|
21
Feto faluk nia esmola
1
Foti tiha matan, Nia hare ema riku sira tau esmola iha osan fatin templu
nian. 2 Nia hare mos feto faluk kiak ida nebe tau
nia esmola kiik. 3 Nia dehan: “Tebes, Ha’u dehan ba
imi katak feto faluk kiak ne’e tau osan folin liu sira seluk hotu, 4
basa housi buat nebe resin, sira fo buat karan ba Maromak, maibe ema kiak
ne’e saran buat hotu nebe nia iha atu moris.”
5
Tan ema balun koalia kona ba templu hodi hateten katak ema hafutar nia ho
fatuk mesa furak no buat karan sira, Jesus dehan: 6 “Loron
sei to’o wainhira buat nebe imi hare dau-daun ne’e sei sobu hotu; fatuk ida sei
la hela iha fatuk seluk nia leten.” 7 Sira husu ba
Nia: “Mestre, wainhira mak buat hirak ne’e mosu? Sira sei hahu ho sinal ida
nebe?” 8 Nia hatan: “Hare ba, atu ema keta lohi
imi; basa ema barak sei mosu mai hodi ha’u nia naran, dehan ‘Mak ha’u!’ eh
‘Loron besik ona!’ Imi keta tuir sira. 9 Wainhira
imi rona koalia kona ba funu no revolusaun sira, keta tauk, basa buat hirak
ne’e hotu sei mosu uluk, maibe ne’e la’os katak rohan to’o ona mai.” 10
Hafoin Nia dehan ba sira: “Povu ida sei hamriik halo funu hasouru povu seluk,
reinu ida hasouru reinu seluk. 11 Rai sei nakdoko
maka’as; iha fatin oi-oin ema sei hamlaha, moras peste sei mosu; buat nebe halo
ema tauk sei mosu mai, ho sinal bo-boot sira iha lalehan. 12
Maibe uluk liu buat ne’e hotu, ema sei kaer imi, sei duni imi, sei lori
imi ba sinagoga no hatama imi iha dadur laran. Ema sei saran imi ba liurai no
emboot sira hodi Ha’u nia naran; 13 maibe imi sei
biban atu fo sasin. 14 Ne’e duni, keta haluha, imi
lalika hanoin resin atu hatan oin sa; 15 basa Ha’u
sei fo ba imi lia matenek, nebe imi nia funubalun sira hotu sei la bele tahan
eh koalia hasouru. 16 Imi nia aman inan, maun alin,
parenti no belun sira mak sei saran imi. Ema sei oho imi balun. 17
Ema hotu sei hakribi imi tan Ha’u nia naran. 18 Maibe
imi nia fuuk lahan ida mos sei la monu lakon. 19 Imi
fiar metin nafatin karik, imi sei soi imi nia klamar.”
20
“Wainhira imi hare soldadu sira hale’u Jerusalem, imi sei hatene los
katak nia besik ona atu mohu. 21 Iha loron ne’e
sira nebe iha Judeia, halai ba foho sira; sira nebe iha sidade laran, sai tiha;
sira nebe iha to’os, keta tama fali iha sidade. 22 Basa
ne’e mak loron kastigu nian, iha nebe sei sai tuir los buat nebe hakerek ona. 23
Rahun aat ba feto sira nebe ko’us eh hasusu iha loron ne’e, basa sei iha
tauk boot no hirus hasouru povu ne’e. 24 Sira sei
monu iha surik kroat nia okos, ema sei lori sira hanesan ema dadur ba rai hotu,
no gentiu sira sei sobu rahun Jerusalem to’o sira nia otas sei hotu ona.”
25
“Sinal sira sei mosu iha loron, iha fulan no fitun sira. Iha raiklaran,
nasaun sira sei susar no tauk teb-tebes tamba tarutu housi laloran no tasi
nian. 26 Ema sira sei mate deit tamba tauk, hodi
hanoin sa ida mak sei mosu iha raiklaran, basa lalehan nia kbiit sei nakdoko. 27
Iha oras ne’e, sira sei hare Oan Mane tun mai iha kalohan ida ho kbiit no
gloria wa’in tebes. 28 Wainhira buat hirak ne’e sei
mosu, imi aten berani, hodi foti matan ba leten, basa imi nia Maksoin besik
ona.”
29
Nia haktuir tan ba sira aiknanoik ida ne’e: “Imi hare di-diak ai figueira
no ai sira seluk. 30 Wainhira sira hahu hatubun
tahan nurak, imi hatene katak bainloron besik ona. 31 Nune’e
mos, wainhira imi hare buat hirak ne’e mosu, imi sei hatene katak Maromak nia
reinu besik ona. 32 Tebes Ha’u dehan ba imi: otas
ne’e sei la liu, to’o buat ne’e mosu. 33 Lalehan no
rai sei liu, maibe Ha’u nia liafuan sira sei la liu.”
34
“Imi matan moris neon na’in ba; imi laran keta todan tan hahalok aat
sira, tan lanu, tan fo neon resin ba moris ne’e, atu loron ne’e keta to’o
teki-teki deit; 35 basa nia sei monu hanesan hani ida
ba ema hotu iha raiklaran tomak. 36 Ne’e duni, imi
matan moris hodi hamulak nafatin, atu imi bele hetan kbiit hodi hadook an housi
buat hotu nebe sei mosu no bele hamriik metin iha Oan Mane nia oin.”
37 Iha loron, Jesus hanorin iha templu, maibe
iha kalan Nia hela iha foho ida naran Oliveira. 38 Iha
dadersan povu tomak ba iha templu atu rona Nia.
|