3

Ema ain kudeik hetan diak

                ¹ Pedro ho Joao sa’e ba templu atu tuir orasaun tuku tolu loraik nian. ² Iha oras ne’e ema balun lori ema ida nebe moras houri kiik kedas mai; loron loron sira tau nia iha odamatan templu nian nebe hanaran “furak” nia oin, atu husu esmola ba sira nebe tama iha neba. ³ Wainhira nia hare Pedro ho Joao atu tama iha templu laran, nia husu esmola. ⁴ Maibe Pedro no Joao fihir nia hodi dehan: “Hateke mai ami!” ⁵ Nia hateke ba sira hodi hein atu simu buat ruma housi sira. ⁶ Pedro dehan: “Osan mutin ka osan mean ha’u la iha, maibe buat nebe ha’u iha, ha’u fo ba o: hodi Jesus Kristu Nazare nia naran, o hamriik hodi la’o ba!” ⁷ Pedro kaer nia liman los hodi tulun nia hamriik no ema ne’e sinti forsa kedas iha nia ain. ⁸ Nia haksoit, hamriik no hahu la’o mai la’o ba hodi tama iha templu laran ho sira, nia la’o no haksoit no hahi Maromak. ⁹ Wainhira ema hotu hare nia la’o no hahi Maromak, ¹⁰ sira hatene nia nudar ida nebe tur bai-bain iha odamatan furak templu nian, husu esmola no sira hot-hotu hakfodak kona ba buat nebe mosu ba nia.

Pedro nia liafuan

                ¹¹ Niakaer dau-daun Pedro no Joao, ema hotu hakbesik lalais ba sira hodi hakfodak iha portiku naran Salomao nian. ¹² Wainhira Pedro hare ida ne’e, nia dehan ba povu : “Ema Israel sira, tan sa imi hakfodak ho buat ne’e no tan sa imi hateke mai ami hanesan hodi ami nia kbiit rasik ka laran sadia mak ami halo ema ne’e la’o? ¹³ Abraao nia Maromak, Isaac no Jacob nian, ita nia bei-ala sira nia Maromak mak fo gloria ba nia atan Jesus, nebe imi saran no hewai  iha Pilatos nia oin wainhira nia hakarak atu husik tiha nia. ¹⁴ Imi hakribi ema santu no ema los hodi husu katak nia husik fali ba imi ema nebe oho ema seluk. ¹⁵ Imi oho mate moris nia hun, maibe Maromak halo Nia moris hi’as housi mate sira leet, no ami hotu sasin ba buat ne’e. ¹⁶ Hodi Nia naran no hodi ami nia fiar iha Nia naran, mak ema ne’e nebe imi hare no hatene, hetan kbiit; fiar nebe mosu mai tamba Jesus mak fo isin diak ba ema ne’e iha imi hotu nia oin. ¹⁷ Oras ne’e, maun alin sira, ha’u hatene katak imi halo buat ne’e tamba imi la hatene, nune’e mos imi nia na’i ulun sira, ¹⁸ maibe Maromak halo tuir lo-los buat nebe Nia fo sai nanis ona housi profeta sira nia ibun, katak: Na’i nia Messias sei hetan terus. ¹⁹ Ne’e duni, hakribi imi sala ba hodi fila hikas ba Na’i atu imi nia sala bele hetan perdua, ²⁰ no Na’i haraik ba imi tempu atu hafoun an no haruka ba imi Messias nebe Nia hanoin ona atu saran ba imi, katak Jesus. ²¹ Lalehan sei simu Nia to’o tempu nebe Maromak sei hafoun buat hot-hotu nebe Nia hateten nanis ona housi nia profeta santu sira nia ibun. ²² Basa Moises dehan: ‘Na’i, imi nia Maromak sei foti profeta ida hanesan ha’u ba imi housi imi nia uma-kain. Imi sei rona nia iha buat hotu nebe nia sei dehan ba imi. ²³ Ema nebe la rona profeta ne’e sei haketak an housi povu nia leet.’ ²⁴ Mos, profeta  sira hotu, hahu housi Samuel no sira nebe tuir nia koalia mos kona ba loron sira ne’e. ²⁵ Imi nia profeta sira nia oan no moruk nia oan, nebe Maromak halo ho imi nia bei-ala sira wainhira Nia dehan ba Abraao: ‘Iha o nia bei-oan ida mak familia hotu rai ne’e nian sei simu bensa wa’in.’ ²⁶ Uluk knanain ba imi, Maromak foti tiha nia atan no haruka nia atu haraik bensa ba imi hodi hasai imi ida-ida housi imi nia laran aat.’”