3

Jesus ho Nicodemos

                ¹ Iha fariseu ida naran Nicodemos, emboot Judeu sira nian. ² Iha kalan nia mai koalia ho Jesus, dehan: “Rabbi, ami hatene katak Ita boot mai housi Maromak nudar mestre, tan ema ida la bele halo buat nebe Ita halo wainhira Maromak la hela ho nia.” ³ Jesus hatan ba nia: “Tebes, Ha’u dehan ba o katak ema nebe la moris fali, nia la bele hare Maromak nia reinu.” ⁴ Nicodemos hateten ba Jesus: “Oin sa ema katuas ida bele moris fali? ⁵ Nia bele tama fali iha inan nia laran atu moris hikas?” Jesus hatan ba nia: “Tebes, Ha’u hateten ba o katak ema nebe la moris housi be no Espiritu, nia la bele tama iha Maromak nia reinu. ⁶ Buat nebe moris housi isin, isin nian; no buat nebe moris housi Espiritu Espiritu nian. ⁷ Keta hakfodak tamba Ha’u  dehan ba o, ‘O ten ke moris fali.’ ⁸ Anin hu’u ba fatin nebe nia hakarak; o rona nia lia, maibe o la hatene nia mai housi nebe ka nia ba nebe. Nune’e mos ho ema hotu nebe moris housi Espiritu.” ⁹ Nicodemos husu ba Jesus: “Buat ne’e bele sai oin sa los?” ¹⁰ Jesus hatan ba nia: “O, mestre Israel nian, la hatene buat ne’e? ¹¹ Los duni Ha’u hateten ba o katak ami koalia kona ba buat nebe ami hatene, hodi fo sasin kona ba buat nebe ami hare ona; maibe imi la simu ami nia lia sasin. ¹² Imi la fiar Ha’u karik, wainhira Ha’u koalia kona ba sasan mundu ne’e nian, oin sa mak imi bele fiar wainhira Ha’u koalia kona ba sasan lalehan nian? ¹³ Ema ida la dauk sa’e ba lalehan; ema ida deit: Ida nebe tun housi lalehan, katak Oan Mane. ¹⁴ Hanesan uluk Moises foti samea iha rai fuik maran, nune’e mos sira sei foti Oan Mane, ¹⁵ atu ema hotu nebe fiar Nia la bele lakon, maibe hetan moris rohan laek. ¹⁶ Basa Maromak hadomi tebes mundu to’o fo Nia Oan Mane mesak, atu ema hotu nebe fiar Nia la bele lakon, maibe hetan moris rohan laek. ¹⁷ Maromak la haruka nia Oan mai iha mundu atu fo terus mundu, maibe atu mundu hetan maksoin hodi Nia. ¹⁸ Ema nebe fiar Nia la hetan kastigu, maibe ema nebe la fiar hetan ona kastigu, basa la fiar iha Maromak nia Oan Mane mesak nia naran. ¹⁹ Sira hetan kastigu nune’e: roman mai iha mundu, maibe ema sira hadomi nakukun liu fali roman, tamba sira nia hahalok aat. ²⁰ Basa ema nebe halo aat hakribi roman, la hakbesik ba roman atu ema la bele hare nia hahalok sira. ²¹ Maibe ema sira nebe moris tuir lialos hakbesik ba roman atu mosu mo-mos katak, buat hotu nebe nia halo, halo iha Maromak.”

Joao nia sasin kona ba Jesus

                 ²² Hafoin Jesus hamutuk ho nia eskolante sira ba rai Judeia. Nia hela ho sira iha neba hodi sarani ema. ²³ Joao mos sarani iha Enon, besik Salim basa iha be barak iha neba no ema mai atu simu baptismu. ²⁴ Joao seidauk tama iha dadur laran.

                ²⁵ Joao nia eskolante sira haksesuk malu ho Judeu sira kona ba fase an tuir ukunfuan. ²⁶ Sira mai husu Joao: “Mestre, Ida nebe la’o hamutuk ho ita iha Jordao no ita fo sasin kona ba Nia, Nia mos sarani ema, no ema hotu ba hasouru Nia.” ²⁷ Joao hatan: “Ema la bele simu buat ruma nebe Maromak la fo ba nia. ²⁸ Imi rasik mak bele fo sasin katak Ha’u dehan: ha’u la’os Messias, maibe ida nebe Maromak haruka atu ba uluk Nia. ²⁹ Ida nebe iha noiva mak noivu; maibe noivu nia belun nebe hamriik hodi rona nia, haksolok teb-tebes wainhira nia rona noivu nia lia. Ohin ha’u nia ksolok boot teb-tebes. ³⁰ Nia sei sai boot liu no ha’u sei sai kiik liu.”

                ³¹ Ida nebe mai housi leten, Nia iha ema hotu nia leten. Ida nebe mai housi rai, rai ne’e nian, nia koalia kona ba rai. Ida nebe mai housi lalehan, nia aas liu hotu. ³² Nia fo sasin kona ba buat nebe Nia hare no rona, maibe ema ida la simu nia sasin. ³³ Ema nebe simu nia sasin hametin liafuan ida ne’e, katak Maromak los. ³⁴ Basa ida nebe Maromak haruka, Nia fo sai Maromak nia liafuan, tamba Maromak haraik Espiritu tomak ba Nia. ³⁵ Aman hadomi Oan no saran ba Nia buat hot‑hotu. ³⁶ Ema nebe fiar Oan, nia hetan moris rohan laek; maibe ema nebe lakohi fiar Oan, nia sei la hare moris, no Maromak nia hirus hela  ho nia.