14

Jesus ba hadia fatin ba nia eskolante sira

                 ¹ “Imi laran keta taridu resin. Imi fiar Maromak, fiar mos Ha’u. ² Iha Ha’u Aman nia uma iha fatin wa’in. Lae karik, Ha’u la dehan ba imi, ‘Ha’u ba hadia fatin ba imi.’ ³ Wainhira Ha’u ba ona hodi hadia fatin ba imi, Ha’u sei fila hikas mai hodi lori imi ho Ha’u; nune’e, iha fatin nebe Ha’u hela, imi mos sei iha neba ba. ⁴ Ba fatin nebe Ha’u atu ba, imi hatene ona dalan.” ⁵ Tome dehan ba Nia: “Na’i, ami la hatene Ita ba los nebe; oin sa ami bele hatene dalan?” ⁶ Jesus hateten ba nia: “Ha’u ne’e dalan, lialos no moris. Ema ida la liu karik housi Ha’u, nia la bele hakbesik Ha’u Aman. ⁷ Imi hatene ona Ha’u karik, imi hatene ona mos Ha’u Aman. Houri ohin ba oin, imi hatene ona Nia, no imi hare ona Nia.” ⁸ Filipe husu ba Nia: “Na’i , hatudu Aman mai ami; ne’e to’o ona mai ami.” Jesus dehan ba nia: ⁹ “Ha’u hela kleur ona ho imi, Filipe, imi seidauk hatene Ha’u? Ema nebe hare ona Ha’u, hare ona mos Ha’u Aman. Nusa mak o dehan, ‘Hatudu Aman mai ami?' ¹⁰ Imi la fiar katak Ha’u hela iha Aman no Aman hela iha Ha’u? Liafuan hirak nebe Ha’u dehan ba imi, Ha’u la dehan hodi Ha’u an rasik. Ha’u Aman, nebe hela iha Ha’u, mak halo Nia hahalok. ¹¹ Fiar Ha’u katak  hela iha Aman, no Aman hela  iha Ha’u. Lae karik, fiar Ha’u tamba hahalok hirak ne’e. ¹² Tebes, tebes, Ha’u dehan ba imi: ema nebe fiar iha Ha’u sei halo mos hahalok sira nebe Ha’u halo; nia sei halo hahalok boot liu fali hirak ne’e, tan Ha’u ba Aman. ¹³ Buat nebe imi husu hodi Ha’u nia naran, Ha’u sei halo, atu Aman hetan gloria iha Oan; ¹⁴ imi husu karik buat ida hodi Ha’u nia naran, Ha’u sei halo.”

                ¹⁵ “Imi hadomi Ha’u karik, imi sei halo tuir Ha’u nia ukunfuan sira. ¹⁶ Ha’u sei harohan ba Aman; no Nia sei fo ba imi Mahein seluk ida, atu hela nafatin ho imi. ¹⁷ Nia mak Espiritu lialos nian, nebe mundu la bele simu, basa la hare Nia no la hatene Nia. Imi hatene Nia, tan Nia hela ho imi, no iha imi laran. ¹⁸ Ha’u sei la husik imi oan kiak; Ha’u sei fila fali ba imi. ¹⁹ Uitoan tan, mundu sei la hare ona Ha’u; maibe imi sei hare Ha’u; basa Ha’u moris no imi mos sei moris ²⁰ Iha loron neba, imi sei hatene katak Ha’u hela iha Aman, no imi iha Ha’u, no Ha’u iha imi. ²¹ Ema nebe simu hodi halo tuir Ha’u nia ukunfuan, nia mak hadomi Ha’u; no ema nebe hadomi Ha’u, Ha’u Aman sei hadomi nia; no Ha’u sei hadomi nia hodi hatudu Ha’u An ba nia.” ²² Judas, la’os Iscariotes,  hateten ba Nia: “Na’i, tansa ita atu hatudu An ba ami, la’os ba mundu?” ²³  Jesus hatan ba nia: “Ema nebe hadomi Ha’u sei simu Ha’u liafuan, no Ha’u Aman sei hadomi nia; Ami sei mai iha nia, hodi horik ho nia. ²⁴ Ema nebe la hadomi Ha’u la simu Ha’u nia liafuan; no liafuan nebe imi rona dau-daun  la’os Ha’u nian, maibe mai housi Aman nebe haruka Ha’u mai.”

                ²⁵ “Ha’u hateten lia hirak ne’e wainhira Ha’u sei hela iha imi nia leet; ²⁶ maibe ksolok Na’in, katak Espiritu Santu, nebe Aman sei haruka mai hodi Ha’u nia naran, sei hanorin imi buat hot‑hotu, hodi halo imi hanoin fali buat tomak nebe Ha’u hateten ona ba imi. ²⁷ Dame Ha’u husik ba imi, Ha’u nia dame Ha’u fo ba imi; la’os hanesan mundu fo mak Ha’u fo ba imi. Imi keta laran susar, keta tauk. ²⁸ Imi rona Ha’u hateten ona ba imi: ‘Ha’u ba ona, no Ha’u sei fila fali ba imi.’ Imi hadomi tiha Ha’u karik, imi sei haksolok tan Ha’u ba Ha’u Aman, basa Aman boot liu Ha’u. ²⁹ Ha’u hateten sai kedas buat ne’e ba imi molok nia mosu, atu wainhira nia mosu, imi fiar. ³⁰ Ha’u sei la koalia buat barak tan ho imi, basa ukun na’in mundu ne’e nian mai dau-daun ona. Nia la iha kbiit atu ukun Ha’u; ³¹ Maibe Ha’u halo buat nebe Aman haruka atu mundu bele hatene katak Ha’u hadomi Aman. Hamriik ba, Ita ba ona!”