APOSTOLU SIRA NIA HAHALOK
1
Espiritu Santu atu mai
1 Doben
Teofilo, iha ha’u nia livru uluk, ha’u hakerek ona kona ba Jesus nia hahalok no
nia hanorin, 2 to’o loron nebe, hodi Espiritu
Santu, hanorin tiha apostolu sira nebe Nia fihir nanis, Maromak foti Nia ba lalehan.
3 Terus tiha, Nia mosu ba sira nudar ema moris ho
sinal barak; Nia mosu iha loron haat nulu nia laran hodi koalia ba sira kona ba
Maromak nia reinu. 4 Sei horik dau-daun ho sira,
Nia husu sira atu la bele sai housi Jerusalem, maibe hein Aman nia promessa
nebe “imi rona tiha ona housi Ha’u; 5 basa Joao
sarani ho be, maibe iha loron balun tan, imi sei simu baptismu ho Espiritu
Santu.”
Jesus sa’e ba lalehan
6 Wainhira
sira halibur an hamutuk ona, sira husu ba Nia. “Na’i, oras ne’e mak Ita Boot
sei foti sa’e fali reinu Israel nian?” 7 Nia hatan ba sira: “La’os imi mak hatene tempu
eh oras nebe Aman Maromak hakarak ho nia kbiit rasik. 8 Maibe,
wainhira Espiritu Santu tun ba imi, imi sei simu kbiit; imi sei sai Ha’u nia
sasin iha Jerusalem, iha Judeu no Samaria tomak to’o rai nia rohan”. 9
Dehan tiha ne’e, no sira hateke hela, Jesus sa’e ba lalehan, no kalohan
ida taka Nia housi sira nia matan. 10 Sira sei
hateke hela ba leten no Nia sa’e dau-daun, mane na’in rua ho hatais mutin
hamriik iha sira nia sorin. 11 Sira dehan, “Ema
Galileia sira, tan sa imi hamriik hodi hateke ba leten? Jesus ne’e nebe hasai tiha
housi imi sei fila fali mai nudar imi hare Nia sa’e ba lalehan.” 12
Tuir mai, sira fila fali ba Jerusalem housi foho naran Oliveira, nebe
besik Jerusalem la’o deit tuir loron Sabadu ida.
Komunidade sarani uluk nian
13 Wainhira
sira tama tiha iha sidade laran, sira sa’e ba kuartu iha andar leten iha nebe
sira horik ba, Pedro no Joao no Tiago no Andre, Filipe no Tome, Bartolomeu no
Mateus, Tiago, Alfeu nia oan, Simao Zelota no Judas, Tiago nia oan. 14
Sira ne’e hotu, ho neon ida deit, badinas atu harohan, hamutuk ho feto
balun no Maria, Jesus nia inan, no Nia maun alin sira.
Ema atu taka Judas nia fatin
15
Iha loron hirak neba, Pedro hamriik iha maun alin sira leet; sira besik na’in
atus ida rua nulu iha fatin ida deit. Nia dehan, 16 “Ha’u
nia maun alin sira, Eskritura ten ke halo tuir iha nebe Espiritu Santu koalia
nanis housi David nia ibun, kona ba Judas, nebe sai matadalan ba sira nebe kaer
Jesus. 17 Nia mos sura hamutuk ho ita no hetan mos
parte iha serbisu ne’e. 18 Nia sosa rai ida ho osan
housi nia hahalok aat, no hodi monu todan, nia isin fera iha klaran no nia isin
lolon nia laran nakfakar hotu. 19 Ema hotu nebe
horik iha Jerusalem hatene buat ne’e, nune’e ema hanaran rai ne’e ‘Hakeldama’
iha sira nia lia, katak ‘rai ran nian’. 20 Basa
hakerek nanis ona, ‘Rai sei sai fuik, no ema ida sei la horik iha nia.’ No:
‘Ema seluk sei kaer nia knaar.’ 21 Ne’e duni, ema
ida nebe hela ho ita iha tempu tomak nebe Jesus la’o mai la’o ba iha ita nia
leet, 22 hahu Joao nia baptismu to’o loron nebe Nia
sai housi ita leet, sei sai sasin ba Nia moris hi’as hamutuk ho ami.” 23
Ne’e duni, sira bolu ema na’in rua, Jose nebe ema hanaran Barsabas, nebe
ema bolu mos Justo, no Matias. 24 Tuir mai, sira
harohan: “Na’i, Ita nebe hatene ema nia fuan, hatudu housi ema na’in rua ne’e
se mak Ita fihir 25 atu kaer knaar apostoliku nebe
Judas husik tiha hodi taka nia fatin. 26 Hafoin
sira dada sorte, no sorte monu ba Matias, no sira sura nia hamutuk ho apostolu
sanulu resin ida.
|