21

Jesus mosu iha tasi Tiberiades nia sorin

                ¹ Tuir mai, Jesus mosu dala ida tan besik tasi Tiberiades. Nia mosu nune’e. ² Simao Pedro, Tome nebe hanaran Kaduak; Natanael housi kana Galileia nian; Zebedeu nia oan sira, ho tan eskolante na’in rua, halibur hamutuk iha neba. ³ Simao Pedro hateten ba sira: “Ha’u ba tiha ikan.” Sira dehan ba nia: “Ami mos ba hotu.” ⁴ Iha rai hun mutin, Jesus hamriik iha tasi ibun; maibe eskolante sira la hatene katak Nia mak Jesus. ⁵ Nia dehan ba sira: “Labarik sira, imi iha buat ruma atu han?” Sira hatan: “La iha” ⁶ Nia simu fali: “Imi soe dai ba sorin kuana, imi sei hetan.” Ne’e duni, sira soe dai, hafoin sira la bele dada mai, tan ikan barak liu.⁷ Tan ne’e, eskolante nebe Jesus hadomi hateten ba Pedro: “Nia mak Na’i!” Rona katak Na’i mak neba, Simao Pedro hatais tiha, basa nia isin tanan, hodi haksoit ba tasi laran. ⁸ Eskolante sira seluk tama iha ro laran, hodi dada dai nebe nakonu ho ikan, basa sira la dook housi rai, besik metru atus ida.

                ⁹ Tun tiha ba rai, sira hare ahi klaak ho ikan iha leten ho tan paun . ¹⁰ Jesus hateten ba sira: “Imi lori ikan balun nebe imi foin kaer mai.” ¹¹ Simao Pedro sa’e ba ro hodi dada dai ba rai, ho ikan nakonu; ikan boot deit atus ida lima nulu resin tolu. Maski barak nune’e, dai la nakles. ¹² Jesus dehan ba sira: “Imi mai han.” Eskolante sira ida mos la berani atu husu ba Nia “Ita se los?” tan sira hatene katak Nia mak Na’i. ¹³ Jesus hakbesik, kaer paun, hodi fo ba sira; nune’e mos ho ikan. ¹⁴ Nune’e ba dala tolu Jesus mosu ba nia eskolante sira, liu tiha Nia moris hi’as housi mate.

                ¹⁵ Sira han hotu tiha, Jesus husu ba Simao Pedro: “Simao, Joao nia oan, o hadomi Ha’u liu fali sira ne’e?” Nia hatan: “Tebes, Na’i, Ita hatene katak ha’u hadomi Ita.” Jesus dehan ba nia: “Fo han Ha’u nia bibi‑oan sira.” ¹⁶ Dala ida tan Nia husu: “Simao, Joao nia oan, o hadomi Ha’u?” Pedro hatan: “Tebes duni, Na’i, Ita hatene katak ha’u hadomi Ita.” Jesus dehan ba Nia: “Tau matan ba Ha’u nia bibi sira.” ¹⁷ Ba dala tolu Nia husu: “Simao, Joao nia oan, o hadomi Ha’u?” Pedro neon sala, tan Jesus husu dala tolu ona ba nia “O hadomi Ha’u?” Nia dehan ba Nia: “Na’i, Ita hatene hotu, Ita hatene katak ha’u hadomi Ita.” Jesus hateten ba Nia: “Fo han Ha’u nia bibi sira. ¹⁸ Tebes, tebes, Ha’u dehan ba o: wainhira o sei klosan o rasik mak hatais an, hodi la’o ba fatin nebe o hakarak; maibe katuas tiha, o sei lolo liman atu ema seluk fo hatais o, hodi lori o ba fatin nebe o lakohi.” ¹⁸ Nia koalia nune’e atu fo sai oin sa Pedro sei hetan mate hodi fo gloria ba Maromak. Tuir mai, Jesus dehan ba nia: “Tuir Ha’u mai.”

                ²⁰ Pedro fila hodi hare katak eskolante nebe Jesus hadomi tuir sira, katak, ida nebe sader ba Jesus nia hirus matan wainhira sira han, hodi dehan, “Na’i, se los mak sei saran Ita ba mate?” ²¹ Ne’e duni, hare tiha nia, Pedro husu ba Jesus: “Na’i, kona ba nia?” ²² Jesus hatan: “Ha’u hakarak karik katak nia hela to’o Ha’u mai fali, ne’e sa ida ba o? O tuir deit Ha’u!” ²³ Housi ne’e mosu lia ida iha eskolante sira leet, katak eskolante ida ne’e sei la mate. Maibe Jesus la dehan ba Pedro, “Nia sei la mate;” Nia dehan deit “Ha’u hakarak karik nia hela to’o Ha’u mai fali, ne’e sa ida ba o?” ²⁴ Ida ne’e mak eskolante nebe fo sasin kona ba buat hirak ne’e, no hakerek tiha buat hirak ne’e, no ami hatene katak nia sasin los. ²⁵ Jesus halo tan buat barak seluk: atu hakerek buat ne’e hotu, ha’u hanoin katak iha mundu tomak la iha fatin atu tau