5

Jesus bali ema isin mate ida iha pisina Betsaida nian

                 ¹ Tuir mai Jesus sa’e fali ba Jerusalem, iha nebe

 Judeu sira halo festa. ² Iha Jerusalem, besik odamatan Bibi sira nian, iha pisina ida naran Betsata iha lia Ebreu, nebe iha portiku lima. ³ Iha neba tur hela ema moras barak (matan delek, ain aat no isin mate sira), nebe hein atu be book an. ⁴ Basa Na’i nia anju tun fila‑fila hodi book be; ida nebe tama uluk iha pisina, nia hetan kedas isin diak housi moras naran deit.

                ⁵ Iha mos ema moras ida nebe hein nune’e tinan tolu nulu resin ualu ona. ⁶ Hare nia tur iha neba, hodi hatene katak nia hein kleur teb-tebes ona, Jesus husu ba nia: “O hakarak hetan isin diak?” ⁷ Ema moras ne’e dehan: “Na’i, ha’u ema la iha atu hatama ha’u iha pisina laran wainhira be book an; nune’e wainhira ha’u hakbesik ba be, ema seluk tama tiha uluk liu ha’u.” ⁸ Jesus dehan: “Hamriik ba, kaer o nia biti hodi la’o ba.” ⁹ Teki‑teki ema ne’e hetan isin diak. Hafoin nia foti nia biti hodi hahu la’o. Buat ne’e mosu iha loron Sabadu  ¹⁰ Tan ne’e Judeu sira hateten ba ema nebe foin hetan isin diak: “Ohin loron Sabadu; o la bele lori o nia biti.” ¹¹ Nia hateten ba sira: “Ema nebe fo isin diak mai ha’u dehan mai ha’u: ‘Kaer o nia biti, la’o ba!’” ¹²  “Se mak dehan ba o, ‘Kaer o nia biti, la’o ba?’” sira husu nia. ¹³ Maibe ema ne’e la hatene se los tamba Jesus lakon kedas iha ema lubun boot nia leet iha fatin neba. ¹⁴ La kleur Jesus hetan nia iha templu hodi dehan ba nia: “Hare ba, o isin diak ona; keta halo sala fali, atu buat aat liu tan la bele mosu ba o.” ¹⁵ Ema ne’e fila fali hodi hateten ba Judeu sira katak Jesus mak fo isin diak ba nia. ¹⁶ Tuir mai, Judeu sira hahu duni Jesus, tamba Nia halo buat hirak ne’e iha loron Sabadu. ¹⁷ Maibe Jesus hatan ba sira: “Ha’u nia Aman serbisu nafatin, nune’e mos Ha’u serbisu.” ¹⁸ Tan ne’e, Judeu sira buka liu tan atu oho Jesus, tamba Nia la halakon deit lisan loron Sabadu nian, maibe mos tamba Nia bolu Maromak nia Aman rasik hodi halo an hanesan Maromak.

Jesus nia liafuan kona ba nia an

                 ¹⁹ Jesus hatan ba sira: “Tebes, tebes, Ha’u dehan ba imi katak Oan la bele halo buat ida housi nia An rasik; Nia bele halo deit buat nebe nia hare Aman halo, basa buat nebe Aman halo Oan mos halo ²⁰ Basa Aman hadomi Oan hodi hatudu ba Nia buat hotu nebe Nia halo, no Nia sei hatudu ba Nia hahalok sira nebe boot liu fali sira ne’e. atu imi hakfodak. ²¹ Basa nudar Aman halo ema sira moris hi’as fali hodi fo moris ba sira, nune’e mos Oan fo moris ba naran ema nebe Nia fihir. ²² Aman la tesi lia ba ema ida, maibe husik Oan tesi lia hot‑hotu. ²³ atu ema hotu hamtauk Oan nudar sira hamtauk Aman. Ema nebe la hamtauk Oan, nia la hamtauk mos Aman nebe haruka Oan. ²⁴ Tebes, tebes, Ha’u dehan ba imi: Ema nebe rona Ha’u nia liafuan ne’e hodi fiar Ida nebe haruka Ha’u mai, nia hetan moris rohan laek: ema ne’e la hetan kastigu, nia liu ona housi mate ba moris. ²⁵ Tebes, tebes, Ha’u dehan ba imi katak loron besik ona, lo-los to’o ona mai, wainhira ema mate sira sei rona Maromak Oan nia lia, no sira hotu nebe rona sei moris. ²⁶ Basa, nudar Aman mak moris na’in, nune’e mos Nia halo Oan sai moris na’in, ²⁷ hodi haraik ba Nia kbiit atu tesi lia, basa Nia mak Oan Mane. ²⁸ Imi keta hakfodak ho buat ne’e, basa loron to’o dau-daun wainhira matebian sira hotu nebe iha rate laran sei rona Nia lia, no ²⁹ sira nebe halo diak, sei sa’e ba moris rohan laek: sira nebe halo aat sei hetan kastigu. ³⁰ Ha’u mesak la bele halo buat ida. Ha’u tesi lia tuir buat nebe Ha’u rona. Ha’u nia lia los tamba Ha’u la tuir Ha’u nia hakarak, maibe Ida nebe haruka Ha’u nia hakarak. ³¹ Ha’u fosasin karik kona ba Ha’u an rasik, Ha’u nia sasin la los. ³² Ida seluk mak fo sasin kona ba Ha’u, no Ha’u hatene katak Nia sasin los. ³³ Wainhira imi haruka ema ba Joao, nia fo sasin kona ba lialos. ³⁴ Ha’u la simu lia sasin housi ema ida, maibe Ha’u dehan buat ne’e atu imi hetan maksoin. ³⁵ Joao mak ahi oan nebe lakan hodi fo naroman, no imi hakarak haksolok uitoan iha nia naroman. ³⁶ Maibe Ha’u nia sasin boot liu fali Joao nian, tamba hahalok sira nebe Aman haruka Ha’u, hahalok sira nebe Ha’u halo dau-daun katak Aman haruka Ha’u mai. ³⁷ Aman nebe haruka Ha’u mai, Nia rasik mak fo sasin kona ba Ha’u. Imi seidauk rona nia lia, seidauk hare nia oin; ³⁸ nia liafuan la hela iha imi, tan imi la fiar Ida nebe haruka Ha’u mai. ³⁹ Imi lee Eskritura sira basa imi hanoin katak imi bele hetan moris rohan laek iha sira: sira mak fo sasin kona ba Ha’u. ⁴⁰ Maibe imi lakohi mai hakbesik Ha’u atu imi hetan moris. ⁴¹ Ha’u la buka gloria housi ema. ⁴² Maibe Ha’u hatene katak imi la iha domin ba Maromak. ⁴³ Ha’u mai hodi Ha’u Aman nia naran, no imi lakohi simu Ha’u; ema seluk mai karik hodi nia naran rasik, imi sei simu nia. ⁴⁴ Imi bele fiar oin sa, imi nebe fo gloria ba malu, maibe la buka gloria nebe mai deit housi Maromak? ⁴⁵ Keta hanoin katak Ha’u mak sei duu imi ba Aman; Moises nebe imi hein mak sei duu imi. ⁴⁶ Imi fiar Moises karik , imi sei fiar mos Ha’u, tamba nia hakerek kona ba Ha’u. ⁴⁷ Maibe, imi la fiar karik buat nebe nia hakerek, oin sa mak imi bele fiar Ha’u nia liafuan?”