4

                ¹ Apostolu sira sei koalia dau-daun ba povu, am’lulik sira no guarda templu nian  no ema saduseu sira mosu hodi si’ak sira, ho laran hirus tan sira hanorin povu no haklaken iha Jesus ema mate sira nia moris hi’as. ² Sira kaer apostolu sira no hatama sira iha dadur laran to’o loron nebe tuir mai basa loraik ona. ³ Maibe, ema barak nebe rona liafuan ne’e fiar kedas, no sura deit mane sira, sira to’o besik rihun lima.

Iha Sinedriu nia oin

                ⁵ Loron tuir mai, na’i ulun sira, katuas no eskriba sira halibur an iha Jerusalem; ho Anas, am’lulik boot, ho Caifas, Jonatas,  Alexandre no sira hotu nebe kona ba am’lulik ulun sira nia familia. ⁷ Sira haruka bolu apostolu sira iha sira oin hodi husu ba sira: “Hodi kbiit ida nebe ka hodi se nia naran mak imi halo buat hirak ne’e?” ⁸ Nune’e Pedro, nakonu ho Espiritu Santu, hatan ba sira: “Povu nia na’i ulun no katuas sira, ⁹ imi husu ami karik kona ba buat kmanek nebe ami halo ba ema moras ne’e, katak, oin sa nia hetan diak, ¹⁰  ne’e duni, imi hotu no povu Israel tomak hatene ba katak hodi Jesus Kristu Nazare nia naran, Nia nebe imi hedi ba krus maibe Maromak halo moris hi’as housi mate; mak ema nebe iha imi nia oin ne’e hetan isin diak lo-los. ¹¹ Jesus mak fatuk nebe imi, badaen sira, hewai maibe sai fali fatuk inan. ¹² La iha maksoin housi ema seluk, no la iha naran seluk iha lalehan nia okos atu fo ba ema atu hodi nia, ita hetan maksoin.

                ¹³ Judeu nia ulun sira, hare Pedro ho Joao nia aten berani no hatene katak sira ne’e ema bai-bain nebe la matenek, hakfodak, no sira hatene katak sira ne’e Jesus nia maluk. ¹⁴ Tuir mai, wainhira sira hare ema nebe apostolu sira fo isin diak hamriik iha sira oin hamutuk ho sira, sira la bele hateten tan buat ida atu hatan. ¹⁵ Tan ne’e sira haruka sira sai housi Sinedriu no sira hahu koalia ba malu: ¹⁶ “Ita sei halo sa los ba ema sira ne’e? Ema hotu nebe horik iha Jerusalem hatene katak sira halo hahalok kmanek ida no ita la bele nega nia.  ¹⁷ Maibe atu buat ne’e la bele halekar iha povu nia leet, ita ameasa sira maka’as atu sira la bele koalia tan ba ema ruma iha Nia naran.” ¹⁸ Nune’e sira  bolu fali apostolu sira hodi bandu sira atu la bele hanorin no koalia hodi Jesus nia naran. ¹⁹ Maibe Pedro ho Joao hatan ba sira: “Imi hanoin ba: iha Maromak futar oin, ami halo tuir imi nia haruka hodi la halo tuir Maromak, ne’e los ka lae! ²⁰ Ami la bele nonok deit kona ba buat nebe ami hare no rona.” ²¹ Sira ameasa sira liu tan, hafoin husik  sira ba, basa sira la hare oin sa fo kastigu ba sira tan povu nebe hahi Maromak tamba buat nebe mosu. ²² Basa ema nebe simu isin diak ne’e iha ona tinan haat nulu resin.           

Komunidade nia orasaun

                ²³ Sai tiha housi neba, Pedro ho Joao fila fali ba sira nia maluk sira hodi haktuir buat nebe am’lulik boot no katuas sira dehan ba sira. ²⁴ Wainhira maluk sira rona ne’e, sira hasa’e lia ba Maromak ho neon no fuan ida deit; hodi dehan: “Na’i kbiit na’in, Ita mak halo lalehan no rai no tasi no buat hotu nebe iha sira laran, ²⁵ Ita mak hato’o Ita lia housi Espiritu Santu housi ita atan, ami aman David nia ibun: ‘Tansa nasaun sira sai bulak no povu sira hanoin buat oi-oin nebe folin laek? ²⁶ Liurai sira rai ne’e nian hamriik hamutuk no ema ran liurai sira halibur an hamutuk hodi hasouru Na’i no nia Kristu. ²⁷ Tebes, sira, Herodes no Poncio Pilatos hamutuk ho ema gentiu sira no povu Israel, halibur an iha sidade ne’e hasouru Ita atan santu Jesus, nebe Ita kose tiha ho mina, ²⁸ atu halo tuir lo-los buat hotu nebe Ita nia liman no Ita nia hanoin hakarak nanis ona atu mosu. ²⁹ Oras ne’e, Na’i, hare sira nia ameasa, no tulun Ita atan sira atu bele haklaken ho aten berani Ita futar lia, ³⁰ hodi lolo Ita nia liman atu fo isin diak, ho sinal no kmanek oi-oin hodi Ita atan santu Jesus nia naran.” ³¹ Sira harohan hotu tiha, fatin nebe sira hela nakdoko no sira hotu sai nakonu ho Espiritu Santu. Sira haklaken Maromak futar lia ho aten berani.

Moris iha komunidade

                ³² Ema sira nebe fiar laran ho neon ida deit; iha sira leet, ema ida la dehan: ne’e ha’u nian, ne’e o nian! Ida-ida nia rikusoi, sira hotu nian.  ³³ Apostolu sira, ho kbiit wa’in fo sasin katak Na’i Jesus moris hi’as duni no Nia fo kmanek boot ba sira hotu ³⁴ Iha sira leet, la iha ema kiak basa sira nebe iha rikusoi ka uma fa’an nia, ³⁵ lori nia folin ba apostolu sira, no sira ne’e fahe nia ba sira nebe iha susar laran.

                ³⁶ Nune’e levita ida naran Jose housi rai Chipre, nebe apostolu sira hanaran Barnabe, katak “lia laran manas nian nia oan’,  ³⁷ fa’an nia to’os ida, lori to’os ne’e nia folin  no tau nia iha apostolu sira ain.