11

Gentiu sira nia baptismu

                ¹ Apostolu no maun alin sira nebe horik iha Judeia rona katak ema gentiu sira mos simu Maromak futar lia. ² Ne’e duni, wainhira Pedro sa’e ba Jerusalem, maun alin sira nebe simu ona sirkunsisaun haksesuk malu ho nia dehan, ³ “O tama ba ema nebe la simu sirkunsisaun nia uma hodi han ho sira.” ⁴ Pedro hahu koalia ba sira hodi haktuir, ⁵ “Wainhira ha’u harohan dau-daun iha sidade Jope, ha’u hare visaun ida hanesan lensol ida tun housi lalehan mai, kaer metin hela housi lidun haat, mai to’o iha ha’u  nia oin. ⁶ Ha’u fihir nia di-diak, no hare balada ain haat rai tomak nian, balada fuik sira, samea no lafahik sira, no manu sira lalehan nian. ⁷ Ha’u rona mos lia ida nebe dehan mai ha’u: ‘Hamriik, Pedro; oho no han ba.’ ⁸ Maibe ha’u hatan: ‘La bele, Na’i, basa buat nebe bandu ka foer la dauk tama ha’u ibun.’  ⁹ Maibe ba dala rua, lia ida housi lalehan hatan, ‘Buat nebe Maromak halo mos ona, o la bele bolu bandu.’ ¹⁰ Buat ne’e mosu dala tolu, hafoin fila hikas ba lalehan. ¹¹ Iha oras ne’e duni, ema na’in tolu nebe haruka mai ha’u housi Sesareia mosu iha uma nebe ami hela. ¹² Espiritu haruka ha’u atu la’o hamutuk ho sira la hodi fihir ema. Maun alin na’in neen sira ne’e mos la’o hamutuk ho ha’u no ami tama iha ema ne’e nia uma. ¹³ Nia haktuir mai ami oin sa nia hare anju ida iha nia uma hodi dehan: ‘Haruka ema ruma ba Jope atu bolu Simao, nebe hanaran Pedro; ¹⁴ nia sei dehan liafuan ba o nebe ho nia o no o nia uma-kain tomak sei hetan maksoin. ¹⁵ Wainhira ha’u hahu koalia, Espiritu Santu tun ba sira, hanesan uluk nia tun iha ita leten. ¹⁶ No ha’u hanoin fali Na’i nia liafuan nebe dehan: ‘Joao sarani ho we, maibe imi sei simu baptismu ho Espiritu Santu’ ¹⁷ Na’i haraik kmanek ba sira hanesan ba ita wainhira ita hahu fiar iha Na’i Jesus Kristu; ha’u se los atu taka dalan ba Maromak?” ¹⁸ Rona tiha lia hirak ne’e, sira haksolok hodi fo gloria ba Maromak, dehan, “Oras ne’e Maromak haraik mos ba ema gentiu sira atu hakribi sira sala hodi moris foun”.

Kreda iha Antiokia

                ¹⁹ Maun alin sira nebe halai namkari tamba ema aat sira duni kreda hanesan sira halo ba Estevao la’o ba to’o rai Finisia, Chipre no Antiokia; sira la haklaken liafuan ba ema seluk; maibe ba Judeu sira deit. ²⁰ Maibe iha ema balun housi Chipre no Sirene iha sira leet nebe la’o ba Antiokia no sira koalia mos ba ema gregu sira hodi haklaken Na’i Jesus. ²¹ Na’i nia kbiit la’o hamutuk ho sira no ema barak nebe fiar fila ba Na’i. ²² Buat diak ne’e to’o kreda nia tilun iha Jerusalem no sira haruka Barnabe ba Antiokia. ²³ Wainhira nia to’o neba no hare Maromak nia grasa, nia haksolok no hamanas sira hotu nia laran atu laran metin ba Na’i ho fuan tomak, ²⁴ basa nia ema diak no nakonu ho Espiritu Santu no fiar. Ema barak los fila ba Na’i. ²⁵ Tuir mai Barnabe ba rai Tarso atu buka Saul, ²⁶ no hetan tiha nia, nia lori nia ba Antiokia. Sira halibur an hamutuk ho kreda iha neba iha tinan ida nia laran no hanorin ema barak los; iha Antiokia mak ba dala uluk eskolante sira hanaran an “Kristianu.”

Hamlaha boot

                ²⁷ Iha tempu neba profeta balun tun housi Jerusalem ba Antiokia, ²⁸ no sira ida naran Agabo hamriik no hateten nanis ho Espiritu nia roman katak hamlaha boot iha mundu tomak sei mosu, no ida ne’e mosu duni iha Claudio nia tempu. ²⁹ Nune’e eskolante sira hanoin katak, ema ida-ida, tuir nia kbiit, haruka tulun ba maun alin sira nebe hela iha Judeia. ³⁰ Sira halo ne’e duni, hodi haruka aihan ba katuas sira nebe Barnabe no Saul tau matan.