13

Jesus fase eskolante sira nia ain

                 ¹ Molok tama ba festa Paskua, wainhira Jesus hatene ona katak Nia oras to’o ona atu husik mundu ne’e hodi liu ba Aman, no hadomi tiha nia doben sira nebe hela iha mundu, Nia hadomi sira to’o rohan ² Sira sei han hela, diabu hatama tiha ba Judas Iscariotes nia ulun atu saran Jesus ba mate. ³ Hatene tiha ona katak Aman saran tiha buat hotu iha Nia liman, no katak Nia mai housi Maromak no sei fila hikas ba Maromak, ⁴ Jesus hamriik, kolu nia unuk no hola hena mutin naruk ida hodi kesi ba nia knotak. ⁵ Tuir mai, Nia tau be iha basia ida no hahu fase apostolu sira nia ain, hodi hamaran sira ho hena mutin bobar hela iha nia knotak. ⁶ Nia to’o ba Simao Pedro nebe dehan: “Na’i, Ita atu fase atan Ha’u nia ain?” ⁷ Jesus hatan ba nia: “Oras ne’e o la bele komprende buat nebe Ha’u halo dau-daun. Ikus mai o sei hatene.” ⁸ Pedro simu: “Lae, ba nafatin Ita sei la fase ha’u nia ain!” Jesus dehan fali ba nia: “Ha’u la fase o nia ain karik, o sei la hela hamutuk ho Ha’u.” ⁹ Simao Pedro hasa’e fali lia ba Jesus, dehan: “Ne’e sa, Na’i, fase ha’u ain; fase mos ha’u liman no oin.” ¹⁰ Jesus lia tun hikas ba nia, dehan: “Ema nebe haris tiha ona sei fase deit ain, tan nia isin mos ona. Imi mos tiha ona; maibe la’os imi hotu.” ¹¹ Jesus hatene se los mak sei saran Nia ba mate; tan ne’e Nia dehan: “Imi mos ona maibe la’os imi hotu.” ¹² Fase hotu tiha sira nia ain, no hola tiha nia unuk, Nia fila ba nia fatin. Jesus dehan ba sira: “Imi hatene Ha’u halo sa los ba imi? ¹³ Imi bolu Ha’u Mestre no Na’i; imi los, Ha’u nune’e duni. ¹⁴ Ne’e duni, Ha’u nebe Na’i no Mestre fase karik imi nia ain,  imi mos sei fase nia ain ba malu. ¹⁵ Basa Ha’u fo esemplu ba imi, atu imi banati tuir nudar Ha’u foin halo ba imi. ¹⁶ Tebes, tebes, Ha’u dehan ba imi: ‘Atan ida la sai boot liu fali nia na’i; nia la boot liu fali ida nebe haruka nia.’ ¹⁷ Imi hatene buat ne’e karik, rahun diak ba imi wainhira imi halo tuir. ¹⁸ Ha’u la koalia kona ba imi hotu; Ha’u hatene Ha’u fihir se. Maibe eskritura ne’e sei sai los: ‘Ema nebe han paun hamutuk ho Ha’u, foti ona nia ain tuban hasouru Ha’u.’ ¹⁹ Ha’u dehan buat hirak ne’e kedas ba imi, molok nia mosu atu wainhira buat ne’e mosu duni, imi bele fiar katak Ha’u mak Ha’u. ²⁰ Tebes, tebes, Ha’u hateten ba imi: ema nebe simu ida naran deit nebe Ha’u haruka simu Ha’u; no ida nebe simu Ha’u, simu Ida nebe haruka Ha’u mai.”

Jesus fo sai kona ba Judas

                 ²¹ Dehan tiha ne’e hotu, Jesus nia laran taridu hodi fo sasin: “Tebes, tebes, Ha’u dehan ba imi katak imi ida sei saran Ha’u.” ²² Eskolante sira hateke ba malu hodi hanoin Nia koalia kona ba se los. ²³ Eskolante ida nebe Jesus hadomi tur besik nia sorin. ²⁴ ne’e duni, Simao Pedro halo sinal ida ba nia, dehan: “Husu to’ok , Nia dehan se los!” ²⁵ Nia sader ba Jesus nia hirus matan  hodi husu: “Se los, Na’i?” ²⁶ Jesus hatan: “Nia mak ida nebe Ha’u sei fo paun nebe Ha’u sei habokon.” Hafoin, habokon tiha paun baluk ida, Nia fo ba Judas, Simao Iscariotes nia oan. ²⁷ Paun simu tiha, diabu tama iha Judas nia laran. Jesus dehan ba nia: “Buat nebe o atu halo, halo lalais ba!” ²⁸ Sira nebe tur iha meja la hatene tansa Jesus dehan nune’e ba nia. ²⁹ Tamba Judas kaer kohe osan nian, sira balun hanoin katak Jesus dehan ba nia: “O ba sosa buat nebe ita kuran ba festa;” eh haruka nia fo esmola ba ema kiak sira. ³⁰ Simu tiha paun baluk ne’e, Judas sai kedas. Kalan ona.

Ukunfuan foun

                        ³¹ Judas sai tiha, Jesus dehan: “Ohin Oan Mane simu gloria, no Maromak sei simu gloria iha Nia. ³² Maromak simu karik gloria iha Oan Mane, Maromak mos sei fo gloria ba Nia iha Nia An rasik no sei fo gloria kedas ba Nia. ³³ Kosok oan sira, tempu uitoan deit ona mak Ha’u sei hela ho imi. Imi sei buka Ha’u, no hanesan Ha’u dehan ona ba Judeu sira, ohin Ha’u dehan ba imi: ‘Ba fatin nebe Ha’u sei ba, imi la bele ba.’ ³⁴ Ha’u fo ba imi ukunfuan foun: imi sei hadomi malu; nudar Ha’u hadomi imi, nune’e mos imi sei hadomi malu. ³⁵ Nune’e mak ema hotu sei hatene katak imi Ha’u nia eskolante sira: wainhira imi hadomi malu.”

                ³⁶ Simao Pedro dehan ba Jesus: “Na’i, Ita ba nebe?” Jesus hatan: “Ohin o la bele tuir Ha’u ba fatin nebe Ha’u ba, maibe o sei tuir aban bainrua.” ³⁷ Pedro simu dehan: “Na’i, tansa ha’u la bele tuir Ita ohin? Ha’u sei saran ha’u nia moris tamba Ita!” ³⁸ Jesus lia tun fali ba nia: “O sei saran o nia moris tamba Ha’u? Tebes, tebes, Ha’u dehan ba o katak molok manu kokorek, o sei heli Ha’u dala tolu.”