8

                ¹ Saul mos hakarak atu oho Estevao.

Kreda hetan susar iha Jerusalem

                Iha loron neba, ema hahu fo terus boot ba kreda iha Jerusalem, no sarani sira hotu namkari iha rai Judeia no Samaria tomak, apostolu sira deit mak hela. ² Ema diak sira hakoi Estevao nia isin mate no tanis maka’as tan hanoin nia. ³ Saul fali buka halakon kreda: nia tama uma sai uma hodi kaer ema mane no feto hodi hatama sira iha dadur laran.

Filipe

                ⁴ Maun alin sira nebe namkari ba rai selu-seluk hahu haklaken Na’i nia liafuan. ⁵ Nune’e Filipe la’o ba sidade ida iha rai Samaria hodi haklaken Messias ba ema sira iha neba. ⁶ Ema lubun boot, ho laran ida deit, simu Filipe nia hanorin wainhira sira rona nia no hare sinal sira nebe Filipe halo. ⁷ Basa espiritu aat sira sai housi ema barak hodi hakilar ho lia maka’as; mos ema isin tos no ain kudeik sira hetan fali isin diak. ⁸ Ema haksolok duni iha sidade ne’e.

Simao matan dook              

                ⁹ Ema ida naran Simao halo lulik oi-oin iha sidade hodi halo ema hakfodak tan nia dehan katak nia ema boot. ¹⁰ Ema hotu, housi kiik to’o boot, rona nia, hodi dehan, “Ema ne’e mak ‘Maromak nia kbiit’ nebe hanaran an ‘boot.’ ¹¹ Ba tempu ruma, sira fiar nia, basa nia halo sira hakfodak ho nia hahalok sira, ¹² maibe wainhira sira hahu fiar Filipe nebe haklaken liafuan diak kona ba Maromak nia reinu no kona ba Jesus Kristu nia naran, mane no feto hotu simu baptismu. ¹³ Simao mos fiar; no simu tiha baptismu, nia serbi Filipe lo-los. Wainhira nia hare sinal no hahalok kmanek sira nebe mosu, nia hakfodak teb-tebes.

                ¹⁴ Wainhira apostolu sira iha Jerusalem rona katak ema Samaria sira simu Maromak nia liafuan, sira haruka Pedro no Joao, ¹⁵ nebe ba duni no harohan ba sira atu sira bele simu Espiritu Santu, ¹⁶ basa Nia seidauk tun ba sira ida; sira simu deit baptismu iha Na’i Jesus nia naran. ¹⁷ Tuir mai, apostolu sira tula liman ba sira no sira ne’e simu Espiritu Santu.

                ¹⁸ Wainhira Simao hare katak Espiritu tun tamba apostolu sira tula liman, nia hasa’e osan ba sira ¹⁹ hodi dehan, “Fo mos kbiit ida ne’e mai ha’u, atu wainhira ha’u tula liman ba ema, ema bele simu Espiritu Santu. ²⁰ Maibe Pedro dehan ba nia, “O nia osan lakon ho o, basa o hanoin katak o bele sosa Maromak nia presente ho osan. ²¹ O la iha parte ka sorte kona ba ida ne’e, basa o nia fuan la los iha Maromak futar oin. ²² Hakribi o nia laran aat ne’e hodi harohan ba Na’i atu, bele karik, Na’i haraik perdua ba o nia fuan nia hakarak. ²³ Basa ha’u hare katak o nakonu ho naan horon moruk, no buat aat sira kaer o.” ²⁴ Simao hatan hodi dehan, “Harohan ba Na’i tamba ha’u, atu buat nebe o dehan la bele monu mai ha’u.” ²⁵ Nune’e wainhira sira fo sasin tiha no haklaken Na’i liafuan, sira fila fali ba Jerusalem no haklaken liafuan diak iha knua barak rai Samaria nian.

Ema boot housi rai Etiopia

                ²⁶ Na’i nia anju dehan ba diakonu Filipe: “Hamriik ba no la’o ba tasimane iha dalan housi Gasa ba  Jerusalem, dalan rai fuik maran nian.” ²⁷ Ne’e duni, nia hamriik no la’o ba. Oras ne’e iha ema Etiopia ida nebe la kaben, ema boot iha Candace, katak liurai feto Etiopia nian; nia tau matan ba liurai feto ne’e nia rikusoi tomak. Ema ne’e tun ba Jerusalem atu adora. ²⁸ Fila housi neba, nia tur iha nia kareta laran no tuir dalan, nia lee lia housi profeta Isaias: Espiritu Santu dehan ba Filipe: “O la’o ba hodi hakbesik kareta neba.” ²⁹ Filipe halai besik hodi rona ema ne’e lee Eskritura santa kona ba profeta Isaias. Filipe husu ema Etiopia ne’e: “O hatene buat nebe o lee dau-daun?” ³¹ Nia hatan: “Oin sa ha’u bele hatene wainhira la iha ema ida atu hanorin buat ne’e mai ha’u?” Ne’e duni nia husu Filipe atu sa’e ba kareta no tur hamutuk ho nia.³²  Liafuan Eskritura nian nebe nia lee mak ne’e: “Ha’u, hanesan bibi malae nebe ema lori atu oho; hanesan bibi oan nebe la lia wainhira ema lori atu oho ka tesi nia fulun; nia la loke nia ibun; ³³ wainhira ema hatun nia, ema la fo justisa ba nia. Se mak koalia kona ba nia gerasaun? Basa ema hasai tiha nia moris housi rai.” ³⁴ Ema boot ne’e hatan hodi husu ba Filipe: “Ha’u husu ita, profeta koalia kona ba se los? Kona ba nia an rasik, ka kona ba ema seluk? ³⁵ Filipe loke nia ibun, no hahu housi liafuan Eskritura nian ne’e, nia haklaken Jesus ba nia. ³⁶ Sira la’o dau-daun tuir luron wainhira sira hare be boot ida; ema boot ne’e dehan: “Be mak neba! Sa ida tan mak taka dalan mai ha’u atu ha’u bele simu baptismu?” ³⁷  Filipe hatan, “O fiar ho o nia laran tomak karik, o bele.” Nia hatan, “Ha’u fiar katak Jesus Kristu mak Maromak nia Oan Mane.” ³⁸ Nia haruka para kareta. Filipe ho ema boot ne’e tun hamutuk ba be, no Filipe sarani nia. ³⁹ Wainhira sira sai housi be, Na’i nia Espiritu hasai Filipe, nune’e eunuku la hare hetan nia: maibe nia tuir nia dalan ho ksolok wa’in tebes. ⁴⁰ Filipe ba sidade Azoto, no nia la’o ba rai hot-hotu, hodi haklaken lia foun ba ema hot-hotu iha sidade sira to’o nia to’o iha rai Sesareia.