5

Ananias no Safira

                ¹ Maibe, ema ida naran Ananias, hamutuk ho nia feen Safira, fa’an sira nia to’os. ² Nia rai hela ba nia an rasik nia to’os nia folin balun. Nia feen mos hatene ne’e. Tuir mai, nia lori to’os folin nia resin ba apostolu sira nia ain. ³ Maibe Pedro hatan, “Ananias, tansa Satanas hakonu o nia fuan, nune’e o bosok Espiritu Santu hodi rai hela to’os nia folin balun? ⁴ To’os ne’e seidauk fa’an karik, to’os ne’e la’os o nian tomak? Tansa o hanoin atu halo hahalok ne’e? O la bosok deit ema, maibe Maromak mos!” ⁵ Wainhira Ananias rona liafuan hirak ne’e, nia monu, mate, no ema hotu nebe rona kona ba nia tauk teb-tebes. ⁶ Mane foinsa’e sira mai hodi falun nia, no lori nia ba liur atu hakoi.

                ⁷ Liu tiha besik oras tolu, nia feen mosu mai. Nia la hatene buat nebe mosu. ⁸ Pedro dehan ba nia, “Dehan took mai, imi nia to’os folin nune’e duni ka?” Nia hatan, “Los, nune’e duni.” ⁹ Tuir mai, Pedro dehan ba nia, “Tansa o mos hakarak koko Na’i nia Espiritu? rona ba, “Sira nebe hakoi o nia laen, sira nia ain sei iha odamatan, no sira sei lori mos o.” ¹⁰ Iha oras ne’e kedas, nia monu ba rai, mate. Wainhira foinsa’e sira tama mai, sira hetan nia isin mate, tan ne’e sira lori nia ba liur hodi hakoi nia iha nia laen nia sorin. ¹¹ Kreda tomak no sira hotu nebe rona kona ba buat ida ne’e tauk teb-tebes.

Sinal no hahalok kmanek apostolu sira nian

                ¹² Apostolu sira halo sinal no kmanek oi-oin iha povu nia leet. Sira halibur an hamutuk iha Portiku Salomao nian. ¹³ La iha ema seluk nebe berani atu halibur an ho sira, maibe povu hamtauk sira teb-tebes. ¹⁴ Maibe, sira nebe fiar iha Na’i, mane no feto, sai barak ba bei-beik. ¹⁵ Nune’e ema lori ema moras sira iha luron hodi tau sira iha hadak no biti leten atu nune’e, wainhira Pedro liu ba, nia lalatak bele monu ba sira ida ka ema seluk. ¹⁶ Ema lubun boot housi rai sira nebe besik Jerusalem halibur an hamutuk, hodi lori ema moras no sira nebe espiritu aat sira halo terus, no sira hotu ne’e hetan diak.

Tesi lia iha Sinedriu

                ¹⁷ Am’lulik boot ho nia emar sira, katak Saduseu sira, mai ho laran moras; ¹⁸ sira kaer apostolu sira hodi hatama iha dadur laran. ¹⁹ Maibe iha kalan boot, Na’i nia anju ida loke dadur nia odamatan, lori sira ba liur hodi dehan: “Imi ba hatudu imi an iha templu hodi dehan sai buat hotu kona ba moris hirak ne’e ba povu. ²⁰ Wainhira sira rona ne’e, sira, dadersan hela iha loron nebe tuir mai, ba templu hodi hanorin. ²¹ Wainhira am’lulik boot no nia maluk to’o mai, sira halibur hamutuk Sinedriu, katuas sira hotu Israel nian, no haruka emar sira ba dadur laran atu lori sira mai. ²² Maibe guarda sira nebe ba, la hetan apostolu sira; ne’e duni, sira fila hodi hato’o nune’e: ²³ ”Ami hare dadur taka metin duni no ema sira nebe hein dadur iha duni odamatan, maibe wainhira ami loke odamatan ami la hetan ema ida iha laran.” ²⁴ Wainhira sira rona lia hirak ne’e, komandante templu nian no na’i lulik boot sira la hatene ne’e katak sa no sira hanoin buat ne’e sei to’o ba nebe. ²⁵ Maibe ema ida tama mai, fo hatene ba sira: “Ema sira nebe imi hatama iha dadur laran hamriik oras ne’e iha templu hodi hanorin povu.” ²⁶ Ne’e duni, komandante templu nian ho guarda sira ba hodi lori sira mai, maibe la halo aat ida ba sira, basa sira tauk katak povu bele tuda mate sira.

                ²⁷ Wainhira sira hatama ona sira iha uma laran, no halo sira hamriik iha Sinedriu nia oin, am’lulik boot husu sira dehan, ²⁸ “Ami hateten ona ba imi atu imi la bele hanorin hodi naran ne’e, maibe imi hakonu Jerusalem ho imi nia hanorin hodi hakarak duu ema ida ne’e nia ran mai ami”. ²⁹ Maibe Pedro ho apostolu sira hatan: “Ami sei halo tuir Maromak nia hakarak liu ema sira nian. ³⁰ Ita nia bei-ala sira nia Maromak halo moris hi’as Jesus, nebe imi oho hodi tara Nia housi ai-hun ida. ³¹ Maromak foti Nia iha nia sorin kuana nudar Na’i ulun no Maksoin, fo laran hakribi sala nian ba Israel no perdua ba sira nia sala. ³² Ami fo sasin ba buat hirak ne’e hamutuk ho Espiritu Santu nebe Maromak fo ba sira nebe halo tuir Nia hakarak”.

                ³³ Wainhira sira rona buat hirak ne’e, sira hirus teb-tebes hodi hakarak oho apostolu sira. ³⁴ Maibe fariseu ida housi Sinedriu naran Gamaliel, mestre ukunfuan nian ida, nebe ema hotu hamtauk, hamriik hodi haruka atu ema lori lai apostolu sira ba liur. ³⁵ Nia dehan ba sira “Maluk ema Israel sira; hanoin di-diak ba buat nebe imi sei halo ba ema sira ne’e. ³⁶ Sei fo-foun hela, Teudas mosu mai hodi dehan katak nia ema boot ida, no ema na’in atus haat resin la’o tuir nia: maibe ema oho nia, no sira hotu nebe laran metin ba nia namkari hotu.  ³⁷ Tuir nia mak Judas housi Galileia iha tempu sensus nian. Nia mos halibur ema ho nia, maibe nia mos mate no sira nebe tuir nia namkari hotu. ³⁸ Ne’e duni ha’u dehan ba imi atu keta halo buat ida ho sira ne’e, no husik sira ba. Basa sira nia haka’as an ne’e ka sira nia hahalok ne’e mai housi ema karik, nia sei harahun nia an. ³⁹ Maibe nia mai housi Maromak karik, imi la bele halo aat nia; imi bele hetan imi an halo funu hasouru Maromak.” Sira simu nia liafuan. ⁴⁰ Sira bolu fali apostolu sira, haruka baku sira ho oe, hodi bandu sira atu la bele koalia tan hodi Jesus Nia naran; hafoin sira haruka sira ba uma. ⁴¹ Sira sai housi Sinedriu nia oin, ho laran ksolok teb-tebes tan sira bele terus tan Jesus nia naran. ⁴² Loron tomak, iha templu no mos iha sira nia uma, sira hanorin no haklaken Jesus nudar Messias.