6

Jesus fo han ba ema rihun lima

                 ¹ Tuir mai, Jesus liu ba tasi Galileia, katak tasi Tiberiades, nia sorin balun. ² Ema lubun boot tuir Nia, tan sira hare milagre hirak nebe Nia halo ba ema moras sira. ³ Sa’e tiha ba foho ida, Jesus tur iha neba ho nia eskolante sira. ⁴ Paskua, katak Judeu sira nia festa, besik dau-daun ona. ⁵ Foti tiha matan, hodi hare katak ema lubun boot mai hasouru  Nia, Jesus dehan ba Filipe: “Ita bele sosa paun iha nebe los atu fo han ema sira ne’e?” ⁶ Jesus koalia nune’e atu koko nia, basa Nia hatene ona atu halo sa. ⁷ Filipe hatan ba Nia:” Osan atus rua mos sei la to’o atu ema ida-ida simu paun baluk oan ida.” ⁸ Andre, Simao Pedro nia alin, hateten ba Jesus. ⁹ “Iha ne’e, iha labarik oan ida ho paun fuan lima no ikan rua; maibe ne’e to’o oin sa los ema barak ne’e?” ¹⁰ Jesus lia tun, dehan: “Haruka ema sira ne’e tur hotu.” Iha fatin neba iha du’ut  barak. Ema sira tur tiha hotu, mane deit to’o besik rihun lima. ¹¹ Kaer tiha paun , Jesus fo agradese , hodi fahe ba ema sira nebe tur iha neba; ho ikan sira Nia halo mos nune’e. Sira han to’o bosu. ¹² Hafoin Jesus hateten ba nia eskolante sira: “Imi ba halibur baluk oan sira nebe resin atu la bele lakon.” ¹³ Sira halibur duni paun rahun sira nebe sira nebe han tiha husik, hodi hakonu luhu sanulu resin rua. ¹⁴ Hare milagre nebe Jesus halo, ema sira dehan ba malu: “Tebes, ida ne’e mak profeta nebe atu mai iha mundu.” ¹⁵ Maibe, wainhira Nia hatene katak sira atu kaer Nia hodi foti Nia nudar liurai, Jesus subar an mesak hodi fila fali ba foho.

Jesus la’o iha be leten

                 ¹⁶ Wainhira loron monu ona, eskolante sira tun ba tasi. ¹⁷ Sa’e tiha ba ro ida, sira hakur tasi atu ba Kafarnaum. Nakukun ona, maibe Jesus seidauk to’o hamutuk ho sira. ¹⁸ Tasi sai boot tan anin hu’u maka’as. ¹⁹ Wainhira ro dook ona besik kilometru haat, sira hare Jesus la’o iha be leten hakbesik ro. Sira tauk; ²⁰ maibe Nia dehan ba sira: “Ha’u mak ne’e, keta tauk!” ²¹ Sira haksolok atu simu Nia iha ro laran; ro to’o kedas rai nebe sira ba.

                ²² Liu tiha loron ida, ema barak nebe hela iha tasi sorin balun hare katak iha neba iha ro ida deit, no Jesus la sa’e hamutuk ho nia eskolante sira, maibe sira ne’e ba mesak deit. ²³ Maibe, ro balun to’o housi Tiberiades, besik fatin nebe ema sira han paun, wainhira Na’i fo agradese. ²⁴ Hare katak Jesus ho nia eskolante sira la iha ona, ema sira sa’e ro hodi ba Kafarnaum atu buka Jesus.

Paun moris nian

                 ²⁵ Hetan tiha Nia iha tasi sorin balun ba, sira hateten ba Nia: “Mestre, wainhira mak Ita boot iha ne’e?” ²⁶ Jesus hatan ba sira: “Tebes, tebes, Ha’u dehan ba imi: imi buka Ha’u la’os tan imi hare milagre sira, maibe tan imi han paun to’o bosu. ²⁷ Keta serbisu atu hetan aihan nebe mohu, maibe ba aihan nebe hela ba moris rohan laek; aihan nebe Oan Mane sei haraik ba imi, basa ba Nia mak Aman Maromak tau nia marka.” ²⁸ Rona tiha ne’e, sira hasa’e lia ba Nia dehan: “Ami sei halo sa los atu kaer Maromak nia serbisu?” ²⁹ Jesus lia tun ba sira: “Maromak nia serbisu mak ida ne’e: imi fiar Ida nebe Nia haruka mai.” ³⁰ Sira hasa’e lia ba Nia: “Sinal sa los mak Ita halo, atu ami hare hodi fiar Ita? Hahalok sa ida mak Ita halo? ³¹ Iha rai fuik maran, ami nia bei-ala sira han mana, tuir Eskritura hateten: ‘Nia fo han sira ho paun nebe tun housi lalehan.” ³² Jesus hatan ba sira: “Tebes, tebes, Ha’u dehan ba imi katak la’os Moises mak fo ba imi paun housi lalehan; maibe Ha’u Aman mak fo ba imi paun los housi lalehan. ³³ Basa Maromak nia aihan mak tun housi lalehan hodi fo moris ba mundu.” ³⁴ Sira dehan ba Nia: “Na’i, haraik nafatin aihan ne’e mai ami.” ³⁵ Jesus hatan ba sira: “Ha’u mak aihan moris nian. Ema nebe hakbesik Ha’u sei la hamlaha tan; no ema nebe fiar Ha’u sei la hamrook tan ³⁶ Maibe Ha’u dehan ona ba imi katak maski imi hare tiha Ha’u, imi la fiar. ³⁷ Sira hotu nebe Aman fo mai Ha’u, sei hakbesik Ha’u; no ida nebe hakbesik Ha’u, Ha’u sei la duni sai. ³⁸ Basa Ha’u mai housi lalehan la’os atu halo Ha’u nia hakarak, maibe atu halo tuir Ida nebe haruka Ha’u mai nia hakarak. ³⁹ No Ida nebe haruka Ha’u mai nia hakarak mak ida ne’e: atu Ha’u keta lakon buat nebe Nia fo tiha mai Ha’u, maibe atu Ha’u halo sira moris hi’as iha loron ikus. ⁴⁰ Basa Ha’u nia Aman nia hakarak mak ida ne’e: katak ema ida-ida nebe hare Oan hodi fiar Nia, ema ne’e sei hetan moris rohan laek; no Ha’u sei halo nia moris hi’as iha loron ikus.”

