7

Jesus sa’e ba Jerusalem hodi hanoin

                 ¹ Tuir mai, Jesus la’o iha Galileia; Nia la bele hela iha Judeia, basa Judeu sira hakarak oho Nia. ² Festa Tabernakulu Judeu sira nian besik dau-daun ona. ³ Nia maun‑alin sira hateten ba Nia: “Husik fatin ne’e hodi ba rai Judeia atu o nia eskolante sira bele hare hahalok sira nebe o halo. ⁴ Basa ema ida hakarak karik katak ema hotu hatene nia, nia la halo buat ida sub-subar deit. O halo ona buat sira ne’e, hatudu o nia an ba mundu!” ⁵ Lo-los, Nia maun‑alin sira mos la fiar Nia. ⁶ Jesus hatan ba sira: “Ha’u nia tempu seidauk to’o, maibe ba imi nian iha nafatin. ⁷ Mundu la bele hakribi imi, maibe nia hakribi Ha’u tamba Ha’u fo sasin katak nia hahalok sira aat. ⁸ Imi sa’e ba festa ba. Ha’u la ba basa Ha’u nia tempu seidauk to’o lo-los.” ⁹ Koalia nune’e hotu tiha, Nia hela iha Galileia. ¹⁰ Maibe wainhira Nia maun‑alin ba tiha ona, Nia mos ba, maibe sub-subar deit. ¹¹ Judeu sira buka Nia iha festa, dehan: “Nia iha nebe?” ¹² Ema barak haksesuk malu kona ba Nia. Balun dehan: “Nia ema diak,” sira seluk dehan: “Lae, Nia lori povu ba dalan sala.” ¹³ Maibe ema ida la koalia mo-mos kona ba Nia tamba tauk Judeu sira.

                ¹⁴ Iha ona festa klaran mak Jesus sa’e ba templu hodi hahu hanorin. ¹⁵ Judeu sira hakfodak, dehan: “Nia la ba eskola, oin sa los Nia hetan matenek ne’e?” ¹⁶ Jesus hatan ba sira: “Ha’u nia doutrina la’os Ha’u nian, maibe mai housi Ida nebe haruka Ha’u mai. ¹⁷ Ema nebe hakarak tuir Nia hakarak, nia sei hatene Ha’u nia doutrina mai housi Maromak ka Ha’u koalia housi Ha’u nia An. ¹⁸ Ema nebe koalia housi nia an, nia buka nia rasik nia gloria; maibe ema nebe buka  gloria ba ida nebe haruka nia, ema ne’e los, la iha lia bosok iha nia. ¹⁹ La’os Moises mak fo ukunfuan ba imi? Maibe imi ida la tuir ukunfuan! Tansa imi buka atu oho Ha’u?” ²⁰ Sira hatan: “Diabu iha o nia laran! Se los mak buka atu oho o?” ²¹ Jesus dehan teni: “Ha’u halo hahalok ida deit, no imi hotu hakfodak. ²² Moises fo ba imi sirkunsisaun, nebe mai housi patriarka sira, la’os housi Moises, no imi halo sirkunsisaun iha loron Sabadu. ²³ Ema ida simu karik sirkunsisaun iha loron Sabadu atu halo tuir Moises nia ukun fuan, tansa imi hirus Ha’u wainhira Ha’u halo ema nia isin tomak fali iha loron Sabadu? ²⁴ Imi keta tesi tuir buat nebe bele hare, maibe tesi lia tuir justisa lo-los.”

