4

Jesus ho feto Samaritana

                 ¹ Wainhira Na’i hatene katak fariseu sira rona katak Jesus simu no sarani eskolante barak liu fali Joao; ² maski la’os Jesus mak sarani, maibe nia eskolante sira, ³ Nia husik Judeia hodi fila fali ba Galileia. ⁴ Nia ten ke la’o liu housi rai Samaria. ⁵ Ne’e duni, Nia to’o iha Samaria nia sidade ida, naran Sikar, besik to’os nebe Jacob uluk fo ba nia oan Jose. ⁶ Jacob nia be matan iha neba. Jesus la’o loke ona; tan ne’e, Nia tur iha be matan nia sorin. Loron besik fahe rua ona. ⁷ Feto Samaria nian ida mai kuru be. Jesus dehan ba nia: “Fo be mai Ha’u.” ⁸ Eskolante sira ba iha sidade atu sosa aihan. ⁹ Feto ne’e hatan ba Nia: “Oin sa mak O, ema Judeu ida husu be housi ha’u, ema Samaritana ida?” Tamba Judeu ho Samaritanu sira hare malu la diak. ¹⁰ Jesus simu hodi dehan: “O hatene karik Maromak nia presente, no se los mak dehan ba o ‘Fo be mai Ha’u,’ o mak sei husu ba Nia, Nia sei fo be moris ba o.” ¹¹ Feto dehan ba Nia: “Na’i, Ita kanaban la iha, be matan mos klean; ita nia be moris mai housi nebe? ¹² Ita kala boot liu fali ami nia aman Jacob nebe fo be matan ne’e mai ami? Nia rasik hemu, nia oan sira, nia balada sira mos hemu.” ¹³ Jesus hatan ba nia: “Ema nebe hemu be ne’e, sei hamrook fali; ¹⁴ maibe ema nebe hemu be nebe Ha’u sei fo, sei la hamrook tan, basa be nebe Ha’u fo ba nia sei sai iha nia nudar be matan nebe suli ba moris rohan laek.” ¹⁵ Feto ne’e dehan: “Na’i, fo be ida ne’e mai ha’u, atu ha’u keta hamrook, nune’e ha’u lalika mai tan kuru be iha ne’e.” ¹⁶ Jesus dehan ba nia: “Ba bolu o nia laen, hafoin fila mai iha ne’e.” ¹⁷ Feto hatan: “Ha’u la iha laen.” Jesus dehan: “O dehan los, o la iha laen; ¹⁸ basa o iha laen lima, no ida nebe hela ho o dau-daun ne’e la’os o nia laen. Kona ba ne’e, o hateten los.” ¹⁹ Feto hatan: “Na’i, ha’u hare katak Ita profeta ida. ²⁰ Ami nia bei-ala sira adora iha foho ne’e; imi dehan fali katak iha Jerusalem mak ema sei adora.” ²¹ Jesus dehan teni: “Feto, fiar Ha’u: loron sei to’o mai wainhira imi sei adora Aman la’os iha foho ne’e, mos la’os iha Jerusalem. ²² Imi adora buat nebe imi la hatene, ami adora buat nebe ami hatene, basa maksoin mai housi Judeu sira. ²³ Maibe loron sei mai, lo-los mai tiha ona, wainhira ema nebe  adora lo-los sei adora Aman tuir espiritu no lialos: tamba Aman hakarak atu ema adora Nia nune’e. ²⁴ Maromak mak espiritu, no sira nebe adora Nia sei adora tuir espiritu no lialos.” ²⁵ Feto hateten ba Nia: “Ha’u hatene katak Messias sei mai, ida ba naran Kristu; wainhira Nia mai, Nia sei hanorin buat hot‑hotu.” ²⁶ Jesus hatan: “Ha’u rasik mak koalia ho o.” ²⁷ Iha oras neba eskolante sira to’o mai ona. Sira hakfodak tan hare Jesus koalia ho feto ida; maibe sira ida la husu ba Nia “Ita hakarak sa ida?” eh “Tan sa ita koalia ho nia?” ²⁸ Husik tiha kanaban, feto ne’e halai ba sidade, hodi hateten ba ema sira: ²⁹ “Imi mai hare ema nebe hateten mai ha’u buat hotu nebe ha’u halo. Nia mak Messias karik?” ³⁰ Ne’e duni, sira sai housi sidade, hodi ba hare Jesus. ³¹ Eskolante sira konvida Jesus, dehan: “Mestre, han ba.” ³² Maibe Nia hatan ba sira: “Ha’u iha aihan nebe imi la hatene.” ³³ Eskolante sira husu ba malu: “Ema ruma lori karik aihan ba Nia?” ³⁴ Jesus dehan ba sira: “Ha’u nia aihan mak halo tuir Ida nebe haruka Ha’u mai nia hakarak, hodi hala’o nia hahalok. ³⁵ Imi la dehan, ‘Fulan haat tan, ema haknata han ona? Maibe Ha’u dehan ba imi: Imi foti matan, hodi hare ba to’os: aihan sira tasak hotu ona, hein deit atu haknata. ³⁶ Haknata na’in sira simu ona sira nia kolen, hodi halibur ai-fuan sira ba moris rohan laek; nune’e, ida nebe kuda no ida nebe haknata bele haksolok hamutuk. ³⁷ Ida ne’e hatudu lo-los lia nebe dehan: ‘Ema ida kuda, ema seluk haknata.’ ³⁸ Ha’u haruka imi atu ba haknata buat nebe imi la kuda; ema seluk serbisu, imi mai manan deit sira nia kosarben.” ³⁹ Ema Samaritanu barak housi sidade fiar Jesus tamba feto dehan: “Nia dehan buat hotu nebe ha’u halo.” ⁴⁰ Tan ne’e, wainhira sira mai hare Nia, sira husu ba Nia atu hela hamutuk ho sira. Nia hela duni loron rua. ⁴¹ Ema barak liu tan fiar tamba nia liafuan. ⁴² Sira dehan ba feto ne’e: “La’os tamba buat nebe o dehan, mak ami fiar; ami rasik rona no hatene katak, los duni, Nia mak mundu nia Maksoin.”

