13

                ¹ Iha kreda Antiokia nian iha profeta no mestre sira; Barnabe, Simeao nebe hanaran Metan, Lucio housi Sirene, Manaen, tetrarka Herodes nia belun boot ida, no Saul. ² Wainhira sira hanai Na’i no halo jejum, Espiritu Santu lia tun ba sira: “Imi haketak Barnabe ho Saul ba Ha’u atu halo serbisu nebe Ha’u bolu sira na’in rua.” ³ Halo tiha jejum no hamulak, sira tula liman ba sira no haruka sira ba.

Misaun uluk iha Chipre

                ⁴ Sira ne’e, nebe Espiritu Santu haruka, la’o tun ba Seleusia, no housi neba, sira sa’e ro ba Chipre. ⁵ To’o tiha Salamina, sira hanorin Maromak nia liafuan iha ema Judeu sira nia sinagoga. Joao mos tulun sira. ⁶ La’o tiha rai tomak to’o Pafos, sira hasouru malu ho matan dook ida naran Barjesus, ema Judeu no profeta bosok ida. ⁷ Nia la’o hamutuk ho prokonsul Sergio Paulo, ema matenek ida nebe haruka bolu Barnabe no Saul tan nia hakarak rona Maromak nia liafuan. ⁸ Maibe matan dook ida naran Elimas (basa nia naran katak matan dook) ba hasouru sira hodi hakarak hasai prokonsul ne’e housi fiar. ⁹ Maibe Saul, nebe hanaran mos Paulo, nakonu ho Espiritu Santu, hateke maka’as ba nia ¹⁰ hodi dehan, “O diabu nia oan, o funubalun ba buat hotu nebe diak, nakonu ho lia bosok no lohi oi-oin. O sei la para atu halo kleuk Na’i nia dalan los sira? ¹¹ Iha oras ne’e kedas, Na’i nia liman iha o leten. O sei sai ema matan delek ida, hodi la bele hare loron ba tempu ruma.” Iha oras neba kedas, abu-abu metan taka nia, no nia la’o mai la’o ba hodi buka ema nebe la’o hamutuk hodi kaer nia liman. ¹³ Wainhira prokonsul hare buat nebe foin mosu, nia fiar, basa nia hakfodak ho lia hanorin kona  ba Na’i.

Paulo to’o Antiokia

                ¹⁴ Housi Pafos, Paulo no nia maluk sira sa’e ro no to’o ba Perga iha Pamfilia. ¹⁴ Housi Perga sira la’o ba oin no to’o ba Antiokia iha Pisidia. Iha loron Sabadu, sira tama ba sinagoga hodi tur. ¹⁵ Wainhira ema lee tiha ukunfuan no profeta sira, sinagoga na’in dehan ba sira, “Maun alin, imi ida iha karik liafuan atu hamanas povu, favor koalia ba.”

Paulo nia liafuan

                ¹⁶ Ne’e duni, Paolo hamriik foti liman dehan: “Israel oan sira no imi sira hotu nebe hamtauk Maromak, rona ba: ¹⁷ “Povu Israel nia Maromak fihir ita nia bei-ala sira no foti povu ne’e atu sai boot wainhira sira tur iha rai Egiptu.  Ho kbiit wa’in Nia hasai sira housi neba no ¹⁸ ba tinan haat nulu, Nia tahan sira iha rai fuik maran. ¹⁹ Halo rahun tiha nasaun hitu iha rai Kanaan, Nia haraik rai ne’e ba sira nudar sira nia liman rohan; ²⁰ ba tinan besik atus haat lima nulu. Ne’e hotu tiha, Nia haruka juis sira to’o profeta Samuel. ²¹ Tuir mai, sira husu liurai ida. Maromak fo Saul, Cis housi suku Benjamin nia oan, ba sira ba tinan haat nulu. ²² Tuir mai, Nia hasai nia hodi foti David ba sira nia liurai. Kona ba mak Nia fo sasin nune’e, ‘Ha’u hetan David, Jesse nia oan; nudar ema ida nebe tuir los Ha’u nia laran; nia sei hala’o Ha’u nia hakarak tomak.’ ²³ Housi ema ne’e nia bei-oan sira, Maromak, tuir Nia promessa, lori ba Israel Maksoin ida, Jesus. ²⁴ Joao fo hatene nanis ba povu Israel tomak katak nia atu hiit an mai wainhira nia haklaken baptismu atu hakribi sala nian, ²⁵ no wainhira nia knaar atu hotu ona, Joao hateten, ‘Imi hanoin ha’u se? Ha’u la’os Nia. Maibe sei to’o mai ema seluk ida, nebe, ha’u la soi atu kore nia sandalis tali.’”