Ema sira haksesuk malu kona ba Jesus mai housi nebe

                        ²⁵ Iha Jerusalem ema balun hateten: “La’os ida ne’e mak ema buka atu oho? ²⁶ Maibe Nia koalia iha ema hotu nia oin, no sira la dehan buat ida ba Nia. Keta na’i ulun sira hatene ona lo-los katak Nia mak Kristu karik? ²⁷ Maibe ita hotu hatene ema ne’e mai housi nebe; wainhira Messias to’o, ema la hatene Nia mai housi nebe.” ²⁸ Tuir mai, wainhira Nia hanorin iha templu, Jesus dehan ho lia maka’as: “Imi hatene Ha’u, imi hatene mos Ha’u mai housi nebe? Maibe Ha’u la mai atu tuir Ha’u rasik nia hakarak. Maibe Ida nebe haruka Ha’u mai, Nia los; no imi la hatene Nia; ²⁹ Ha’u hatene Nia, basa Ha’u mai housi Nia; Nia mak haruka Ha’u mai.” ³⁰ Sira hakarak kaer Nia, maibe ema ida la tau liman ba Nia, basa nia oras seidauk to’o.

Jesus fo sai katak Nia sei fila hikas mai

                ³¹ Maibe ema barak fiar Nia; sira dehan: “Wainhira Messias sei mai, Nia sei halo milagre barak fali ema ne’e nian?” ³² Fariseu sira rona katak ema lubun boot koalia nune’e, no am’lulik boot no fariseu sira haruka guarda sira atu kaer Nia. ³³ Tuir mai Jesus dehan: “Ha’u sei hela ho imi uitoan tan deit; hafoin Ha’u sei fila fali ba Ida nebe haruka Ha’u mai, ³⁴ imi sei buka Ha’u, maibe imi sei la hetan Ha’u, tan imi la bele ba iha fatin nebe Ha’u hela.”  ³⁵ Judeu sira hateten ba malu: “Nia sei ba nebe, atu ita bele hetan Nia? Nia sei ba karik hamutuk ho ema gentiu sira nebe namkari lemo rai, hodi hanorin sira? ³⁶ Nia liafuan hirak ne’e katak sa: ‘Imi sei buka Ha’u, maibe imi se la hetan Ha’u,’ no ‘Imi la bele ba iha fatin nebe Ha’u hela’?”

Be nebe fo moris

                 ³⁷ Iha loron ikus, loron boot festa nian, Jesus hamriik hodi hateten ho lia maka’as: “Ema nebe hamrook, mai hakbesik Ha’u hodi hemu! ³⁸ Ema nebe fiar Ha’u, nudar eskritura hateten tiha: ‘Housi nia fuan sei suli mota be moris nian.” ³⁹ Nia dehan ne’e kona ba Espiritu nebe sei haraik ba sira nebe fiar Nia. Espiritu seidauk fo ba ema, tamba Jesus la dauk simu gloria.

Ema haksesuk malu kona ba Jesus

⁴⁰ Wainhira sira rona liafuan hirak ne’e, balun dehan: “Ema ne’e Profeta los duni.” ⁴¹ Balun dehan fali: “Nia mak Messias.” Maibe sira seluk hateten: “Messias bele mai housi Galileia? ⁴² Eskritura la dehan katak Kristu mak David nia bei-oan no mai housi Belem, David nia knua?” ⁴³ Ne’e duni, sira haksesuk malu kona ba Nia. ⁴⁴ Ema balun hakarak kaer Nia, maibe ema ida la tau liman ba Nia. ⁴⁵ Guarda sira fila fali ba am’lulik boot no fariseu sira, nebe dehan ba sira: “Tansa imi la lori Nia mai?” ⁴⁶ Guarda sira nia na’i ulun hatan: “Ema ida seidauk koalia hanesan ema ne’e!” ⁴⁷ Fariseu sira husu fali ba sira: “Nia lori tiha mos imi ba dalan sala?” ⁴⁸ Na’i ulun eh fariseu ruma fiar Nia karik? ⁴⁹ Maibe ema lubun boot ne’e, nebe la hatene ukunfuan hetan malisan ba!” ⁵⁰ Sira ida naran Nicodemos, nebe uluk ba koalia ho Nia, hateten ba sira: ⁵¹ “Ita nia ukunfuan fo kastigu ba ema ida, wainhira seidauk rona nia, seidauk hatene nia di-diak?” ⁵² Sira hatan, “O mos housi Galileia? Buka iha eskritura no o sei hare katak la iha profeta nebe mai housi Galileia.”

                ⁵³ Sira ida-ida fila ba uma.