Jesus ba Galileia

                 ⁴³ Liu tiha loron rua, Jesus ba Galileia. ⁴⁴ Nia rasik mak fo sai katak ema sira la simu di-diak profeta ida iha nia rai rasik. ⁴⁵ To’o tiha Galileia, ema Galileia sira simu Nia di-diak, tamba sira hare ona buat hotu nebe Nia halo iha Jerusalem, iha festa nebe sira mos tuir ba.

Jesus fo isin diak ba funsionariu nia oan

                ⁴⁶ Jesus fila fali ba Kana Galileia, iha nebe Nia halo be nakfila ba tua. Iha Kafarnaum, iha funsionariu ida nebe nia oan mane moras. ⁴⁷ Rona tiha katak Jesus to’o ona Galileia housi Judeia, ema ne’e ba hasouru Nia hodi husu ba Nia atu mai fo isin diak ba nia oan, nebe besik atu mate. ⁴⁸ Jesus hateten ba nia: “Imi la hare karik sinal no milagre sira, imi la fiar.” ⁴⁹ Funsionariu hatan ba Nia: “Mai, Na’i, molok ha’u nia oan mate.” ⁵⁰ Jesus dehan: “Ba, o nia oan sei moris.” Ema ne’e fiar buat nebe Jesus hateten ba nia, hodi fila fali ba uma. ⁵¹ Nia sei la’o dau-daun, nia atan sira hasouru nia, hodi dehan katak nia oan sei moris hela. ⁵² Nia husu  ba sira tuku hira nia oan hahu sai diak fali. Sira dehan: “Isin manas lakon hourse’ik besik tuku ida.” ⁵³ Aman ne’e hanoin fali katak iha oras neba Jesus dehan ba nia: “O nia oan sei moris.” Ne’e duni, nia ho nia familia tomak fiar. ⁵⁴ Dala rua ona mak Jesus halo milagre wainhira Nia mai iha Galileia housi Judeia.