JOAO

1

Lia hahu nian

                 ¹ Houri uluk kedas liafuan iha nanis; liafuan horik nanis ho Maromak. ² Houri uluk kedas Nia horik hamutuk ho Maromak. ³ Maromak halo buat hotu hodi Nia; la hodi Nia buat ida la moris. ⁴ Nia mak moris Na’in, no moris ne’e mak ema nia naroman. ⁵ Naroman nabilan hela iha nakukun laran; nakukun la bele halakon nia.

                 ⁶ Mane ida mosu mai nebe Maromak mak haruka; nia naran Joao. ⁷ Nia mai nudar sasin ida atu fo sasin kona ba naroman atu ema hotu bele fiar hodi nia. ⁸ Nia la’os naroman maibe nia mosu atu fo sasin kona ba naroman. ⁹ Naroman los mai iha raiklaran, naroman nebe leno ema hot‑hotu. ¹⁰ Nia horik nanis iha raiklaran; Nia rasik mak hakiak raiklaran, maibe raiklaran la hatene Nia. ¹¹ Nia mai ba nia emar sira, maibe sira ne’e la simu Nia. ¹² Maibe, ba ema sira nebe simu Nia hodi fiar nia naran, Nia haraik kbiit atu sai Maromak nia oan. ¹³ Ema sira ne’e la mai housi ema nia ran, eh tuir ema nia isin nia hakarak; la’os housi ema nia hakarak, maibe housi Maromak. ¹⁴ Liafuan ne’e halo An ba mane. Nia horik duni ho ita. Ami hare tebes nia gloria, gloria nebe Nia simu housi Aman, nudar Oan Mane mesak, kmanek no los teb-tebes. ¹⁵ Joao fo sasin kona ba Nia, dehan: “Ema ne’e mak Ida nebe ha’u dehan ona katak Nia nebe tuir ha’u mak uluk tiha ha’u, basa Nia uluk liu ha’u.” ¹⁶ Housi nia diak nakonu mak ita simu diak oi-oin tu-tuir malu. ¹⁷ Basa ukunfuan mai housi Moises, maibe grasa no lialos mai housi Jesus Kristu. ¹⁸ Ema ida la dauk hare Maromak; maibe Oan mane mesak nebe horik ho Aman, Nia mak haklaken Maromak.

Joao fo sasin kona ba nia an

                 ¹⁹ Ida ne’e mak Joao nia sasin wainhira Judeu sira housi Jerusalem haruka am’lulik no levita sira atu husu ba nia: “O se los?” ²⁰ Nia dehan sai, la heli lia dehan: “Ha’u la’os Messias.”  ²¹ Sira husu ba nia: “O se los? O Elias?” Nia hatan, “Lae.” “O Profeta?” nia hatan: “Lae.” ²² Sira dehan ba nia: “O se los atu ami bele fo hatene ba sira nebe haruka ami mai. O dehan sa ida kona ba o nia an?” ²³ Nia dehan sai hanesan profeta Isaias hateten: “Ha’u mak lia nebe hakilar iha rai fuik maran. Imi sei halos Na’i nia dalan.” ²⁴ Sira ne’e fariseu sira mak haruka, ²⁵ Sira husu ba nia: “O la’os Messias, la’os Elias, la’os profeta: nusa mak o sarani ema?” ²⁶ Joao hatan ba sira: “Ha’u sarani ho be, maibe iha imi nia leet iha Ida nebe imi la hatene, ²⁷ Ida nebe mai tuir ha’u nebe ha’u la soi atu kore nia sandalias tali.” ²⁸ Buat ne’e mosu iha Betania, iha mota Jordao nia sorin, iha nebe Joao sei sarani hela.

Joao hatudu Jesus ba ema

                 ²⁹ Loron tuir mai, hare tiha Jesus hakbesik ba nia, Joao dehan: “Ne’e mak Maromak nia Bibi‑Oan nebe kasu mundu nia sala. ³⁰ Kona ba Ida ne’e mak ha’u dehan ona: ‘Ema Ida sei mai tuir ha’u, nebe ba ona uluk ha’u, tamba Nia iha ona uluk ha’u.’ ³¹ Ha’u uluk la hatene  Nia, maibe ha’u sarani ho be, atu Nia bele hatudu an ba Israel.” ³² Joao fo sasin, dehan: “Ha’u hare Espiritu Santu tun mai housi lalehan hanesan manu falur ida, nebe mai tur iha nia leten. ³³ Ha’u uluk la hatene Nia, maibe Ida nebe haruka ha’u mai sarani ho be mak dehan mai ha’u: “Ida nebe o hare Espiritu tun ba Nia, hodi hela iha Nia, Nia mak sei sarani ho Espiritu Santu.” ³⁴ Ha’u hare duni, hodi fo sasin katak Nia mak Maromak Oan.”

Jesus hahu bolu eskolante sira

                 ³⁵ Liu tiha loron ida, Joao hamutuk hela ho nia eskolante na’in rua. ³⁶ Wainhira hare Jesus nebe liu dau-daun, nia dehan: “Maromak nia Bibi‑Oan mak neba!” ³⁷ Rona tiha lia hirak ne’e, eskolante na’in rua ne’e tuir Jesus. ³⁸ Hare sira tuir Nia, Jesus fila hodi husu ba sira: “Imi buka sa ida?” Sira hatan: “Rabbi, katak Mestre, Ita hela iha nebe?” ³⁹ Jesus dehan: “Imi mai hare.” Sira ba duni, hodi hare Nia horik iha nebe. Loron ne’e duni sira hela ho Nia kala tuku haat loraik. ⁴⁰ Sira na’in rua nebe rona Joao hodi tuir Jesus ne’e, ida mak Andre, Simao Pedro nia alin. ⁴¹ Nia hetan uluk nia maun Simao hodi dehan: “Ami hetan ona Messias!” katak “Kristu.” ⁴² Nia lori Simao ba Jesus. Jesus fihir nia, dehan: “O Simao, Joao nia oan; o sei hanaran an Cefas, katak Pedro.”

                ⁴³ Liu tiha loron ida, Jesus hanoin atu ba Galileia. Nia hetan Filipe hodi dehan ba nia: “Tuir Ha’u mai!” ⁴⁴ Filipe ema Betsaida, Andre no Pedro nia knua. ⁴⁵ Filipe hare Natanael hodi dehan ba nia: “Ami foin hetan Ida nebe Moises no profeta sira fo sai nanis, katak Jesus, Jose nia oan, housi Nazare.” ⁴⁶ Natanael hateten: “Buat diak ida bele mai housi Nazare?” Filipe hatan ba nia: “O mai hare.” ⁴⁷ Hare Natanael hakbesik ba Nia, Jesus dehan kona ba nia: “Ida ne’e mak ema Israel lo-los, iha nebe la iha lia bosok!” ⁴⁸ Natanael husu ba Nia: “O hatene ha’u oin sa?” Jesus hatan: “Molok Filipe bolu o, Ha’u hare ona o iha ai figueira okos.” ⁴⁹ Natanael dehan fali: “Rabbi, Ita mak Maromak nia Oan, Ita mak Israel nia Liurai!” ⁵⁰ Jesus hatan: “Tan Ha’u hateten ba o katak Ha’u hare ona o iha ai figueira okos, mak o fiar? O sei hare buat boot liu ida ne’e.” ⁵¹ Hafoin Jesus dehan ba nia: “Los duni, Ha’u dehan ba imi katak imi sei hare lalehan nakloke, Maromak nia anju sira sa’e tun ba Oan Mane.”