9

Paulo nia konversaun

                ¹ Saul, hanoin nafatin atu oho Na’i nia eskolante sira, ba hasouru am’lulik boot ² hodi husu surat atu ba sinagoga sira iha Damasko, atu, nia hetan karik feto eh mane nebe tuir Dalan, nia sei kaer no futu metin ho korente hodi lori sira ba Jerusalem. ³ Tuir dalan, wainhira sira besik ona Damasko, naroman boot ida housi lalehan teki-teki mosu lakan hale’u nia. ⁴ Nia monu ba rai no rona lia ida nebe dehan: “Saul, Saul, tan sa o halo aat mai Ha’u?” ⁵ Nia hatan: “Na’i, Ita se los?” Na’i hatan ba nia dehan: “Ha’u mak Jesus, nebe o fo terus maka’as dau-daun. ⁶ Oras ne’e, o hamriik ba hodi tama iha sidade no iha neba ema sei hateten ba o buat nebe o sei halo.” ⁷ Saul nia maluk sira hamriik hodi la bele koalia basa sira rona liafuan, maibe la hare ema ida. ⁸ Saul hamriik housi rai, maibe wainhira nia loke matan, nia la hare buat ida; tan ne’e sira kaer nia liman hodi lori nia tama ba Damasko. Ba loron tolu nia la bele hare, no nia la han ka hemu buat ida.

Saul sai sarani

                ¹⁰ Iha Damasko, iha eskolante ida naran Ananias. Na’i dehan ba nia iha mehi: “Ananias!” Nia hatan ba Na’i: “Na’i, ha’u mak ne’e.” ¹¹ Na’i lia tun teni ba nia, “O hamriik ba no la’o ba dalan naran ‘Los’; buka iha Judas nia uma laran ema ida naran Saul housi rai Tarso. Oras ne’e nia harohan dau-daun. ¹² Iha oras ne’e Saul hare hanesan iha mehi, ema ida naran Ananias tama uma laran hodi tau liman ba nia, atu nia bele hare fali. ¹³ Ananias hatan ba Na’i, “Na’i, ema barak hateten mai ha’u kona ba ema ne’e, buat aat oi-oin nebe nia halo hasouru Ita nia santu sira iha Jerusalem.¹⁴ No iha ne’e, nia simu kbiit housi am’lulik boot sira atu tau ba dadur laran ema hotu nebe bolu Na’i nia naran.” ¹⁵ Maibe Na’i dehan ba nia, “O la’o ba, basa ema ne’e hanesan matadalan nebe Ha’u fihir atu lori Ha’u nia naran ba ema gentiu sira, ba liurai sira no Israel nia oan sira, ¹⁶ no Ha’u sei hatudu ba nia oin sa nia sei terus tan Ha’u nia naran. ¹⁷ Nune’e Ananias ba, tama iha uma, tau liman ba Saul hodi dehan: “Saul, ha’u maun, Na’i Jesus nebe mosu ba o iha dalan wainhira o la’o mai dau-daun, haruka ha’u atu o bele hare fali no o sei nakonu ho Espiritu Santu.” ¹⁸ Iha oras ne’e kedas, buat ruma hanesan ikan nia kulit monu sai housi Saul nia matan no nia bele hare fali. Hafoin, nia hamriik no simu baptismu.¹⁹  Han hotu tiha, nia hetan fali kbiit iha nia isin.   

Saul haklaken liafuan iha Damasko

                Ba loron ruma Saul hela ho Na’i nia eskolante sira iha Damasko, ²⁰ no nia hahu kedas atu haklaken Jesus iha sinagoga sira hodi hanorin katak Nia mak Maromak nia Oan Mane. ²¹ Sira hotu nebe rona nia, hakfodak hodi dehan, “Ema ne’e la’os ida nebe halo aat ba sira hotu nebe bolu Na’i nia naran iha Jerusalem, no nia mai iha ne’e lo-los atu lori sira fali ho korente ba am’lulik boot sira?” ²² Maibe Saul sai maka’as liu tan hodi hatan maka’as hasouru ema Judeu sira iha Damasko; nia hatudu katak Jesus mak Messias.

