20

Rate mamuk

                 ¹ Iha loron uluk semana nian, iha dadersan nakukun, Maria Madalena ba to’o rate. Hare fatuk iha rate nia oin duir tiha ba sorin, ² nia halai fali hasouru Simao Pedro no eskolante ida seluk nebe Jesus hadomi, hodi dehan ba sira: “Ema lori tiha Na’i housi rate, ami la hatene sira tau los Nia iha nebe!” ³ Pedro ho eskolante ida seluk sai kedas ba rate. ⁴ Sira halai hamutuk, maibe eskolante ida seluk lalais liu Pedro, hodi to’o uluk rate. ⁵ Nia hakru’uk, hodi hare hena sira namkari iha rai, maibe nia la tama. ⁶ Simao Pedro mos to’o tuir nia; nia tama iha rate laran hodi hare hena sira namkari iha rai, ⁷ no mos hena mutin nebe hodi falun Jesus nia ulun, hena ne’e la tau hamutuk ho hena seluk, maibe lulun ketak iha fatin seluk. ⁸ Hafoin, eskolante ida seluk nebe to’o uluk tama hotu. Nia hare hodi fiar. ⁹ Tamba to’o oras ne’e sira nia neon la dauk nakloke ba lia eskritura nian katak Nia sei moris hi’as duni housi mate. ¹⁰ Tuir mai eskolante sira fila fali ba uma.

Jesus mosu ba Maria Madalena

                 ¹¹ Maria fali hamriik iha rate liur hodi tanis, no sei tanis hela, nia hakru’uk hodi hateke ba rate laran. ¹² Nia hare anju na’in rua hatais mutin tur iha fatin nebe sira tau Jesus nia isin, ida iha ulun, ida iha ain. ¹³ Sira dehan: “Feto, tansa o tanis? O buka se?” Nia hatan ba sira: “Basa ema lori tiha ha’u nia Na’i, no ha’u la hatene sira tau Nia iha nebe.” ¹⁴ Dehan tiha liafuan hirak ne’e, nia fila hodi hare Jesus hamriik iha neba, maibe nia la hatene katak ne’e mak Jesus. ¹⁵ Jesus dehan ba nia, “Feto, tansa o tanis? O buka se?” Hanoin katak nia mak to’os na’in, Maria husu fali: “Na’i, ita mak lori nia karik, hateten to’ok mai ha’u ita tau Nia iha nebe, atu ha’u bele ba hola Nia.” ¹⁶ Jesus dehan: “Maria!” Nia fila, hodi dehan ba Jesus: “Rabboni!” katak Mestre. ¹⁷ Jesus dehan fali ba nia: “Keta kona netik Ha’u, tan Ha’u seidauk sa’e ba Aman. Maibe ba hasouru Ha’u nia maun alin sira, hodi dehan ba sira katak Ha’u sa’e ba Ha’u nia Aman no imi nia Aman; ba Ha’u nia Maromak no imi nia Maromak.” ¹⁸ Ne’e duni, Maria Madalena ba hateten ba eskolante sira: “Ha’u hare ona Na’i;” no nia hateten ba sira katak Nia dehan buat sira ne’e ba nia.

Jesus mosu ba eskolante sira

                 ¹⁹ Iha kalan loron uluk semana nian, uma iha nebe eskolante sira hela, nia odamatan taka metin tan sira tauk Judeu sira, Jesus mosu mai, hamriik iha sira leet, hodi dehan: “Dame hela ho imi!” ²⁰ Koalia tiha nune’e, Jesus hatudu ba sira Nia liman no sorin. Hare tiha Jesus, eskolante sira haksolok teb-tebes. ²¹ Nia lia tun teni ba sira: “Dame hela ho imi! Nudar Ha’u Aman haruka Ha’u mai, nune’e mos Ha’u haruka imi.” ²² Hateten tiha ne’e, Nia hu’u iis ba sira dehan: “Simu ba Espiritu Santu! ²³ Sira nebe imi perdua sira sala, sira hetan duni perdua ba sira sala; sira nebe imi la perdua sira sala, sira la hetan duni perdua ba sira sala.”

                ²⁴ Tome, sira na’in sanulu resin rua ne’e ida, nebe ema hanaran Kaduak, la hamutuk ho sira wainhira Jesus mosu. ²⁵ Tan ne’e, eskolante sira hateten ba nia: “Ami hare ona Na’i!” Maibe nia hatan ba sira: “Ha’u la hare karik besi kusan nia kuak iha nia liman, la tau karik ha’u nia limanfuan iha besi kusan fatin, no la hatama karik ha’u nia liman iha nia  sorin, ha’u sei la fiar.”

                ²⁶ Liu tiha loron ualu, eskolante sira halibur fali iha uma. Tome mos hamutuk ho sira. Odamatan sei taka hela, Jesus mosu hodi hamriik iha sira leet, dehan: “Dame hela ho imi!” ²⁷ Hafoin Nia hateten ba Tome: “Tau o nia limanfuan iha ne’e, no hare Ha’u nia liman; lolo o nia liman hodi hatama iha Ha’u nia sorin. O keta laran tos, maibe fiar!” ²⁸ Tome hatan: “Ha’u nia Na’in, ha’u nia Maromak!” ²⁹ Jesus lia tun teni ba nia: “O fiar tan o hare tiha Ha’u? Rahun diak ba sira nebe fiar maski la hare.”

                ³⁰ Jesus halo sinal seluk barak tan iha nia eskolante sira oin, nebe la hakerek iha livru ne’e. ³¹ Maibe sira ne’e hakerek atu imi fiar katak Jesus mak Kristu, Maromak Oan; atu nune’e, hodi fiar, imi hetan moris hodi Nia naran.