18

Sira kaer Jesus

                 ¹ Dehan tiha liafuan hirak ne’e, Jesus ho nia eskolante sira hakat liu ba rai klean Sedron. Sira tama iha to’os ida iha neba. ² Judas, ida nebe atu saran Nia ba mate, hatene mos fatin ne’e, basa dala barak ona Jesus halibur hamutuk ho nia eskolante sira iha neba. ³ Ne’e duni, Judas ba neba ho soldadu lubun ida, guarda balun no na’i ulun housi am’lulik boot no fariseu sira, ho ahi oan no kroat. ⁴ Hatene tiha buat hotu nebe sei mosu ba Nia, Jesus ba hasouru sira hodi dehan: “Imi buka se?” ⁵ Sira hatan ba Nia: “Ami buka Jesus Nazare.” Nia simu: “Ha’u mak ne’e.” Judas, nebe atu saran Nia ba mate, nia mos hamutuk ho sira. ⁶ Wainhira Jesus dehan ‘Ha’u mak ne’e’, sira hakiduk hodi monu ba rai. ⁷ Dala ida tan, Jesus husu ba sira, dehan: “Imi buka se?” Sira hatan: “Jesus Nazare.” ⁸ Jesus simu hikas; “Ha’u hateten ona ba imi katak Ha’u mak ne’e; ne’e duni, imi buka Ha’u karik, husik sira ne’e la’o ba.” ⁹ Buat ne’e, atu halo tuir lia hirak nebe Nia dehan uluk: “Sira nebe Ita haraik mai Ha’u, ida la lakon.” ¹⁰ Iha oras neba, Simao Pedro losu nia surik no hakanek am’lulik boot nia atan ida hodi sabir tiha nia tilun kuana. Atan ne’e naran Malco ¹¹ Maibe Jesus lia tun ba Pedro: “Hatama  o nia surik iha nia fatin! Ha’u sei la hemu kalis nebe Ha’u Aman haraik mai Ha’u?”

                ¹² Tuir mai soldadu lubun ida ho sira nia na’i ulun no guarda sira kaer Jesus, hodi futu metin nia. ¹³ Uluk knanain, sira lori nia ba Anas, Caifas nia banin. Iha tinan neba Caifas mak am’lulik boot. ¹⁴ Caifas mak fo lia ba Judeu sira, dehan katak diak liu ema ida deit mak mate ba povu.

Pedro heli Jesus

                        ¹⁵ Simao Pedro ho eskolante ida seluk tuir Jesus. Eskolante ida ne’e, nebe am’lulik boot hatene, tama ho Jesus ba am’lulik boot nia uma klabis. ¹⁶ Pedro hela deit iha odamatan liur. Hafoin eskolante ida seluk nebe am’lulik boot hatene, sai ba liur, koalia ho atan feto nebe hein odamatan, hodi lori Pedro ba uma laran. ¹⁷ Atan feto dehan ba Pedro: “O la’os ema ne’e mos nia eskolante ida?” Nia hatan: “Ha’u lae.” ¹⁸ Atan no guarda sira hamriik hela iha neba. Tan malirin, sira tau ahi hodi haneruk; Pedro mos haneruk hamutuk ho sira.

                ¹⁹ Hafoin am’lulik boot husu ba Jesus kona ba nia eskolante sira no mos kona ba nia doutrina.²⁰ Jesus hatan ba nia, dehan: Ha’u koalia iha ema hotu nia oin. Ha’u hanorin bei-beik iha sinagoga sira no iha templu, iha nebe Judeu hotu sira halibur hamutuk. Ha’u la subar lia ida. ²¹ Tansa o husu Ha’u? Husu sira nebe rona Ha’u, buat nebe Ha’u hanorin sira. Sira hatene buat nebe Ha’u dehan.” ²² Jesus koalia tiha nune’e, guarda ida basa nia, dehan: “O hatan ba am’lulik boot hanesan ne’e?” ²³ Jesus simu hodi dehan: “Ha’u koalia sala karik, ne’e sa hatudu to’ok mai; maibe, Ha’u koalia los karik tansa o basa Ha’u?” ²⁴ Tuir mai Anas haruka Jesus nebe futu metin hela, ba am’lulik boot  Caifas.

²⁵ Simao Pedro sei haneruk dau-daun, sira dehan ba nia: “O mos keta nia eskolante ida karik?” Nia heli lia, dehan, “Ha’u lae!” ²⁶ Amlulik boot  nia atan ida, ida nebe Pedro sabir nia tilun nia parenti, hateten ba nia: “Ha’u la hare o iha to’os laran ho Jesus?” ²⁷ Dala ida tan ba Pedro heli lia. Iha oras neba manu ida kokorek kedas.

Jesus iha Pilatos nia oin  

                        ²⁸ Sira lori Jesus housi Caifas nia uma ba gubernador nia uma. Dadersan ona, sira la tama ba uma laran atu la bele sai foer, nune’e sira bele han Paskua. ²⁹ Pilatos mai hasouru sira iha liur hodi dehan: “Imi kesar ema ne’e tansa los?” Sira hatan: ³⁰ “Nia la’os ema aat karik, ami sei la saran Nia ba ita liman.” ³¹ Pilatos dehan, “Tesi lia ba Nia ba tuir imi nia ukunfuan.” Judeu sira hatan fali ba nia: “Bandu tiha mai ami atu oho ema.” ³² Ne’e atu halo tuir lia nebe Jesus hateten nanis ona oin sa Nia sei mate. ³³ Ne’e duni, Pilatos tama fali ba uma laran. Nia bolu Jesus, hodi husu ba Nia: “O mak Judeu sira nia liurai?” ³⁴ Jesus hatan: “O rasik dehan buat ne’e, ka ema seluk mak dehan ba o kona ba Ha’u?” ³⁵ Pilatos simu hikas, dehan: “Ha’u ema Judeu ida? O nia povu no am’lulik boot sira mak saran o ba ha’u nia liman. O halo sa ida?” ³⁶ Jesus hatan: “Ha’u nia reinu la’os raiklaran ne’e nian. Ha’u nia reinu raiklaran ne’e nian karik, Ha’u nia emar sira sei halo funu atu Ha’u la bele monu ba Judeu sira nia liman. Maibe, Ha’u nia reinu la’os raiklaran ne’e nian. ³⁷ Pilatos dehan ba Nia: “Ne’e sa o liurai duni?” Jesus hatan: “O mak dehan katak Ha’u liurai. Tan ne’e mak Ha’u moris, no tan ne’e mak Ha’u mai iha mundu, atu fo sasin kona ba lialos. Ema hotu lialos nian rona Ha’u nia lia.” ³⁸ Pilatos husu fali: “Sa ida mak lialos?”

                Dehan tiha buat hirak ne’e, nia sai fali hasouru Judeu sira, dehan: “Ha’u la hetan lia ida hasouru ema ne’e. ³⁹ Maibe, tuir imi nia lisan tinan‑tinan iha loron Paskua, ha’u sei husik sai ema dadur ida. Ne’e duni, imi hakarak Ha’u husik ba imi Judeu sira nia liurai?” ⁴⁰ Sira hotu hakilar: “La’os nia, maibe Barrabas!” Barrabas mak ema na’okten ida.