husu esmola iha dalan ninin. ³⁶ Rona tiha ema sira nebe liu dau-daun, nia husu sa ida mak ne’e. ³⁷ Sira dehan ba nia katak Jesus housi Nazare liu dau-daun. ³⁸ Nia hakilar: “Jesus, David nia oan, sadia atan ha’u!” ³⁹ Sira nebe iha oin haksi’ak nia atu nonok tiha, maibe nia hetok foti lia maka’as liu tan: “David nia oan, sadia atan ha’u!” ⁴⁰ Jesus para hodi haruka sira lori nia mai. Wainhira ema matan delek ne’e hakbesik, Jesus husu ba nia: ⁴¹ “O hakarak Ha’u halo sa ida ba o?” Nia hatan: “Na’i, halo ha’u hare!” ⁴² Jesus dehan ba nia: “O ba ona, o nia fiar soi tiha o.” ⁴³ Nia hare kedas no hahu tuir Jesus hodi hawelok Maromak. Hare tiha ne’e, ema hotu hahi Maromak.