Saul iha Jerusalem

                ²³ Loron barak liu tiha, ema Judeu sira halo plano atu oho nia, ²⁴ maibe Saul hatene sira nia hakarak ne’e. Kalan loron sira tau matan ba odamatan boot sira atu oho nia, ²⁵ maibe iha kalan ida, eskolante sira lori nia hodi hatun nia iha raga laran housi kuak ida iha muru boot.

                ²⁶ To’o tiha Jerusalem, nia buka halibur an hamutuk ho eskolante sira seluk, maibe sira ne’e hotu tauk nia, hodi la fiar katak nia sai ona eskolante ida. ²⁷ Tuir mai, Barnabe tau matan ba nia hodi lori nia ba apostolu sira, no nia fo hatene ba sira oin sa, tuir dalan, nia hare Na’i no Na’i koalia ba nia, no oin sa iha Damasko, iha Jesus nia naran, nia koalia ho aten berani. ²⁸ Nia la’o mai la’o ba ho sira iha Jerusalem, hodi koalia ho aten berani iha Na’i nia naran. ²⁹ Nia koalia no haksesuk malu ho Helenista sira, maibe sira ne’e buka atu oho nia. ³⁰ Wainhira maun alin sira rona ida ne’e, sira lori nia ba Sesareia hodi haruka nia atu la’o ba rai Tarso.

Kreda hetan dame

                ³¹ Iha loron hirak neba, kreda hetan dame iha Judeia, Galileia no Samaria tomak. Nia hamriik metin liu tan no nia la’o hodi tauk Na’i, no ho ksolok Espiritu Santu nian, nia sei barak ba bei-beik.

Pedro fo isin diak

                ³² Pedro la’o dau-daun ba rai barak; nia ba hare santu sira nebe horik iha rai Lida. ³³ Iha neba, nia hetan ema ida naran Eneias, nebe latan hela iha nia tobafatin iha tinan ualu nia laran, basa nia ain tos. ³⁴ Pedro dehan ba nia, “Eneias, Na’i Jesus Kristu fo isin diak ba o! Hamriik no hadia o nia tobafatin ba!” Nia hamriik kedas. ³⁵ Ema hot-hotu housi rai Lida no housi rai Saron nian hare nia, no sira hotu fila ba Na’i.

Pedro halo Tabita moris hi’as

                ³⁶ Iha rai Jope, iha eskolante ida naran Tabita nebe dehan katak ‘Dorcada’. Nia halo diak barak no fo esmola barak. ³⁷ Iha loron hirak neba, nia moras, hafoin mate; tan ne’e, fase tiha nia isin mate, sira tau  nia iha sala ida iha andar leten. ³⁸ Tan Lida besik Jope no eskolante sira hatene katak Pedro iha neba, sira haruka ema na’in rua atu ba bolu nia hodi husu, “Favor, mai lalais, keta kleur.” ³⁹ Pedro hamriik hodi la’o ho sira. Wainhira nia to’o iha neba, sira lori nia ba sala iha andar leten, iha nebe feto faluk sira hotu hakbesik nia hodi tanis no hatudu ba nia hatais no unuk nebe Dorcada halo wainhira nia sei hela ho sira.⁴⁰ Pedro haruka sira hotu atu sai ba liur, hafoin nia hakneak hodi resa. Tuir mai nia fila ba mate nia isin hodi dehan: “Tabita, hamriik ba!” Nia loke matan, no wainhira nia hare Pedro,  nia tur. ⁴¹ Pedro kaer nia liman hodi halo nia hamriik, no bolu tiha santu sira no feto faluk sira, nia saran ba sira Tabita nebe moris fali ona. ⁴² Buat ne’e fo sai tiha iha rai Jope tomak, no ema wa’in fiar iha Na’i. ⁴³ Pedro hela kleur iha Jope ho Simao, ema badaen kulit ida.