16

                 ¹ “Ha’u fo hatene ona buat hirak ne’e ba imi atu imi keta monu. ²  Sira sei duni sai imi housi sinagoga sira; lo-los, oras sei to’o mai wainhira ema nebe oho imi sei hanoin katak nia serbi Maromak. ³ Sira sei halo nune’e tamba sira la hatene Aman, la hatene mos Ha’u. ⁴ Maibe Ha’u dehan tiha buat hirak ne’e ba imi atu wainhira oras to’o ona, imi bele hanoin fali katak Ha’u hateten ona kona ba sira ne’e ba imi. Ha’u la dehan buat sira ne’e ba imi houri uluk kedas basa iha tempo neba Ha’u sei hela ho imi.”

Espiritu Santu sei mai

                 ⁵ “Ha’u atu ba ona ba Ida nebe haruka Ha’u mai, no imi ida la husu Ha’u: ‘Ita ba nebe?’ ⁶ Maibe, tan Ha’u dehan buat hirak ne’e ba imi mak imi neon sala. ⁷ Maibe Ha’u dehan lialos ba imi: diak liu ba imi katak Ha’u ba, basa Ha’u la ba karik, Ksolok Na’in sei la mai iha imi; maibe Ha’u ba karik, Ha’u sei haruka Nia ba imi. ⁸ No wainhira Nia mai, Nia sei hatudu ba mundu kona ba sala, kona ba moris los no kona ba tesi lia. ⁹ Kona ba sala, tan sira la fiar Ha’u; ¹⁰ Kona ba moris los, basa Ha’u ba Ha’u Aman no imi sei la hare Ha’u ona; ¹¹ kona ba tesi lia, tamba sei tesi lia ona hasouru ukun na’in mundu ne’e nian.”

                ¹² “Ha’u sei iha tan buat barak atu hateten ba imi, maibe oras ne’e imi la bele simu hotu. ¹³ Wainhira Espiritu lialos nian mai, Nia sei hanorin lialos tomak ba imi; basa Nia sei la koalia hodi nia naran rasik, maibe sei hateten buat nebe Nia rona, hodi fo sai ba imi buat nebe sei mosu aban bainrua. ¹⁴ Nia sei fo gloria mai Ha’u, basa nia sei simu buat nebe Ha’u nian no sei fo hatene ba imi. ¹⁵ Ha’u Aman nia sasan tomak, Ha’u nian mos; tan ne’e mak Ha’u dehan katak Nia simu buat nebe Ha’u nian hodi fo hatene ba imi.”

Terus uluk liu fali ksolok            

                ¹⁶ “Uitoan tan, imi sei la hare ona Ha’u; hafoin, uitoan tan, imi sei hare fali Ha’u.” ¹⁷ Tuir mai nia eskolante balun hateten ba malu: “Lia nebe Nia dehan mai ita ne’e katak sa, ‘Uitoan tan, imi sei hare ona Ha’u, hafoin uitoan tan imi sei hare fali Ha’u’ no mos, ‘Ha’u atu ba Ha’u Aman’? ¹⁸ Sira dehan, ‘Uitoan tan’ ne’e  katak sa? Ita la hatene Nia dehan katak sa.” ¹⁹ Jesus hatene kedas katak sira hakarak husu ba Nia, tan ne’e Nia dehan: “Imi husu ba malu kona ba ne’e: ‘Uitoan tan imi sei la hare ona Ha’u; hafoin uitoan tan imi sei hare fali Ha’u?’  ²⁰ Tebes, tebes, Ha’u dehan ba imi katak imi sei tanis no laran susar, maibe mundu sei haksolok; imi sei sai neon sala, maibe imi nia neon sala sei nakfila ba ksolok. ²¹ Wainhira feto ida atu tur ahi, nia neon sala basa nia oras to’o ona; maibe, tur ahi hotu tiha, nia haluha ona nia terus hodi haksolok tamba ema ida moris ona ba mundu. ²² Nune’e mos, oras ne’e imi neon sala; maibe Ha’u sei hare fali imi, no imi nia fuan sei haksolok, no ema ida la bele hasai housi imi ksolok nebe imi hetan. ²³ Iha loron ne’e, imi sei la husu Ha’u buat ida tan. Tebes, tebes, Ha’u dehan ba imi, imi husu buat naran deit ba Aman, Nia sei haraik ba imi hodi Ha’u nia naran. ²⁴ Too ohin imi la dauk husu buat ida hodi Ha’u nia naran. Husu ba; imi sei simu, atu imi nia ksolok sei sai lo-los.”

                ²⁵ “Ha’u hateten ona buat hirak ne’e ba imi ho aiknanoik sira, oras sei mai wainhira Ha’u sei la koalia tan ho aiknanoik sira, maibe Ha’u sei hateten mo-mos ba imi kona ba Aman. ²⁶ Iha loron neba, imi sei husu hodi Ha’u nia naran; no Ha’u la dehan katak Ha’u sei harohan ba Aman tamba ba imi, ²⁷ basa Aman rasik hadomi imi, tamba imi hadomi tiha Ha’u hodi fiar katak Ha’u mai housi Aman. ²⁸ Ha’u mai housi Aman hodi mai iha mundu; Ha’u atu husik fali mundu hodi fila ba Aman.”

                ²⁹ Eskolante sira dehan: “Oras ne’e Ita koalia mo-mos, la’os tan ho aiknanoik. ³⁰ Oras ne’e ami hare katak Ita hatene buat hotu, no la presisa ema atu husu Ita. Tan ne’e ami fiar katak Ita mai housi Maromak.” ³¹ Jesus hatan: “Imi fiar ona, ka? ³² Oras sei to’o mai, lo-los mai tiha ona, wainhira imi sei namkari, ida-ida ba nia uma, no husik Ha’u mesak; maibe Ha’u sei la mesak, basa Aman hamutuk ho Ha’u. ³³ Hau fo hatene buat ne’e ba imi atu imi hetan dame. Iha mundu imi sei hetan susar barak; maibe imi haksolok ba, basa Ha’u manan tiha mundu.”