14
Paulo no Barnabe iha Ikonio
1 Iha
Ikonio, sira tama iha ema Judeu sira nia sinagoga ida no koalia maka’as iha
neba, nune’e ema Judeu no gregu barak hahu fiar, 2 maski
ema Judeu sira nebe la fiar lori lia no hamanas gentiu sira hasouru maun alin. 3
Sira hela kleur iha neba hodi koalia ho aten berani tan Na’i. No Na’i
hametin sira nia liafuan kona ba nia grasa hodi halo sinal no buat kmanek housi
sira nia liman. 4 Ema sidade nian fahe malu: balun
hamutuk ho ema Judeu sira; balun ho apostolu sira. 5 Wainhira
ema gentiu no ema Judeu, hamutuk ho sira nia na’i ulun buka atu ba hasouru no
tuda sira, 6 sira hatene buat ne’e no sira halai ba
sidade sira Likaonia, Listra no Derbe nian, no ba fatin seluk nebe besik neba; 7
iha neba sira haklaken liafuan diak.
Paulo no Barnabe iha Listra
8 Iha
Listra, iha ema ida ho ain tos, ain aat houri kiik kedas, nebe la’o la bele. 9
Nia rona Paulo koalia; Paulo nebe fihir nia, hare katak ema ne’e fiar
maka’as atu hetan isin diak, 10 no nia dehan ho lia
maka’as: “O hamriik los ba ho o nia
ain!” Ema ne’e haksoit no hahu la’o mai la’o ba. 11 Hare
tiha buat nebe Paulo halo, ema lubun boot ne’e hakilar ho lia Likaonia nian:
“Maromak sira halo an ba ema hodi tun to’o mai ita”. 12 Sira
hanaran Barnabe “Zeus” no Paulo “Hermes”, basa Paolo mak koalia ba sira. 13
Iha odamatan sidade nianiha templu ba Zeus. Am’lulik Zeus
nian lori karau vaka no ai-funan sira, basa, nia hakarak hasa’e sakrifisiu ba
sira na’in rua hamutuk ho ema lubun boot.
14 Wainhira
apostolu Barnabe no Paulo rona buat ne’e, sira les sira nia unuk, halai ba ema
lubun boot nia laran hodi hateten ho lia maka’as: 15 “Maluk
sira, imi halo sa ida? Ami mos ema
hanesan imi, ami mai haklaken liafuan diak ba imi atu imi husik maromak bosok
sira hodi fila ba Maromak moris, nebe ‘halo lalehan no rai, tasi no buat tomak nebe iha sira.’ 16
Iha otas uluk, Nia husik nasaun sira hotu la’o tuir ida-ida nia dalan, 17
maibe Nia iha sasin nafatin basa wainhira Nia haraik Nia laran luak no
Nia fo ba imi udan housi lalehan no tempu diak atu imi hetan ai-fuan barak, no
fo han no halo imi haksolok iha imi nia moris.” 18 Maski
ho liafuan hirak ne’e, susar teb-tebes atu sira bele para ema lubun ne’e housi
sakrifisiu nebe sira hakarak hasa’e ba sira na’in rua.
19 Maibe
ema Judeu balun housi Antiokia no Ikonio to’o mai hodi manan ba sira an rasik
ema lubun boot ne’e. Sira tuda Paulo no dada nia housi sidade, hodi hanoin
katak nia mate ona. 20 Maibe wainhira eskolante
sira mai halibur an hale’u nia, nia hamriik hodi tama ba sidade laran. Iha
loron nebe tuir mai, nia liu ba Derbe ho Barnabe.
Misaun uluk nian hotu ona
21 Haklaken
tiha lia foun diak iha sidade ne’e no sarani tiha ema barak, Paulo ho Barnabe
fila fali ba Listra no ba Ikonio no ba Antiokia. 22 Sira
hametin eskolante sira nia laran no husu sira atu laran metin to’o rohan iha
fiar, hodi dehan, “Ita ten ke hetan susar barak atu tama iha Maromak nia
reinu.” 23 Ba sarani sira iha kreda ida-ida sira
foti katuas sira; no ho harohan no jejum, sira saran sira ba Na’i, nebe sira
fiar. 24 Tuir mai, sira la’o liu rai Pisidia no
to’o ba rai Pamfilia. 25 Haklaken tiha Maromak nia
liafuan iha Perga, sira tun ba Atalia. 26 Housi
neba, sira sa’e ro ba Antiokia, iha nebe sira saran an ba Na’i nia grasa tan
serbisu nebe sira halo tiha ona. 27 To’o tiha neba,
sira halibur kreda tomak hodi haktuir buat hotu neba Maromak halo ho sira no
oin sa Na’i loke odamatan fiar nian ba gentiu sira. 28 Sira
hela kleur iha neba ho eskolante sira.
|