11

Lazaro moris hi’as

                ¹ Iha tempu neba, ema ida moras, naran Lazaro; nia ema Betania, knua ida Maria ho nia bin Marta nian. ² Maria ne’e, mak tau mina morin ba Na’i, hodi hamaran Jesus nia ain ho nia fuuk. Nia maun Lazaro mak moras. ³ Nia feto sira haruka fo hatene ba Jesus: “Na’i, ida nebe Ita hadomi moras.” ⁴ Rona tiha ne’e, Jesus dehan: “Moras ne’e la’os atu mate; maibe atu fo gloria ba Maromak, hodi halo ema fo gloria ba Maromak Oan.” ⁵ Jesus ho Marta, nia alin, no Lazaro, sira belun boot. ⁶ Maibe, rona tiha katak Lazaro moras, Nia hela tan loron rua iha neba. ⁷ Liu tiha ne’e, Nia dehan ba eskolante sira: “Ita ba fali Judeia.” ⁸ Eskolante sira hateten Nia: “Mestre foin dau-daun Judeu sira buka atu tuda mate Ita, Ita sei hakarak fila fali ba neba? ⁹ Jesus hatan, dehan: “La’os loron ida iha oras sanulu resin rua? Ema nebe la’o iha loron la sidi, basa hare naroman mundu ne’e nian; ¹⁰ maibe nia la’o karik iha kalan, nia sidi, basa naroman la iha.” ¹¹ Koalia tiha nune’e, Nia dehan tan: “Ita nia belun Lazaro toba; Ha’u ba atu fanu nia.” ¹² Eskolante sira dehan: “Na’i, nia toba karik, nia sei diak fali.” ¹³ Jesus koalia kona Lazaro nia mate, maibe sira hanoin katak Jesus dehan Lazaro dukur deit. ¹⁴ Tan ne’e, Jesus dehan sai mo-mos: “Lazaro mate tiha ona. ¹⁵ Ha’u haksolok tamba Ha’u la iha neba atu imi bele fiar. Ita ba hare nia.” ¹⁶ Tome, ida nebe ema hanaran Kaduak, dehan ba nia maluk sira: “Ita mos ba atu mate hamutuk ho nia.” ¹⁷ To’o tiha neba, Jesus hetan nia belun ema hakoi liu tiha loron haat. ¹⁸ Betania besik Jerusalem kala kilometru tolu. ¹⁹ Judeu barak ba hare Marta no Maria atu fo ksolok tamba sira nia maun mate. ²⁰ Rona katak Jesus to’o dau-daun, Marta sai ba hasouru Nia. Maria tur hela iha uma. ²¹ Marta dehan ba Jesus: “Na’i, Ita iha ne’e karik, Ha’u nia maun la mate! ²² Maibe oras ne’e mos Ha’u hatene katak Maromak sei haraik ba Ita buat nebe Ita husu ba Nia.” ²³ Jesus hatan ba nia: “O nia maun sei moris hi’as.” ²⁴ Marta simu: “Ha’u hatene katak nia sei moris hi’as iha loron ikus.” ²⁵ Jesus dehan teni ba nia: “Ha’u ne’e moris hi’as no moris. Ema nebe fiar Ha’u, maski mate ona, nia sei moris. ²⁶ Ema hotu nebe moris hodi fiar Ha’u, nia sei la mate tan. O fiar lia ne’e?” ²⁷ Marta dehan: “Ha’u fiar, Na’i; Ha’u fiar katak Ita mak Messias, Maromak Oan, nebe atu mai iha mundu.” ²⁸ Dehan tiha ne’e, Marta bolu nia alin Maria, hodi dehan sub‑subar: “Mestre iha ne’e, Nia bolu o.” ²⁹ Rona tiha ida ne’e, Maria hamriik kedas hodi ba buka Jesus. ³⁰ Jesus seidauk tama iha knua; Nia sei hela iha fatin nebe Marta hasouru Nia. ³¹ Wainhira Judeu sira nebe hamutuk ho Maria iha uma hodi fo ksolok hare nia hamriik no sai lalais, sira tuir nia, tan hanoin katak sira ba tanis iha rate. ³² To’o tiha iha fatin nebe Jesus hela ba, hodi hare Nia, Maria monu ba Jesus nia ain, dehan: “Na’i, Ita iha ne’e karik, Ha’u nia maun la mate!” ³³ Hare tiha nia tanis, no mos hare Judeu sira nebe mai ho nia tanis hotu, Jesus nia laran taridu teb-tebes, neon susar, tan hanoin. ³⁴ Hafoin Nia husu: “Imi tau nia iha nebe?” Sira hatan: “Ita mai hare, Na’i.” ³⁵ Jesus tanis. ³⁶ Judeu sira dehan: “Hare ba oin sa Na’i hadomi nia!” ³⁷ Maibe balun dehan fali: “Nia nebe loke matan delek nia matan, la bele halo ema ne’e keta mate?” ³⁸ Nia laran taridu dala ida tan, Jesus hakbesik ba rate. Rate ne’e, fatuk kuak ida nebe taka hela ho fatuk boot ida. ³⁹ Jesus dehan: “Imi hasai tiha fatuk.” Marta, matebian nia feton, hatan: “Iis ona, Na’i; loron hat ona” ⁴⁰ Jesus dehan: Ha’u la dehan ba o katak o fiar karik, o sei hare Maromak nia gloria?” ⁴¹ Sira hasai fatuk. Jesus foti matan ba lalehan, dehan: “Aman, Ha’u fo agradese ba Ita Boot tan Ita rona Ha’u.” ⁴² Ha’u hatene nanis ona katak Ita rona Ha’u nafatin; maibe Ha’u koalia nune’e tamba povu nebe hale’u Ha’u, atu sira fiar katak Ita haruka Ha’u mai.” ⁴³ Dehan tiha ne’e, Nia foti lia maka’as, dehan: “Lazaro, sai mai liur!” ⁴⁴ Matebian sai mai ho liman no ain falun tiha ho hena. Nia oin taka ho lensol ida. Jesus dehan ba sira: “Kore tiha nia, hodi husik nia la’o ba.”