                ²⁶ “Maun alin sira, Abraao nia familia nia oan, no sira seluk tan iha imi nia leet nebe hamtauk Maromak: Maromak haruka tiha ona lia maksoin mai ita. ²⁷ Jerusalem nia oan sira no sira nia na’i ulun sira la hatene Nia, no wainhira sira tau todan ba Nia, sira halo tuir profeta sira nia liafuan nebe ita lee Sabadu Sabadu. ²⁸ Maski sira la hetan buat ida atu oho Nia, sira husu Pilatos atu oho Nia, ²⁹ no wainhira sira halo tuir ona buat hotu nebe hakerek nanis kona ba Nia, sira hatun Nia housi ai-hun no hakoi Nia iha rate laran. ³⁰ Maibe Maromak halo Nia moris hi’as fali housi mate sira leet, ³¹ no iha loron barak nia laran, Nia mosu ba sira nebe sa’e housi Galileia ba Jerusalem, no oras ne’e sira ne’e mak Nia sasin ba povu sira. ³² Ami rasik fo sai ba imi liafuan diak katak buat nebe Maromak hakotu ba ita bei-ala sira, ³³ Nia hala’o lo-los ona mai ita, sira nia bei-oan sira, hodi foti Jesus, nudar hakerek nanis ona iha salmu ba dala rua: “O Ha’u nia Oan, ohin Ha’u hahoris O” ³⁴ No katak Nia halo nia moris hi’as fali housi mate no nia isin sei la dodok tan, Nia fo hatene ho liafuan hirak ne’e, ‘Ha’u sei fo ba o buat santu no kmanek sira nebe ha’u hakotu ba David.’  Tan ne’e Nia dehan tan iha salmu seluk, ‘Ita sei la husik Ita nia santu nia isin sai dodok.’ ³⁶ Basa wainhira David serbi tiha ona Maromak nia hakarak iha nia moris, nia toba tiha, no sira halibur nia ho ninia avo sira, maibe nia isin dodok. ³⁷ Maibe ida nebe Maromak halo moris hi’as, Nia isin la dodok. ³⁸ Imi hatene ba, maun alin sira, katak housi Nia, mak haklaken ba imi perdua ba sala sira; ³⁹ no iha Nia mak ema nebe fiar bele sai ema los housi buat hotu nebe imi la bele sai ema los tuir Moises nia ukunfuan,. ⁴⁰ Ne’e duni, matan moris ba, atu buat nebe hateten nanis iha profeta la bele mosu ba imi: ⁴¹ ‘Hare ba, imi sira nebe hamnasa, hakfodak no halai lakon ba, basa Ha’u halo dau-daun hahalok ida iha imi nia loron, hahalok nebe imi sei la fiar maski ema ida fo hatene ba imi.’”

                ⁴² Wainhira sira atu sai ona, ema sira husu sira atu koalia fali kona ba buat sira ne’e iha Sabadu nebe tuir mai. ⁴³ Wainhira ema sira nebe tuir orasaun iha sinagoga sai ona, ema Judeu barak no mos sira nebe mai atu harohan la’o tuir Paulo no Barnabe; sira ne’e koalia ba sira no hamanas sira atu laran metin nafatin ba Maromak nia grasa.

Liafuan ba gentiu sira

                ⁴⁴ Iha Sabadu nebe tuir mai, besik sidade tomak mai atu rona Na’i nia liafuan. ⁴⁵ Wainhira ema Judeu sira hare ema lubun boot ne’e, sira laran moras, no hodi hasara maka’as, sira koalia hasouru buat nebe Paulo dehan. ⁴⁶ Paulo ho Barnabe koalia ho aten berani no dehan, “Maromak futar lia ten ke hato’o uluk ba imi, maibe tamba imi hewai nia no hare imi nia an nudar ema nebe la soi moris rohan laek, oras ne’e ami fila ba gentiu sira. ⁴⁷ Basa Na’i haruka ami halo nune’e: ‘Ha’u foti o nudar roman ba nasaun hotu, atu o bele lori maksoin ba rai tomak.” ⁴⁸ Rona tiha lia hirak ne’e, ema gentiu sira laran ksolok teb-tebes hodi hahi Na’i nia liafuan. Sira hotu nebe Maromak fihir ona atu simu moris rohan laek, ema sira ne’e fiar duni, ⁴⁹ no Na’i nia liafuan belar iha fatin tomak neba. ⁵⁰ Maibe ema Judeu sira lori lia ba feto sira nebe naran boot  nebe hamtauk Maromak no mane sira nebe ukun sidade, atu sira funu hasouru Paulo ho Barnabe, to’o duni sai sira na’in rua housi sira nia rai. ⁵¹ Ne’e duni, sira na’in rua liki rai rahun housi sira ain hasouru rai na’in sira, hafoin sira la’o ba Ikonio. ⁵² Eskolante sira haksolok teb-tebes, no Espiritu Santu hela ho sira.