6

Diakonu sira

                ¹ Iha tempu neba, tan eskolante sira sai wa’in ba bei-beik, Helenista sira mura-mura hasouru ema Judeu sira basa sira la tau matan ba sira nia feto faluk wainhira fahe sasan loron loron nian. ² Ne’e duni sira na’in sanulu resin rua halibur komunidade tomak eskolante sira nian hodi dehan: “Ami la bele husik Maromak futar lia atu serbi iha meja. ³ Maun alin sira. imi hili housi imi leet ema na’in hitu nebe moris diak; nakonu ho Espiritu Santu no matenek, nebe ami sei foti atu kaer knaar ida ne’e, ⁴ no ami sei harohan no haklaken Maromak futar lia.  ⁵ Komunidade tomak simu lia hirak ne’e; nune’e sira hili Estevao, ema fiarna’in ida no nakonu ho Espiritu Santu; Filipe, Procoro, Nicanor, Timao, Parmenas, ho Nicolau housi Antiokia nebe sai fali ema Judeu ida. ⁶ Sira lori ema sira ne’e ba apostolu sira no sira harohan hodi tula liman ba sira. ⁷ Maromak futar lia belar ba nafatin: no iha Jerusalem eskolante sira sai barak ba bei-beik; am’lulik barak mos halo tuir fiar.                          

Estevao                  

                ⁸ Estevao, nakonu ho grasa no kbiit, halo buat kmanek no sinal sira iha povu sira leet. ⁹ Maibe ema balun housi grupu sinagoga ema la’os atan nian, ema housi Sireneia no Alexandria, no mos ema housi Silisia no Asia, mai haksesuk malu ho Estevao, ¹⁰ maibe sira la tahan nia matenek no espiritu nebe tulun nia koalia. ¹¹ Sub-subar, sira halo ema atu bosok dehan: “Ami rona nia hateten aat Moises no hasouru Maromak.” ¹² Sira hamanas povu, katuas sira, eskriba sira hodi hakbesik nia, kaer nia no lori nia ba iha Sinedriu. ¹³ Sira lori mai sasin bosok sira nebe dehan: “Ema ne’e koalia aat bei-beik hasouru fatin ne’e no hasouru ukunfuan. ¹⁴ Basa ami rona nia hateten katak Jesus Nazare sei sobu fatin ne’e no sei haruka ema atu muda lisan sira nebe ita simu housi Moises.” ¹⁵ Sira hotu nebe tur iha Sinedriu hateke ba Estevao hodi hare katak nia oin hanesan anju ida nian.