Na’i ulun sira futu lia atu oho Jesus              

                ⁴⁵ Hare tiha buat nebe Jesus halo, Judeu barak nebe ba hare Maria, fiar Nia, ⁴⁶ maibe sira balun ba fo hatene ba fariseu sira buat nebe Jesus foin halo. ⁴⁷ Amlulik sira nia na’i ulun no fariseu sira halibur hamutuk hodi dehan: “Ita atu halo sa los tan ema ne’e halo milagre barak? ⁴⁸ Ita husik nia karik, ema hotu sei fiar Nia, hafoin Romano sira sei mai sobu rahun ita nia templu ho nasaun tomak.” ⁴⁹ Maibe sira ida, naran Kaifas, am’lulik boot ba tinan neba, hateten ba sira: “Imi la hatene buat ida! ⁵⁰ Imi la hatene katak, diak liu  ba imi ema ida deit mak mate, liu fali povu tomak terus!” ⁵¹ Nia la dehan ne’e tan nia an rasik, maibe tamba nia mak am’lulik boot iha tinan ne’e, nia si’ik katak Jesus sei mate tan nasaun ⁵² no la’os ba nasaun deit, maibe atu halibur hamutuk ho neon ida deit Maromak nia oan sira nebe namkari lemo rai. ⁵³ hahu housi loron ne’e, sira futu lia atu oho Nia. ⁵⁴ Tan ne’e, Jesus la la’o ona iha Judeu sira nia leet. Nia husik rai ne’e ba sidade Efraim, besik rai fuik maran, hodi hela iha neba ho nia eskolante sira. ⁵⁵ Paskua Judeu sira nian besik ona. Ema barak sa’e ba Jerusalem housi rai atu hamos an ba festa. ⁵⁶ Sira buka Jesus hodi dehan ba malu: “Imi hanoin sa? Imi hanoin katak Nia sei mai iha festa?” ⁵⁷ Am’lulik boot no fariseu sira fo ordem atu ema nebe hatene Nia iha nebe, fo hatene. atu sira bele kaer Nia.