22

Judas saran Jesus

                ¹ Loron festa Paun fermentu laek nian, naran Paskua, besik dau-daun ona. ² Am’lulik nia ulun sira no eskriba sira buka dau-daun oin sa atu halakon Nia, maibe sira tauk povu. ³ Satanas tama tiha iha Judas, naran Iscariotes, housi sira na’in sanulu resin rua ne’e ida, nia laran. ⁴ Nia ba koalia ho am’lulik no na’i ulun sira kona ba atu saran Jesus ba sira. ⁵ Sira haksolok no sira hakotu lia atu fo osan ba nia. ⁶ Judas simu hodi buka loron atu saran Jesus wainhira ema sira la hatene.

Hadia Paskua

                ⁷ To’o tiha loron Paun fermentu laek nian, wainhira sira oho bibi oan Paskua nian. ⁸ Jesus haruka Pedro ho Joao, dehan: “Imi ba hadia Paskua ba ita atu han.”  ⁹ Sira husu ba Nia: “Ita hakarak ami hadia iha nebe?” ¹⁰ Nia hatan: “Tama tiha iha sidade, ema ida nebe lori kusi be nian sei mai hasouru imi. Imi tuir nia to’o uma nebe nia tama, ¹¹ hodi dehan ba uma na’in: ‘Mestre husu, fatin nebe Nia sei han Paskua ho nia eskolante sira mak iha nebe?’ ¹² Nia sei hatudu ba imi han fatin boot iha andar leten. Imi sei hadia iha neba.” ¹³ Sira ba, hodi hetan buat hotu nudar Nia dehan ba sira; hafoin sira hadia Paskua.

Jesus nia han-hemu dala ikus

                ¹⁴ Wainhira oras to’o ona, Nia tur atu han hamutuk ho apostolu na’in sanulu resin rua. ¹⁵ Nia dehan ba sira: “Hodi kbiit, Ha’u hakarak teb-tebes han Paskua ne’e ho imi molok Ha’u terus.  ¹⁶ Basa Ha’u dehan ba imi katak Ha’u sei la han tan nia to’o nia sei sai los iha Maromak nia reinu.”  ¹⁷ Kaer tiha kalis, Jesus fo agradese, dehan:  “Imi simu ba, hodi fahe ba malu; ¹⁸ basa Ha’u sei la hemu tan tua uvas fuan nian to’o Maromak nia reinu to’o mai.”

                ¹⁹ Hafoin, hola tiha paun hodi fo obrigadu, Nia silu hodi fahe, dehan: “Ne’e Ha’u nia isin, nebe sei saran tamba imi; halo ida ne’e hodi hanoin Ha’u.” ²⁰ Han hotu tiha, Nia halo nune’e mos ho kalis, dehan: “Ne’e kalis moruk foun nian iha Ha’u nia ran, nebe sei nakfakar tamba imi. ²¹ Maibe ema nebe atu saran Ha’u ba mate, nia liman besik Ha’u nian iha meja. ²² Basa Oan Mane atu ba ona duni, tuir buat nebe hakotu tiha ona; maibe susar ba ema nebe saran Nia!” ²³ No sira hahu husu ba malu sira ida nebe mak sei halo buat ne’e.

Se mak boot liu

                ²⁴ Tuir mai, sira hahu haksesuk malu kona ba sira ida nebe mak boot liu hotu. ²⁵ Jesus dehan ba sira: “Liurai nasaun sira nian ukun ho kroat, no ema hanaran sira nebe ukun sira ‘tulun na’in.’ ²⁶ Imi fali keta halo nune’e; maibe ida nebe boot liu iha imi leet, nia sei halo an nudar kiik liu; ida nebe ukun sei halo an nudar atan. ²⁷ Basa, ida nebe mak boot liu: ida nebe tur han iha meja, ka ida nebe serbi? La’os ida nebe tur han? Ha’u iha imi leet nudar ida nebe serbi. ²⁸ Imi hela tiha hamutuk ho Ha’u iha Ha’u nia susar oi-oin, ²⁹ no Ha’u saran ba imi reinu nebe Ha’u Aman saran mai Ha’u, ³⁰ atu imi bele han hemu hamutuk ho Ha’u iha Ha’u nia reinu, hodi tur iha kadunan sira atu tesi lia ba Israel nia uma-kain sanulu resin rua.”

Pedro sei heli lia kona ba Jesus

                ³¹ “Simao, Simao, hare ba, Satanas husu ona kbiit atu doko imi hodi tais hanesan trigu. ³² Maibe Ha’u harohan ona ba o, atu o nia fiar keta monu; hafoin wainhira o fila fali ba diak, o sei fo aten berani ba o nia maun alin sira.”  ³³ Nia hatan:  “Na’i, ha’u sei ba hamutuk ho Ita to’o dadur no mos to’o mate!” ³⁴ Jesus dehan ba nia:  “Ha’u dehan ba o, Pedro: ohin, molok manu kokorek, o sei heli lia dala tolu katak o la hatene Ha’u.”

                ³⁵ Nia dehan tan: “Wainhira Ha’u haruka imi atu ba, hodi la bele lori kohe, osan no sandalias, imi kuran buat ruma?” ³⁶ Sira hatan: “Lae.” Nia dehan ba sira: “Maibe, oras ne’e ema nebe la iha kohe, hola ida ba, nune’e mos nia karon; no ida nebe la iha surik, faan tiha nia unuk, hodi sosa netik surik ida. ³⁷ Basa Ha’u dehan ba imi katak sei sai tuir lo-los iha Ha’u buat nebe hakerek nanis ona: ‘Sira tau Ha’u iha ema aat sira leet.’ Tebes, buat nebe kona Ha’u besik ona nia rohan.” ³⁸ Sira dehan ba Nia: “Na’i, iha ne’e iha surik rua.” Maibe Nia hatan ba sira: “To’o ona.”

