15

Jesus mak uvas hun lo-los

                 ¹ “Ha’u mak uvas hun lo-los, Ha’u Aman mak to’os na’in. ² Sanak hotu nebe la fo fuan, Nia hasai, no sanak nebe fo fuan Nia hamos di-diak atu fo fuan liu tan. ³ Imi mos ona tamba liafuan nebe Ha’u hatene ona ba imi. ⁴ Imi hela iha Ha’u, no Ha’u iha imi. Nudar uvas sanak, haketak housi hun, la bele fo fuan mesa-mesak, nune’e mos imi wainhira imi la hela iha Ha’u.⁵  Ha’u mak hun, imi sanak sira; ema nebe hela iha Ha’u no Ha’u iha nia, ema ne’e mak fo fuan barak; basa ketak housi Ha’u, imi la bele halo buat ida. ⁶ Ema la horik iha Ha’u karik, ema sei haketak nia hanesan ai‑sanak hodi sai maran; ema futu hamutuk ai‑sanak sira ne’e hodi soe ba ahi, no ahi sei han sira. ⁷ Maibe imi hela iha Ha’u karik, no Ha’u nia liafuan hela iha imi, imi husu buat naran deit no sei halo duni ba imi. ⁸ Ha’u Aman  hetan gloria nune’e: katak imi fo fuan barak hodi hatudu katak imi Ha’u nia eskolante sira. ⁹ Nudar Aman hadomi Ha’u, nune’e mos Ha’u hadomi imi; hela iha Ha’u nia domin ba. ¹⁰ Imi halo tuir Ha’u nia ukunfuan sira karik, imi sei hela iha Ha’u nia domin; nudar Ha’u mos halo tuir Ha’u Aman nia ukunfuan sira no hela iha nia domin.”

Domin boot liu hotu

                 ¹¹ “Ha’u dehan sai lia hirak ne’e ba imi atu Ha’u nia ksolok hela iha imi no imi nia ksolok sai lo-los. ¹² Ha’u nia ukunfuan mak ida ne’e: imi hadomi malu nudar Ha’u hadomi imi. ¹³ Ema ida la bele hadomi liu fali ema nebe saran nia moris tan nia belun sira. ¹⁴ Imi Ha’u nia belun sira wainhira imi halo tuir nebe Ha’u haruka ba imi. ¹⁵ Ha’u la bolu ona imi atan, basa atan la hatene nia na’in halo sa; maibe Ha’u bolu imi belun, tan Ha’u fo hatene ona ba imi lia hotu nebe Ha’u rona housi Aman. ¹⁶ La’os imi mak fihir Ha’u, maibe Ha’u mak fihir imi, hodi haruka imi ba atu ba fo fuan, no imi nia fuan hela ba nafatin, nune’e buat hotu nebe imi husu ba Aman hodi Ha’u naran, Nia sei haraik ba imi. ¹⁷ Ha’u haruka imi: hadomi malu.”

Mundu hakribi Jesus no eskolante sira

                 ¹⁸ “Mundu odi imi karik, imi hatene ba katak nia odi Ha’u uluk liu imi. ¹⁹ Imi housi mundu ne’e karik, mundu sei hadomi imi nudar ninia an rasik; maibe, tan imi la’os housi mundu, basa Ha’u fihir ona imi housi mundu, tan ne’e mak mundu odi imi. ²⁰ Imi hanoin fali lia hirak nebe Ha’u hateten ona ba imi: ‘Atan ida la’os boot liu nia na’in.’ Sira fo terus Ha’u karik, sira sei fo terus ba imi; sira simu karik Ha’u nia liafuan, sira sei simu mos imi nian. ²¹ Maibe sira sei halo buat ne’e hotu ba imi hodi Ha’u nia naran, basa sira la hatene Ida nebe haruka Ha’u mai. ²² Ha’u la mai karik hodi koalia ba sira, sira sei la iha sala; maibe oras ne’e sira la bele heli sira nia sala. ²³ Ema nebe odi Ha’u, odi mos Ha’u Aman. ²⁴ Ha’u la halo tiha ona karik iha sira nia leet hahalok sira nebe ema seluk la dauk halo, sira sei la iha sala; maibe ohin ne’e, sira hare ona no sira odi Ha’u no Ha’u Aman. ²⁵ Ne’e hotu mosu atu halo tuir lia hirak nebe hakerek ona iha sira nia eskritura: ‘Sira odi Ha’u la ho lia hun ida.’ ²⁶ Maibe wainhira Ksolok Na’in mai, nebe Ha’u sei haruka mai housi Aman, katak Espiritu lialos nian nebe mai housi Aman, Nia sei fo sasin kona ba Ha’u; ²⁷ imi mos sei fo sasin, basa houri uluk kedas imi hamutuk ho Ha’u.”