Índice | Palavras: Alfabética - Freqüência - Invertidas - Tamanho - Estatísticas | Ajuda | Biblioteca IntraText

New Testament in tetum

IntraText CT - Texto

  • LUCAS
    • 24
Precedente - Sucessivo

Clicar aqui para desativar os links de concordâncias

24

 

Jesus moris hias

                1 Iha loron uluk semana nian, iha rai hun mutin, sira ba too rate, hodi lori mina morin nebe sira hadia. 2 Sira hetan fatuk duir tiha ona. 3 Tama tiha iha laran, sira la hetan Nai Jesus nia isin. 4 Sira sei hanoin hela, wainhira ema nain rua ho unuk nabilan mosu iha sira leet. 5 Tan feto sira tauk, hodi hakruuk ba rai, ema sira nee dehan ba sira: “Tansa imi buka ema moris iha mate sira leet? 6 Nia la iha nee; Nia moris hias ona! Imi hanoin fali oin sa Nia koalia ba imi, wainhira Nia sei iha Galileia, dehan: 7 Ema sei saran Oan Mane ba maksalak sira liman, nebe sei hedi Nia ba krus; liu loron tolu, Nia sei moris hias.’” 8 No sira hanoin fali Jesus nia liafuan sira.

                9 Fila tiha housi rate, sira ba haktuir buat hirak nee hotu ba sira nain sanulu resin ida no ba sira seluk hotu. 10 Feto sira nebe haktuir ba apostolu sira buat hirak nee mak Maria Madalena, Joana ho Maria, Tiago nia inan, no mos sira seluk nebe lao hamutuk ho sira. 11 Maibe sira rona lia hirak nee nudar lia bulak, tan nee sira la fiar. 12 Maibe Pedro hamriik hodi ba lalais rate. Hakruuk tiha, nia hare deit hena sira. Nia fila fali ba uma, hodi hakfodak ho buat nebe mosu tiha.

 

Dalan Emaus nian

13 Iha loron neba eskolante nain rua lao ba knua ida naran Emaus, besik kilometru ualu housi Jerusalem. 14 Sira koalia ba malu kona ba buat nebe mosu ona. 15 Sira sei koalia hodi haksesuk malu dau-daun, Jesus rasik hakbesik hodi lao hamutuk ho sira. 16 Maibe sira nia matan la dauk nakloke atu hatene Nia. 17 Nia dehan ba sira: “Imi koalia ba malu kona ba sa ida tuir dalan?” Sira para tiha ho oin kraik. 18 Sira ida naran Cleofas simu, hodi dehan: “Ita mesak ema housi rai seluk iha Jerusalem mak la hatene buat nebe mosu iha neba iha loron hirak nee?” 19 Nia husu ba sira: “Sa ida?” Sira hatan: “Kona ba Jesus Nazare, profeta ida beran boot iha lia no hahalok, iha Maromak no povu tomak nia oin: 20 oin sa ita nia amlulik no nai ulun sira saran Nia ba mate hodi hedi Nia ba krus. 21 Ami hanoin katak Nia mak atu soi Israel, maibe liu ona loron tolu mak buat hirak nee mosu. 22 Los duni, ami nia feto balun halo ami hakfodak, basa dadersan hela, sira ba rate; 23 hafoin, la hetan Nia isin, sira mai haktuir katak sira hare anju sira nebe dehan katak Nia moris hi'as ona. 24 Ami nia maluk balun mos ba too rate, hodi hetan buat hotu hanesan feto sira haktuir; maibe sira la hare Nia.”

                25 Nia dehan ba sira: “Imi ema beik duni, no neon badak atu fiar buat hotu nebe profeta sira hateten! 26 Mesias sei terus buat hirak nee atu nunee Nia bele tama iha Nia gloria?” 27 Hafoin, hahu ho Moises no profeta sira hotu, Nia hanorin ba sira buat hotu nebe hakerek iha Eskritura tomak kona ba Nia. 28 Besik ona knua nebe sira atu ba, Nia hakfudik atu lao ba oin. 29 Maibe sira husu makaas ba Nia, dehan: “Hela ho ami, basa kalan besik ona, loron mos monu dau-daun ona.” Nia tama ho sira. 30 Hafoin, tur tiha atu han ho sira, Nia kaer paun, fo bensa, silu hodi fahe ba sira. 31 Sira nia matan nakloke, hodi hatene Jesus; maibe Nia lakon kedas housi sira oin. 32 Sira dehan ba malu: “Ita nia laran la manas wainhira Nia koalia tuir dalan hodi hanorin Eskritura?”           

                33 Sira hamriik kedas, hodi fila fali ba Jerusalem. Iha neba sira hetan sira nain sanulu resin ida halibur hamutuk ho maluk sira seluk, 34 nebe dehan ba sira: “Tebes, Nai moris hias ona, hodi mosu ba Simao!” 35 Tuir mai, sira haktuir buat nebe mosu iha dalan, oin sa sira hatene Jesus wainhira Nia silu paun.

 

Jesus mosu ba eskolante sira

                36 Sira sei koalia hela, Jesus hamriik iha sira leet, hodi dehan ba sira: “Dame hela ho imi!” 37 Sira hakfodak no tauk, hodi hanoin katak sira hare mate klamar ida. 38 Nia husu ba sira: “Tansa imi fuan taridu hodi husu buat barak iha imi laran? 39 Hare hau nia liman no ain ba: Hau mak nee duni! Imi kaer Hau ba, hodi hare katak mate klamar ida isin ho ruin la iha, nudar imi hare Hau iha.” 40 Dehan tiha nee, Nia hatudu ba sira nia liman no ain. 41 Maibe sira la fiar, hodi hakfodak ho ksolok boot. Nia dehan: “Imi iha buat ruma atu han?” 42 Sira fo ba Nia ikan tunu baluk ida. 43 Nia simu, hodi han iha sira oin. 44 Hafoin Nia dehan ba sira: “Wainhira Hau sei iha imi leet, Hau dehan ba imi liafuan hirak nee: katak sei sai tuir los lia hotu nebe Moises, profeta no salmu sira hakerek kona ba Hau iha Eskritura.”  45 Tuir mai, Nia loke sira neon atu hatene lo-los Eskritura46 hodi dehan ba sira: “Hakerek tiha ona, nunee mak Messias sei hetan terus no, liu loron tolu, sei moris hias. 47 Hodi nia naran sei haklaken ba nasaun hot-hotu laran moras no perdua ba sala sira, hahu housi Jerusalem. 48 Imi mak sasin kona ba buat hirak nee. 49 Hau sei haruka ba imi Ida nebe hau Aman hakotu tiha ona; imi hela lai iha sidade, too imi simu tiha kbiit housi leten.”

 

Jesus sae ba lalehan

                50 Hafoin Jesus lori sira too besik Betania. Iha neba, Nia foti liman, hodi haraik bensa ba sira. 51 Wainhira Nia sei fo bensa dau-daun, Nia hadook an housi sira, hodi sae ba lalehan. 52 Sira hakneak iha nia oin, hafoin sira fila ho ksolok boot ba Jerusalem. 53 Loron loron sira halibur iha templu, hodi hahi hanai Maromak.




Precedente - Sucessivo

Índice | Palavras: Alfabética - Freqüência - Invertidas - Tamanho - Estatísticas | Ajuda | Biblioteca IntraText

Best viewed with any browser at 800x600 or 768x1024 on Tablet PC
IntraText® (V89) - Some rights reserved by EuloTech SRL - 1996-2007. Content in this page is licensed under a Creative Commons License