20
Jesus nia kbiit
1
Loron ida, wainhira Nia hanorin povu iha templu hodi haklaken evangeliu,
am’lulik nia ulun sira, eskriba sira no katuas sira hakbesik hodi hateten ba
Nia: 2 “Dehan to’ok mai ami ho kbiit ida nebe mak
o halo buat hirak ne’e, ka se mak fo kbiit ne’e ba o.” 3 Jesus
hatan ba sira: “Ha’u mos sei husu buat ida ba imi. Dehan to’ok mai Ha’u: 4
Joao nia baptismu mai housi lalehan ka housi ema sira?” 5
Sira hanoin hodi dehan ba malu: “Ita hatan karik ‘Housi lalehan’, Nia sei
husu: ‘Tansa imi la fiar nia?’ 6 Ita hatan karik
‘Housi ema sira’, povu tomak sei tuda ita ho fatuk, basa sira hare Joao nudar
profeta.” 7 Tan ne’e, sira hatan katak sira la
hatene housi nebe. 8 Jesus dehan ba sira: “Ha’u mos
sei la dehan ba imi ho kbiit ida nebe mak Ha’u halo buat hirak ne’e.”
9
Tuir mai, Nia hahu haktuir ba povu aiknanoik ida ne’e: “Ema ida kuda uvas
iha to’os ida, nebe nia aluga ba serbisu na’in sira. Hafoin nia ba dook hodi
hela kleur. 10 Wainhira tempu to’o ona, nia haruka
atan ida ba serbisu na’in sira atu sira ne’e fo ba nia housi to’os nia fuan.
Maibe sira baku nia, hodi duni sai nia ho liman mamuk. 11
Liu tiha ne’e, nia haruka atan ida seluk, maibe ida ne’e mos sira baku,
hanehan no duni sai ho liman mamuk. 12 Ba dala tolu
nia haruka ida tan, nebe sira hakanek hodi soe ba liur. 13
Ikus mai, to’os na’in dehan: ‘Ha’u sei halo sa los? Ha’u sei haruka ha’u
nia oan doben. Hare tiha nia, sira sei respeita nia karik.’ 14
Maibe, hare tiha nia, serbisu na’in sira dehan ba malu: ‘Ida ne’e mak
liman rohan na’in. Ita ba oho nia, atu liman rohan monu ba ita nia liman.’ 15
Nune’e, soe tiha nia ba to’os liur, sira oho nia. To’os na’in sei halo sa
los ba sira? 16 Nia sei mai, hodi oho serbisu na’in
sira ne’e, hafoin sei saran to’os ne’e ba ema seluk.” Rona tiha ne’e, sira simu
dehan: “Ne’e la bele!” 17 Maibe, hateke dau-daun ba
sira, Jesus dehan ba sira: “Lia nebe hakerek ne’e dehan katak sa: ‘Fatuk nebe
badaen sira hewai, sai fali fatuk inan?’ 18 Sira
hotu nebe monu iha fatuk ne’e nia leten sei mohu hela; fatuk ne’e monu karik
iha ema ruma nia leten, sei hanehan nia.” 19 Eskriba
sira no na’i ulun am’lulik sira nian haka’as an atu kaer Nia, basa sira hatene
katak aiknanoik ida ne’e kona ba sira, maibe sira tauk povu.
20
Sira hafu Nia sub-subar, hodi haruka emar sira nebe hakfudik nudar ema
diak, atu kaer Nia iha liafuan ruma, atu nune’e sira bele saran Nia ba
gubernador nia liman no kbiit. 21 Sira husu ba Nia:
“Mestre, ami hatene katak Ita koalia no hanorin ho lialos, la fihir ema, maibe hatudu
Maromak nia dalan tuir lialos. 22 Ami bele selu
impostu ba Cesar ka lae?” 23 Hatene tiha sira nia
laran makerek, Nia hatan ba sira: 24 “Hatudu lai
mai Ha’u osan denariu ida. Ilas ho hakerek ne’e, se nian?” Sira hatan: “Cesar
nian.” 25 Nia dehan fali: “Ne’e duni, fo ba Cesar
buat nebe Cesar nian, no ba Maromak buat nebe Maromak nian.” 26
Sira la biban atu kaer Nia iha lia sala ida iha povu nia oin; hakfodak
tiha ho nia liafuan, sira nonok tiha.
27
Ema saduseu balun, nebe la fiar moris hi’as, hakbesik hodi husu ba Nia: 28
“Mestre, Moises hakerek katak mane ida mate karik hodi husik nia feen
maibe oan la iha, nia alin mane sei hola feto faluk ne’e atu fo oan sira ba nia
maun. 29 Iha kedas maun alin na’in hitu. Ida uluk
hola feto, hodi mate oan la iha. 30 Alin nebe tuir nia
kaben fali ho feto faluk ne’e; tuir mai ida seluk, nune’e mos sira na’in hitu
mate hotu la husik oan ida. 32 Ikus liu, feto faluk
mos mate. 33 Ne’e duni, iha loron moris hi’as nian,
feto ne’e se nia feen los? Basa sira na’in hitu hola tiha nia” 34
Jesus dehan ba sira: “Mundu ne’e nia oan sira hola malu nudar laen feen, 35
maibe sira nebe soi ba mundu seluk no ba moris hi’as housi mate sira
leet, sira ne’e la kaben, 36 tan sira la bele mate
tan, basa sira hanesan anju sira. Nudar moris hi’as nia oan sira, sira Maromak
nia oan. 37 Kona ba moris hi’as ema mate sira nian,
Moises rasik mak hatudu hodi hakerek kona ba ai-tarak nebe lakan maibe ahi la
han, wainhira nia bolu Na’i ‘Abraao nia Maromak, Isaac nia Maromak, no Jacob
nia Maromak.’ 38 Nia la’os ema mate sira nia
Maromak, maibe ema moris sira nian; basa ba
Na’i, ema hotu moris hela.” 39 Tuir mai,
eskriba balun simu hodi dehan: “Mestre, Ita koalia los.” 40
No sira la berani atu husu tan buat ida.
41
Nia dehan ba sira: “Oin sa ema dehan katak Messias mak David nia oan? 42
Basa David rasik mak dehan iha livru salmu sira nian: ‘Na’i dehan ba ha’u
nia Na’i: Tur iha Ha’u nia sorin kuana, 43 to’o
Ha’u tau O nia funubalun sira iha O nia ain sira okos.’ 44
David bolu Nia karik ‘Na’i,’ nusa mak nia bele sai nia oan fali?” 45
Wainhira povu tomak rona Nia, Jesus dehan ba nia eskolante sira: 46
“Imi matan moris kona ba eskriba sira nebe gosta la’o ho hatais naruk atu
ema kumprimenta sira iha luron, hodi buka fatin uluk iha sinagoga no iha festa
sira; 47 nebe han feto faluk sira nia sasan sira
hodi hakfudik hamulak barak: sira ne’e sei hetan kastigu aat liu.”
|