Hanorin iha foho Oliveira

                ³⁹ Sai tiha housi uma, Jesus, hanesan bai-bain, la’o ba foho Oliveira; nia eskolante sira mos tuir Nia. ⁴⁰ To’o tiha neba, Nia dehan ba sira: “Imi harohan ba, atu imi keta monu ba babeur.” ⁴¹ Hafoin Nia hadook an housi sira, dook hanesan wainhira ema tuda fatuk. Nia hakneak hodi hahu hamulak nune’e: ⁴² “Aman, Ita hakarak karik hadook tiha kalis ne’e housi Ha’u; maibe halo tuir Ita nia hakarak ba, la’os Ha’u nian.” ⁴³ Iha oras ne’e, anju ida mosu housi lalehan hodi haksolok netik Nia. ⁴⁴ Ho laran susar teb-tebes, Nia hamulak ho neon ho laran liu tan. Nia kosarben sai hanesan ran nebe suli ba rai.

⁴⁵ Harohan hotu tiha, Nia hamriik hodi ba buka nia eskolante sira; ho neon sala, Nia hetan sira toba hela. ⁴⁶ Nia dehan ba sira: “Tansa imi toba? Hamriik ba hodi harohan, atu imi keta monu ba babeur.”

Sira kaer Jesus

                ⁴⁷ Nia sei koalia hela, ema lubun boot ida mosu mai. Ida nebe naran Judas, sira na’in sanulu resin rua ne’e ida, mai iha oin. Nia hakbesik hodi rei Jesus. ⁴⁸ Jesus dehan ba Nia:  “Judas, hodi rei Ha’u mak o saran Oan Mane ba mate?”  ⁴⁹ Hare tiha buat nebe atu mosu dau-daun, sira nebe hale’u Jesus husu ba Nia: “Na’i, ami bele hakanek ho surik, ka lae?” ⁵⁹ Sira ida hakanek tiha am’lulik boot nia atan ida, ho tesi nia tilun kuana. ⁵¹ Maibe Jesus dehan: “To’o ona!” Hafoin, kona tiha atan ne’e nia tilun, Jesus halo nia kanek sai diak fali. ⁵² Tuir mai, Nia dehan ba sira nebe mai hasouru Nia, ba am’lulik sira nia na’i ulun sira, na’i ulun sira templu nian no katuas sira: “Imi mai ho surik no ai-tonka sira hanesan hasouru na’okten ida? ⁵³ Loron loron Ha’u hela ho imi iha templu, imi la halo buat ida mai Ha’u; maibe ne’e imi nia loron, ne’e nakukun nia ukun.”

Pedro heli lia kona ba Jesus

                ⁵⁴ Kaer tiha Jesus, sira lori Nia ba am’lulik boot nia uma. Pedro la’o tuir housi dook. ⁵⁵ Sira sunu ahi ida iha uma oin, hodi tur hadulas; Pedro mos iha sira leet. ⁵⁶ Hare tiha nia haneruk ahi, atan feto ida fihir nia, hodi dehan: “Ema ne’e mos hela ho Jesus.” ⁵⁷ Maibe Pedro heli lia, dehan: “Feto, ha’u la hatene Nia!” ⁵⁸ La kleur ida seluk, hare tiha nia, dehan: “O mos Nia maluk ida!” Maibe Pedro hatan: “Ha’u lae!” ⁵⁹ Liu tiha besik oras ida, ida seluk litik: “Tebes, ida ne’e mos hela ho Nia, tan nia mos ema Galileu.” ⁶⁰ Pedro simu dehan: “Ha’u la hatene buat nebe o dehan!” Iha oras ne’e kedas, wainhira nia sei koalia hela, manu kokorek. ⁶¹ Fila tiha oin, Na’i hateke ba Pedro. Pedro hanoin fali Na’i nia liafuan uluk, nebe dehan: “Molok manu kokorek, o sei heli lia dala tolu kona ba Ha’u.” ⁶² Sai tiha ba liur, Pedro tanis ho neon sala teb-tebes.

Judeu sira tesi lia

                ⁶³ Ema sira nebe kaer Jesus hahu hamoe no haterus Nia. ⁶⁴ Sira taka Nia futar oin, hodi husu ba Nia: “O si’ik to’ok: se mak baku o?” ⁶⁵ Sira foti lia aat barak hasouru Nia.

                ⁶⁶ Molok rai-hun mutin, katuas sira povu nian, am’lulik no eskriba sira nia ulun sira halibur an hamutuk. Sira lori Jesus atu tesi lia hasouru Nia. ⁶⁷ Sira dehan:  “O Messias karik, hateten mai ami ba.” Nia dehan ba sira: “Ha’u hateten karik, imi sei la fiar Ha’u; ⁶⁸ Ha’u husu imi karik, imi sei la hatan. ⁶⁹ Maibe houri ohin ba oin Oan Mane sei tur iha Maromak nia futar sorin.” ⁷⁰ Sira hotu dehan: “Ne’e duni, O Maromak Oan, ka?” Nia hatan: “Imi dehan los, Ha’u duni.” ⁷¹ Sira dehan: “Ita hakarak sasin sa ida tan? Ita nia tilun rasik mak rona housi nia ibun!”