17

Jesus nia orasaun

                 ¹ Dehan tiha liafuan hirak ne’e, Jesus foti matan ba lalehan, dehan: “Aman, oras to’o ona. Fo gloria ba ita Oan, atu ita Oan bele fo gloria ba Ita; ² atu nune’e, basa Ita fo ona ba Nia kbiit atu ukun ema tomak, atu fo moris rohan laek ba sira hotu nebe Ita tau iha nia liman.³ Ne’e mak moris rohan laek: hatene Ita nudar Maromak los mesak deit, no Jesus Kristu nebe Ita haruka mai.” ⁴ Ha’u hahi ona Ita iha rai, hodi halo to’o rohan serbisu nebe Ita haruka Ha’u atu halo. ⁵ Aman, oras ne’e hahi fali Ha’u ho gloria nebe Ha’u iha uluk ho Ita, molok  mundu mosu mai.” ⁶ Ha’u haklaken tiha Ita naran ba ema sira nebe Ita haraik mai Ha’u housi mundu. Sira Ita nian, no Ita fo sira mai Ha’u; sira simu ona Ita nia liafuan. ⁷ Oras ne’e sira hatene katak buat hotu nebe Ita fo mai Ha’u, mai housi Ita, ⁸ basa Ha’u haklaken tiha ba sira lia hirak nebe Ita fo mai Ha’u. Sira simu ona lia hirak ne’e no hatene mo-mos katak Ha’u mai housi Ita, hodi fiar katak Ita mak haruka Ha’u mai. ⁹ Ha’u harohan ba sira; Ha’u la harohan ba mundu, maibe ba sira nebe Ita haraik mai Ha’u, basa sira Ita nian. ¹⁰ Buat hotu nebe Ha’u nian, Ita nian; no buat nebe Ita nian, Ha’u nian mos. No Ha’u hetan gloria iha sira. ¹¹ Ohin Ha’u la hela ona iha mundu, maibe sira sei hela iha mundu, no Ha’u ba hasouru Ita. Aman Santu, tau matan ba sira iha Ita naran. nebe ita haraik mai Ha’u, atu sira sai ida deit, nudar Ita ho Ha’u ida deit. ¹² Wainhira Ha’u sei hela ho sira, Ha’u rasik tau matan ba sira iha Ita naran. Ha’u tau matan di-diak ba sira nebe Ita haraik mai Ha’u. Ha’u tahan di-diak sira, atu sira ida la lakon; lakon deit mak lakon an nia oan, atu eskritura sai tuir lo-los. ¹³ Maibe oras ne’e Ha’u atu fila ba Ita, no Ha’u dehan sai buat hirak ne’e iha mundu atu sira hetan Ha’u nia ksolok to’o sai lo-los. ¹⁴ Ha’u fo hatene ona ba sira ita nia liafuan, no mundu odi sira, basa sira la’os mundu ne’e nian, nudar Ha’u mos la’os mundu ne’e nian. ¹⁵ Ha’u la husu atu Ita hasai sira housi mundu, maibe atu Ita hadook sira housi Aat Na’in. ¹⁶ Sira la’os mundu ne’e nian, nudar Ha’u mos la’os mundu ne’e nian. ¹⁷ Halo sira santu iha lialos. Ita nia liafuan mak lialos. ¹⁸ Nudar Ita haruka Ha’u mai iha mundu, nune’e mos Ha’u haruka sira ba mundu. ¹⁹ No tamba sira mak Ha’u halo An santu, atu sira mos bele sai santu iha lialos.”

                ²⁰ “Ha’u la harohan deit ba sira ne’e, maibe mos ba sira nebe sei fiar Ha’u tan sira ne’e nia liafuan; ²¹ atu sira hotu sai ida deit, Ita, Aman, horik iha Ha’u, no Ha’u iha Ita; atu sira mos hela iha Ita Na’in rua, nune’e mundu bele fiar katak Ita mak haruka Ha’u mai. ²² Ha’u fo ona ba sira gloria nebe Ita fo mai Ha’u, atu sira sai ida deit, nudar Ita Na’in rua ida deit. ²³ Ha’u iha sira, no Ita iha Ha’u; atu sira laran ida deit teb-tebes, nune’e mak mundu sei hatene katak Ita mak haruka Ha’u mai, no mos katak Ita hadomi sira nudar Ita hadomi Ha’u. ²⁴ Aman, Ha’u hakarak katak sira mos nebe Ita fo mai Ha’u, hela hamutuk ho Ha’u iha fatin nebe Ha’u hela; atu sira bele hare Ha’u nia gloria nebe Ita fo tiha mai Ha’u tan Ita hadomi Ha’u molok mundu hahu. ²⁵ Aman Santu, mundu ne’e la hatene Ita; maibe sira ne’e hatene katak Ita mak haruka Ha’u mai. ²⁶ Ha’u fo hatene tiha ba sira Ita nia naran, no Ha’u sei fo hatene liu tan, atu domin nebe Ita hadomi Ha’u bele hela iha sira, no Ha’u hela iha sira.”