                ⁴¹ Ema Judeu sira mura-mura ba Jesus tamba Nia dehan: “Ha’u mak aihan nebe tun housi lalehan.” ⁴² Sira hateten: “Nia la’os Jesus, Jose nia Oan? Ita hatene Nia aman no inan. Nusa mak nia bele dehan, ‘Ha’u mai housi lalehan?” ⁴³ Jesus hatan ba sira, dehan: “Imi keta mura-mura iha imi leet. ⁴⁴ Ha’u Aman nebe haruka Ha’u mai la dada nia karik, ema ida la bele hakbesik Ha’u; no Ha’u sei halo ema ne’e moris hi’as iha loron ikus. ⁴⁵ Profeta sira hakerek nanis ona, dehan: ‘Maromak sei hanorin sira hotu.’ Ema hotu nebe rona Aman hodi aprende housi Nia, ema ne’e hakbesik Ha’u. ⁴⁶ Ema ida seidauk hare Aman. Ida nebe mai housi Maromak, Nia deit mak hare ona Aman. ⁴⁷ Tebes, tebes, Ha’u dehan ba imi: ema nebe fiar hetan moris rohan laek. ⁴⁸ Ha’u mak aihan moris nian. ⁴⁹ Iha rai fuik maran imi nia bei-ala sira han mana, no sira mate ona. ⁵⁰ Ida ne’e mak aihan nebe tun housi lalehan, atu ema nebe han aihan ne’e sei la mate. ⁵¹ Ha’u mak aihan moris nian nebe tun mai housi lalehan. Ema nebe han aihan ne’e, nia moris ba nafatin; no aihan nebe Ha’u sei fo mak Ha’u nia isin, saran ba mundu nia moris.” ⁵² Ema Judeu sira haksesuk malu, dehan: “Oin sa mak Nia bele fo nia isin mai ita atu han?” ⁵³ Jesus hatan ba sira: “Tebes, tebes, Ha’u tebes ba imi: imi la han karik Oan Mane nia isin, imi la hemu karik nia ran, imi sei la hetan moris iha imi, ⁵⁴ Ema nebe han Ha’u nia isin hemu Ha’u nia ran hetan moris rohan laek, no Ha’u sei halo nia moris hi’as iha loron ikus. ⁵⁵ Basa Ha’u nia isin aihan duni, Ha’u nia ran tua duni. ⁵⁶ Ema nebe han Ha’u nia isin no hemu Ha’u nia ran horik iha Ha’u, no Ha’u horik iha nia. ⁵⁷ Nudar Ha’u Aman nebe moris haruka Ha’u mai, no Ha’u moris tamba Aman, nune’e mos ema nebe han Ha’u, sei moris tamba Ha’u. ⁵⁸ Ne’e mak aihan nebe tun mai housi lalehan; la’os hanesan ida nebe imi nia aman sira han, hafoin sira mate hotu; ema nebe han aihan ne’e sei moris ba nafatin.” ⁵⁹ Jesus hateten lia hirak ne’e iha sinagoga wainhira nia hanorin iha Kafarnaum.

                ⁶⁰ Rona tiha ne’e eskolante barak dehan: “Liafuan hirak ne’e todan teb-tebes: se los mak bele rona?” ⁶¹ Hatene katak nia eskolante mura-mura kona ba ne’e, Jesus hateten ba sira: “Liafuan hirak ne’e la monu los ba imi nia laran? ⁶³ Imi hare karik Oan Mane sa’e ba fatin nebe uluk Nia horik ba, sei sa’e oin sa los? ⁶³ Espiritu mak halo moris; isin la folin buat ida; liafuan nebe Ha’u dehan ba imi mak espiritu no moris. ⁶⁴ Maibe imi balun la fiar.” Basa Jesus hatene houri uluk kedas sira nebe la fiar no se mak atu saran Nia ba mate. ⁶⁵ Hafoin Nia dehan: “Tan ne’e mak Ha’u dehan ba imi katak ema ida la bele hakbesik mai Ha’u, wainhira Ha’u Aman dada nia.” ⁶⁶ Ne’e hotu tiha, Jesus nia eskolante barak fila kotuk hodi la tuir tan ona Nia. ⁶⁷ Tuir mai, Jesus lia tun ba sira na’in sanulu resin rua: “Imi mos hakarak ba ona?” ⁶⁸ Simao Pedro hatan ba Nia: “Na’i, ami atu ba los ho se? Ita mak iha liafuan moris rohan laek nian. ⁶⁹ Ami fiar ona hodi hatene katak Ita mak Maromak nia Santu.” ⁷⁰ Jesus hateten fali ba sira: “La’os Ha’u rasik mak fihir imi na’in sanulu resin rua? Maibe imi ida diabu!” ⁷¹ Jesus koalia kona ba Judas, Simao Iscariotes nia Oan: basa nia, sira na’in sanulu resin rua ne’e ida, mak sei saran Nia ba mate.