19
Zaqueu
1
Tama tiha iha Jeriko, Jesus la’o tesi sidade laran. 2
Ema riku ida horik iha neba. Nia publikanu sira nia ulun, naran Zaqueu. 3
Nia buka namanas atu hare Jesus, maibe la bele tamba ema barak, basa nia
ain badak. 4 Nia halai hodi sa’e ba ai ida atu hare
Jesus, nebe sei liu housi neba. 5 To’o tiha fatin
neba, Jesus foti matan hodi dehan: “Zaqueu, tun mai lalais, basa ohin Ha’u sei
hela iha o nia uma.” 6 Nia tun kedas hodi simu
Jesus ho ksolok boot. 7 Hare tiha ne’e, sira hotu
hamuu, dehan: “Nia tama iha maksalak ida nia uma!” 8 Maibe
Zaqueu hamriik hodi dehan ba Na’i: “Na’i, ha’u sei fahe ha’u nia rikusoi balun
ba kiak sira; ha’u na’ok tiha karik ema ruma nia sasan, ha’u sei selu fali liu
dala haat.” 9 Jesus dehan ba nia: “Ohin maksoin
tama iha uma ne’e, tan ema ne’e mos Abraao nia oan; basa Oan Mane mai buka hodi
soi sira nebe la’o lakon dalan.”
11
Wainhira sira rona tiha buat hirak ne’e, Jesus haktuir tan aiknanoik ida,
tamba Jerusalem besik ona, no mos tamba sira hanoin katak Maromak nia reinu sei
mosu lalais. 12 Nia dehan: “Ema boot ida ba tiha
rai dook atu simu reinu, hafoin nia sei fila fali. 13 Bolu
tiha nia atan na’in sanulu, nia fahe ba sira osan mean sanulu, hodi dehan ba
sira: ‘Fila liman to’o ha’u sei fila fali.’ 14 Maibe
ema sira iha reinu neba lakohi nia. Sira haruka manu-ain sira hodi dehan: ‘Ami
lakohi ema ne’e nudar ami nia liurai.’ 15 Simu tiha
reinu, wainhira nia fila hikas, nia haruka ema bolu atan sira nebe nia fo osan,
atu hatene sira manan hira. 16 Ida uluk mai, dehan:
‘Na’i, ita nia osan ida manan sanulu tan.’ 17 Nia
hatan: ‘Diak tebes, atan diak, tamba o ema los kona ba sasan uitoan, o sei ukun
sidade sanulu.’ 18 Atan seluk mai, dehan: ‘Ha’u
nian manan lima tan.’ 19 Nia hatan: ‘O mos sei ukun
sidade lima.’ 20 Ida seluk mai, dehan: ‘Na’i, ita
nia osan mak ne’e. Ha’u rai di-diak iha hena ida, 21 basa
ha’u tauk ita nebe ema si’akten, nebe foti buat nebe la tau no ku’u buat nebe
la kuda.’ 22 Ba ema ne’e nia simu fali: ‘Tamba o
nia liafuan rasik, ha’u tesi lia todan hasouru o, atan aat. O hatene katak ha’u
ema laran tos, nebe foti buat nebe la tau, ku’u buat nebe la kuda. 23
Ne’e duni, tansa o la hatama ha’u nia osan iha banku atu, fila tiha, ha’u
bele manan nia osan funan?’ 24 Hafoin Nia dehan ba
sira nebe hamriik iha neba: ‘Hasai tiha nia osan, hodi fo fali ba ida nebe iha
sanulu.’ 25 Sira dehan: ‘Na’i, nia iha ona osan
sanulu.’ 26 Maibe nia simu: ‘Ha’u dehan ba imi
katak ba ida nebe iha ona, sei fo tan; maibe housi ida nebe la iha, sei hasai
tan buat nebe nia iha. 27 Kona ba ha’u nia
funubalun sira nebe lakohi ha’u atu ukun sira, lori sira mai iha ne’e, oho tiha
sira iha ha’u nia oin!’” 28 Dehan tiha ne’e, Jesus
la’o hodi sa’e ba Jerusalem.
Wainhira Nia to’o
Betfage no Betania, besik foho ida naran Oliveira, Jesus haruka eskolante na’in
rua, dehan: 30 “Imi ba iha knua iha oin. To’o tiha
neba, imi sei hetan kuda oan ida, nebe ema la dauk sa'e, kesi hela. Imi kore
tiha nia, hodi lori mai. 31 Ema ruma husu karik
tansa imi kore nia, imi sei hateten nune’e: ‘Na’i presisa nia.’” 32
Sira na’in rua ba, hodi hetan buat hotu nudar Jesus dehan. 33
Wainhira sira kore dau-daun, kuda na’in dehan ba sira: “Tansa imi kore
kuda oan?” 34 Sira hatan: “Na’i presisa nia.” 35
Sira lori nia ba Jesus. Hafoin, tau tiha sira nia hatais iha kuda leten,
sira tulun Jesus atu sa’e. 36 Wainhira Nia liu
dau-daun, sira nahe sira nia hatais iha dalan. 37 Besik
ona atu to’o foho Oliveira, ema lubun boot nebe tuir Jesus hahu hawelok Maromak
ho ksolok no lia maka’as tan buat diak nebe sira hare, dehan: 38
“Rahun diak ba ida nebe mai nudar liurai hodi Na’i nia naran! Dame iha
lalehan, gloria iha leten aas ba!”
39
Housi ema lubun boot sira leet, fariseu balun dehan ba Jesus: “Mestre,
haksi’ak o nia eskolante sira!” 40 Maibe Jesus
hatan: “Ha’u dehan ba imi katak, sira ne’e nonok karik, fatuk sira mak sei
hakilar!”
41 Hakbesik tiha hodi hare sidade, Jesus tanis
tamba nia, dehan: 41 “O hatene karik ohin loron ne’e Ida nebe lori dame ba o! Maibe
buat ne’e subar hela ba o nia matan. 43 Loron sei mai
wainhira o nia funubalun sira sei hada rai hodi hale’u o housi fatin hotu; 44
sira sei hanehan o ba rai, no mos o nia oan sira iha o nia laran; sira
sei la husik fatuk ida hamriik iha fatuk seluk nia leten, basa o la hatene
nanis loron nebe o simu Na’i nia visita ne’e.”
45
Tuir mai, tama tiha iha templu, Nia hahu duni sai sira nebe halo
kontratu, hodi dehan ba sira: 46 “Hakerek tiha ona:
‘Ha’u nia uma uma orasaun nian; maibe imi halo tiha nia na’okten sira nia luhan
nian!”
47 Loron
loron Nia hanorin iha templu. Am’lulik sira nia ulun sira, eskriba sira no mos
na’i ulun sira povu nian buka atu halakon Nia. 48 Maibe
sira la hatene atu halo oin sa, basa povu tomak hakarak teb-tebes rona Nia.
|