23 Sai
tiha housi neba, Pedro ho Joao fila fali ba sira nia maluk sira hodi haktuir
buat nebe am’lulik boot no katuas sira dehan ba sira. 24 Wainhira
maluk sira rona ne’e, sira hasa’e lia ba Maromak ho neon no fuan ida deit; hodi
dehan: “Na’i kbiit na’in, Ita mak halo lalehan no rai no tasi no buat hotu nebe
iha sira laran, 25 Ita mak hato’o Ita lia housi
Espiritu Santu housi ita atan, ami aman David nia ibun: ‘Tansa nasaun sira sai
bulak no povu sira hanoin buat oi-oin nebe folin laek? 26
Liurai sira rai ne’e nian hamriik hamutuk no ema ran liurai sira halibur
an hamutuk hodi hasouru Na’i no nia Kristu. 27 Tebes,
sira, Herodes no Poncio Pilatos hamutuk ho ema gentiu sira no povu Israel,
halibur an iha sidade ne’e hasouru Ita atan santu Jesus, nebe Ita kose tiha ho
mina, 28 atu halo tuir lo-los buat hotu nebe Ita
nia liman no Ita nia hanoin hakarak nanis ona atu mosu. 29
Oras ne’e, Na’i, hare sira nia ameasa, no tulun Ita atan sira atu bele
haklaken ho aten berani Ita futar lia, 30 hodi lolo
Ita nia liman atu fo isin diak, ho sinal no kmanek oi-oin hodi Ita atan santu
Jesus nia naran.” 31 Sira harohan hotu tiha, fatin
nebe sira hela nakdoko no sira hotu sai nakonu ho Espiritu Santu. Sira haklaken
Maromak futar lia ho aten berani.
|